తెలంగాణ రాష్ట్రం జయశంకర్ భూపాలపల్లి జిల్లా టేకుమట్ల మండల కేంద్రంలో తనకు న్యాయం చేయాలని ఓ ప్రియురాలు నిరసనకు దిగింది. పెళ్లి చేసుకోవాలని కోరినందుకు ప్రియురాలిని ఎన్‌కౌంటర్ చేస్తానని బెదిరించాడో ప్రేమికుడు. ఈ నేపథ్యంలో ప్రియుడి ఇంటి ముందు ప్రియురాలు మౌనదీక్షకు దిగింది.
టేకుమట్లకు చెందిన కొలుగూరి కార్తీక్ ఆర్మీ జవాన్. రేగొండ మండలం జగ్గయ్యపేటకు చెందిన తమ బంధువైన ఓ యువతిని గత ఆరేళ్లుగా ప్రేమించాడు. తనను పెళ్లి చేసుకుంటానని చెప్పి శారీరకంగా లొంగదీసుకున్నాడు. కొన్ని రోజుల క్రితం ఆ యువతి పెళ్లి చేసుకోవాలని అడగగా ముఖం చాటేశాడు.
ఫోన్లో సంప్రదిస్తే 'నేను ఎన్‌కౌంటర్ స్పెషలిస్టును, ఎన్‌కౌంటర్ చేస్తా. నీకు దిక్కున్న చోట చెప్పుకో' అని బెదిరిస్తున్నాడని యువతి వాపోయింది. కార్తీక్తో తన పెళ్లి జరగకపోతే ఆత్మహత్య చేసుకుంటానని యువతి తెలిపింది. చివరకు కుటుంబ సభ్యులతో కలసి టేకుమట్ల పోలీస్స్టేషన్లో ఫిర్యాదు చేసింది. ప్రియురాలు, తల్లి ఫిర్యాదు మేరకు ఐదుగురిపై కేసు నమోదు చేసి దర్యాప్తు చేస్తున్నట్లు ఎస్సై వీరారెడ్డి తెలిపారు.
ఇదీ చూడండి:
ప్రేమ పేరుతో గ్రామ వాలంటీర్ మోసం..ఫోక్సో చట్టం కింద కేసు నమోదు
