తెలంగాణలో అత్యంత ప్రతిష్ఠాత్మకమైన బతుకమ్మ పండుగ ఖ్యాతి విశ్వవ్యాప్తమైంది. బతుకమ్మ వైభవం దుబాయ్లో కనుల విందు చేసింది. విశ్వవేదికపై పూలపండుగ వైభవాన్ని ప్రదర్శించారు. ప్రపంచంలోనే ఎత్తైన బుర్జ్ ఖలీఫాపై బతుకమ్మ(Bathukamma on Burj Khalifa) వీడియో ప్రదర్శన కనుల విందుగా జరిగింది. బుర్జ్ ఖలీఫాపై మూడు నిమిషాల వీడియోను ప్రదర్శించారు. బతుకమ్మతో పాటు సీఎం కేసీఆర్ చిత్రపటాన్ని వీడియోలో ప్రదర్శించారు. బతుకమ్మ వీడియోను ప్రపంచంలోనే అతిపెద్ద తెరపై ఒకేసారి లక్ష మంది వీక్షించేలా ప్రదర్శించటం ఇదే మొదటిసారి కావటం విశేషం.
కేరింతలు కొట్టిన కవిత..
బతుకమ్మ పండుగ ప్రాశస్త్యం, విశిష్ఠత, సంబురాల సంస్కృతిని తెలిపేలా వీడియో రూపొందించి ఎంతో గొప్పగా ప్రదర్శించారు. ఈ వేడుకను దుబాయ్లో జనాలతో కలిసి తెలంగాణ జాగృతి అధ్యక్షురాలు, ఎమ్మెల్సీ కవిత తిలకించారు. వీడియో ప్రదర్శించినంత సేపు ఎమ్మెల్సీ కవిత.. సంతోషంతో కేరింతలు కొట్టారు. వీడియోను చూస్తూ.. చిన్నపిల్లగా మారి ఆనందంతో కేకలు వేశారు. బతుకమ్మ ఖ్యాతిని విశ్వవ్యాప్తం అవుతున్న క్షణాలను కవిత పూర్తిగా ఆస్వాధించారు. బుర్జ్ఖలీఫాపై తన తండ్రి సీఎం కేసీఆర్ ఫొటో రాగానే.. అరుస్తూ సంతోషం వ్యక్తం చేశారు. ఎమ్మెల్యేలు బాజిరెడ్డి, గణేశ్‌ గుప్తా, సురేందర్‌, షకీల్‌, జీవన్‌రెడ్డి, సంజయ్‌, రాజ్యసభ సభ్యులు సురేశ్ రెడ్డి కవిత వెంటే ఉన్నారు.
ఇదీ చదవండి:
BATHUKAMMA ON BURJ KHALIFA: బుర్జ్ ఖలీఫాపై బతుకమ్మ పాటకు పట్టాభిషేకం
