కొంత కాలం క్రితం హైదరాబాద్ సైబర్ ఠాణాలో నమోదైన ఓ కేసులో కోల్‌కతా, గుర్‌గావ్‌లలోని ఐసీఐసీఐ బ్యాంకులో ఉన్న నిందితుల ఖాతాల లావాదేవీలను పోలీసులు స్తంభింపజేశారు. ఇటీవల ఓ గుర్తుతెలియని వ్యక్తి కోల్‌కతాలోని ఐసీఐసీఐ బ్యాంకుకు వెళ్లి తనకు తాను కోల్‌కతా సైబర్ ఎస్సైనంటూ పరిచయం చేసుకొని, నకిలీ గుర్తింపు కార్డునిచ్చాడు. హైదరాబాద్ సైబర్ పోలీసులు స్తంభింపజేసిన ఖాతాను పునర్ధురించడానికి అనుమతిస్తూ ఉత్తర్వులు పంపించారంటూ ఓ ప్రతిని బ్యాంకు అధికారులకు అందజేశాడు. గుర్‌గావ్‌లోని ఐసీఐసీఐ బ్యాంక్‌లోనూ అదే సమయంలో ఇలాంటి నకిలీ పత్రాలనే సమర్పించారు. బ్యాంకు అధికారులు ఆ ఖాతాను మనుగడలోకి తెచ్చారు.
రూ.1.18 కోట్లు బదిలీ..
కొద్ది క్షణాల్లోనే రెండు ఖాతాల్లోని మొత్తం రూ.1.18 కోట్లు బదిలీ అయ్యాయి. ఇదంతా వెంటనే జరిగిపోవడంతో అనుమానం వచ్చిన బ్యాంకు అధికారులు విచారణ చేస్తే.. ఉత్తర్వుల ప్రతులన్నీ నకిలీవని తేలింది. వెంటనే హైదరాబాద్‌లోని బ్యాంకు అధికారులకు సమాచారాన్ని అందించగా.. కేసు నమోదు చేయించారు.
ఇప్పటికే 28 మంది అరెస్ట్..
తక్కువ వడ్డీ పేరుతో వేల కోట్ల రూపాయల రుణాలిచ్చి పలువురి ఆత్మహత్యలకు కారణమైన రుణ యాప్ల నిర్వాహకులపై హైదరాబాద్ సైబర్ క్రైం పోలీసులు ఇప్పటికే కేసులు నమోదు చేశారు. ఇప్పటి వరకు 28 మందిని అరెస్టు చేసి నిర్వాహకులకు చెందిన బ్యాంకు ఖాతాలు స్తంభింపజేశారు. హైదరాబాద్, బెంగళూర్, కోలకతా, దిల్లీలోని పలు ఖాతాల్లో ఉన్న దాదాపు రూ.400 కోట్లను నిలిపివేశారు. బ్యాంకుల్లో ఉన్న డబ్బును ఎలాగైనా వాడుకోవాలని రుణ యాప్ నిర్వాహకులు ఈ తరహా మోసాలకు తెరలేపుతున్నట్లు పోలీసులు అనుమానిస్తున్నారు.
