అమరావతి పరిరక్షణ పోరాటం ఉద్ధృతంగా సాగుతోంది. 3 రాజధానులు వద్దు.... అమరావతే ముద్దు అంటూ దీక్షలు, ధర్నాలు కొనసాగిస్తున్న రైతులు.. భారీ ప్రదర్శనలతో తమ ఆకాంక్షను చాటుతున్నారు. పాదయాత్రగా వెళ్లి బెజవాడ దుర్గమ్మ, అనంతవరం వెంకన్నకు... మొక్కుకున్న 29 గ్రామాల ప్రజలు.. భారీ వాహన ర్యాలీ నిర్వహించారు. వందలాది ద్విచక్రవాహనాలు, ఆటోలు, కార్లు, ట్రాక్టర్లు అందుబాటులో ఉన్న అన్ని వాహనాలతో ర్యాలీలో పాల్గొన్నారు.
తుళ్లూరు దీక్షా శిబిరం నుంచి మొదలైన ర్యాలీ... రాయపూడి, వెలగపూడి, లింగాయపాలెం, మోదుగులలంకపాలెం, కృష్ణాయపాలెం.. ఐనవోలు, శాఖమూరు, పెదపరిమి, నెక్కల్లు, వడ్డమాను, హరిశ్చంద్రపురం, బోరుపాలెం, దొండపాడు మీదుగా.. తిరిగి తుళ్లూరు చేరుకుంది. రైతులు, రైతు కూలీలు జాతీయ పతాకాలు, ఐకాస జెండాలు చేతబూని ర్యాలీలో పాల్గొన్నారు.
ఈ ర్యాలీ చూసైనా వైకాపా ప్రభుత్వం 3 రాజధానులపై వెనక్కి తగ్గాలని మహిళలు డిమాండ్‌ చేశారు. వాహన ర్యాలీ అనుకున్నదానికంటే మిన్నగా విజయవంతం అయిందని.. అమరావతి ఐకాస నేతలు తెలిపారు. ఈ ర్యాలీ స్ఫూర్తితో... మరిన్ని కార్యక్రమాలు నిర్వహించి ప్రభుత్వంపై ఒత్తిడి పెంచుతామని రాజధాని రైతులు తెలిపారు. ఇవాళ కూడా పలు ప్రాంతాల్లో నిరసనలు కొనసాగనున్నాయి.
ఇదీ చదవండి: 'సముద్రతీరానికి దూరంగా రాజధాని ఉండాలని సిఫార్సు చేశాం'
