'పరీక్షలు పెంచాం.. అందుకే ఎక్కువ కేసులు'

రాష్ట్రంలో కరోనా కట్టడికి పటిష్ట చర్యలు తీసుకుంటున్నామని వైద్యారోగ్యశాఖ మంత్రి ఆళ్లనాని తెలిపారు. కేంద్ర మార్గదర్శకాలకు అనుగుణంగానే వలస కూలీలను సొంత రాష్ట్రాలకు పంపిస్తున్నట్లు స్పష్టం చేశారు. పరీక్షలు ఎక్కువగా చేయడం వల్లే కేసులు పెరుగుతున్నట్లు వెల్లడించారు. ఇతర రాష్ట్రాల్లో చిక్కుకున్న ఏపీ వాసులను ప్రభుత్వ ఖర్చులతో ఇక్కడికి తీసుకొస్తున్నట్లు తెలిపారు. కూలీలకు పరీక్షలు, క్వారంటైన్‌ విషయాలపై గురువారం నిర్ణయం తీసుకుంటామని మంత్రి పేర్కొన్నారు.

కరోనా కట్టడి చర్యల్లో దేనికీ వెనకడుగు వేయడం లేదని మంత్రి ఆళ్ల నాని తెలిపారు. కరోనాపై క్షేత్రస్థాయి అంశాలపై మంత్రుల కమిటీ చర్చించిందన్న ఆయన... దీనికి సంబంధించి వివరాలు వెల్లడించారు.

మంత్రి ఇంకా ఏమన్నారంటే..

• కరోనా నియంత్రణకు సీఎం ఎప్పటికప్పుడు అధికారులకు ఆదేశాలు ఇస్తున్నారు.
• కరోనా పరీక్షలు పెంచాం, అందుకే ఎక్కువ కేసులు వస్తున్నాయి.
• ఒక్కసారిగా వలసకూలీలు ఏపీకి వస్తే ఏం చేయాలనే దానిపై చర్చించినట్లు తెలిపారు.
• కేంద్రం మార్గదర్శకాలను పాటిస్తూ.. తొలుత వలసకూలీలను సొంతరాష్ట్రాలకు పంపిస్తున్నాం.
• ఇతర రాష్ట్రాల కూలీలు ఏపీలో ఎంతమంది ఉన్నారో అంచనా ఉంది.
• వలసకూలీల తర్వాత విద్యార్థులు, యాత్రికులకు ప్రాధాన్యమిస్తున్నాం.
• ఇతర రాష్ట్రాల్లో చిక్కుకున్న మనరాష్ట్ర కూలీలను ప్రభుత్వ ఖర్చులతో సురక్షితంగా స్వగ్రామాలకు తరలిస్తున్నాం.
• వలస కార్మికులకు బృందాల వారీగా పరీక్షలు చేస్తాం.
• కూలీలకు పరీక్షలు, క్వారంటైన్‌ విషయాలపై గురువారం నిర్ణయం తీసుకుంటాం.
• మద్యం దుకాణాల వద్ద టీచర్లను ఎక్కడా వినియోగించలేదు.
• కంటైన్మెంట్ జోన్లలో పరిస్థితి అంచనాకు వారి సేవలు వాడుకుని ఉండవచ్చు.
• ఉపాధ్యాయులు సైతం ప్రజల్లో అవగాహన కల్పించేందుకు ప్రయత్నించారు.
• లాక్‌డౌన్ సడలింపుల్లో క్షేత్రస్థాయిలో మరింత అవగాహన కల్పిస్తామన్న మంత్రి.. వ్యవసాయం, అనుబంధ రంగాలపైనా కమిటీలో చర్చించినట్లు తెలిపారు.

ఇదీ చూడండి..