ఏపీఎస్ఆర్టీసీలో ఎన్నికల సందడి మొదలైంది. 2022 నుంచి 2026 సంవత్సరం వరకు ఉద్యోగుల పొదుపు, క్రెడిట్‌ కోపరేటివ్‌ సొసైటీ లిమిటెడ్‌ (సీసీఎస్‌)కు సభ్య ప్రతినిధుల ఎన్నిక డిసెంబరు 14న నిర్వహించాలని నిర్ణయించారు. 350 మంది అధికారులు మినహా మిగిలిన 50 వేల మంది ఉద్యోగుల్లో దాదాపు అంతా ఈ సొసైటీలో సభ్యులుగా ఉంటారు. డిపో, గ్యారేజ్‌ల పరిధిలో ఉద్యోగుల సంఖ్యను బట్టి సభ్య ప్రతినిధుల సంఖ్య ఉంటుంది. రాష్ట్రవ్యాప్తంగా 210 మంది సభ్య ప్రతినిధులను ఎన్నుకుంటారు. ఇలా గెలిచినవారు డిసెంబరు 29న జరిగే మరో ఎన్నికలో 9 మంది మేనేజింగ్‌ కమిటీ సభ్యులను ఎన్నుకుంటారు. సాధారణంగా 210 మంది సభ్య ప్రతినిధులకుగాను, 106 మంది ఏ యూనియన్‌ మద్దతుదార్లు గెలుస్తారో.. ఆ ప్యానెల్‌కు చెందిన వారే మేనేజింగ్‌ కమిటీ సభ్యులుగా గెలిచేందుకు వీలుంటుంది.
మద్దతు కోసం మంతనాలు..
ప్రస్తుత సీసీఎస్‌ సర్వసభ్య సమావేశం ఈ నెల 10న నిర్వహించనున్నారు. ఆ తర్వాత ఎన్నికల షెడ్యూల్‌ ఖరారు కానుంది. ఆర్టీసీ ఉద్యోగులు ప్రజా రవాణాశాఖ (పీటీడీ)లో విలీనం కావడంతో.. యూనియన్లకు గుర్తింపు లేనట్లేనని చెప్పాలి. ఆయా కార్మిక యూనియన్లు, ఉద్యోగుల సంక్షేమ సంఘాలుగా ఏర్పడ్డాయి. ఇప్పుడు ఇవన్నీ సీసీఎస్‌ ఎన్నిక ద్వారా ఆధిపత్యం చూపేందుకు చూస్తున్నాయి. గతంలో మాదిరిగా ఈసారి కూడా కలిసి పోటీచేద్దామంటూ ఎంప్లాయిస్‌ యూనియన్‌.. ఎస్‌డబ్లూఎఫ్‌, కార్మిక పరిషత్‌, వైఎస్‌ఆర్‌ ఎంప్లాయిస్‌ యూనియన్లకు లేఖలు రాసింది. మరోవైపు ఎన్‌ఎంయూఏ పలు సంఘాల మద్దతు కోసం మంతనాలు జరుపుతోంది.
ఇదీ చూడండి:
STUDENTS PROTEST: అనంతలో విద్యార్థులపై విరిగిన లాఠీ.. విద్యాసంస్థల బంద్కు పిలుపు
