వైకాపా అవసరమైతే ఎన్డీయేతో చేరుతుందని తాను ఎక్కడా అనలేదని మంత్రి బొత్స అన్నారు. రాజకీయ పార్టీలుగా ఎవరి భావాలు వారికి ఉంటాయన్న ఆయన.. తాను ఆ మాటలు ఎక్కడ అన్నానో చూపించాలని ఓ బహిరంగ లేఖ రాశారు. విశాఖలోని వైకాపా నగర కార్యాలయంలో శుక్రవారం మంత్రి బొత్స సత్యనారాయణ నిర్వహించిన విలేకర్ల సమావేశంలో కేంద్ర రాష్ట్ర సంబంధాలపై విలేకరులు అడిగిన పలు ప్రశ్నలకు సమాధానమిచ్చారు. ఆ సారాంశం ఇదే..!
ఘర్షణ ఎందుకు పడాలి
కేంద్ర ప్రభుత్వంతో ఎందుకు ఘర్షణ పడాలి అని ఆ సమావేశంలో బొత్స ప్రశ్నించారు. అవసరమైతే, రాష్ట్రానికి రావాల్సిన ప్రయోజనాలకు ఏమైనా ఇబ్బంది వస్తే తప్పనిసరిగా డిమాండు చేస్తానని అన్నారు. అంతేగానీ రోజూ దాని గురించి కార్యక్రమం కరెక్ట్‌ కాదు కదా అని వ్యాఖ్యానించారు.
రాష్ట్ర ప్రయోజనం కోసమే
తాము భాజపాకు దగ్గరగానూ.. అలా అనీ మరీ దూరంగానూ లేమని బొత్స అన్నారు. తమదంతా అంశాల వారీగా ఉంటుందని స్ఫష్టం చేశారు. రాష్ట్ర ప్రయోజనం కోసం ఏ స్థాయికైనా దిగుతామని అన్నారు. ఎవరినైనా గడ్డం పుచ్చుకుని బతిమాలుతామని పేర్కొన్నారు. రాష్ట్ర ప్రయోజనాలకు విఘాతం కల్పిస్తే ఏదీ ఉపేక్షించమని చెప్పారు.
అవకాశం ఉంటే పరిశీలిస్తాం
సమావేశంలో రాష్ట్ర ప్రయోజనాల కోసం ఎన్డీయేలో వైకాపా చేరే అవకాశం ఉందా అన్న ప్రశ్నకు.. సమాధానమిచ్చిన బొత్స అవకాశం వస్తే పరిశీలిస్తారని చెప్పారు. దానివల్ల మేలవుతుందనుకుంటే. ఆ అవసరం వస్తే చేరతామని లేకపోతే మానేస్తామని అన్నారు.
