Police custody for accused in conspiracy to minister murder case: మంత్రి శ్రీనివాస్ గౌడ్ హత్యకు కుట్ర బయటపడటంతో ఇంటిలిజెన్స్ ఉన్నతాధికారులు ఆయనకు భద్రత పెంచారు. గ్రేహౌండ్స్ పోలీసులతో అదనపు బందోబస్తు ఏర్పాటు చేశారు. నలుగురు గ్రేహౌండ్స్ కానిస్టేబుళ్లు 24 గంటల పాటు విధుల్లో ఉంటారు. మరో నలుగురు ప్రత్యేక పోలీసులు భద్రతగా ఉంటారు. శ్రీనివాస్ గౌడ్ను హత్య చేసేందుకు పన్నిన కుట్రను సైబరాబాద్ పోలీసులు ఇటీవల ఛేదించారు. మహబూబ్నగర్ పట్టణానికే చెందిన ఏడుగురు కలిసి మంత్రిని హత్య చేసేందుకు కుట్ర పన్నినట్లు పోలీసుల దర్యాప్తులో తేలింది. ఈ మేరకు నిందితుల నుంచి 2 తుపాకులు, బుల్లెట్లు కూడా స్వాధీనం చేసుకున్నారు. ఈ నేపథ్యంలో మంత్రి శ్రీనివాస్ గౌడ్కు భద్రత పెంచుతూ నిర్ణయం తీసుకున్నారు.
కస్టడీకి నిందితులు
శ్రీనివాస్ గౌడ్ హత్యకు కుట్ర కేసులో ఏడుగురు నిందితులను మేడ్చల్ కోర్టు పోలీసు కస్టడీకి అనుమతించింది. పోలీసులు 10 రోజుల పాటు కస్టడీకి కోరగా.. కోర్టు నాలుగు రోజులకు అంగీకరించింది. రేపట్నుంచి 4 రోజుల పాటు పేట్ బషీరాబాద్ పోలీసులు నిందితులను విచారించనున్నారు. వీడియో రికార్డింగ్ మధ్య విచారణ జరగనుంది. కుట్ర కేసుపై వివిధ కోణాల్లో పోలీసులు విచారణ చేయనున్నారు.
వాటిపై ఆరా
మంత్రి హత్యకు కుట్రలో ఎవరెవరి పాత్ర ఉంది.. 15 కోట్ల రూపాయల సుపారీకి సంబంధించిన వివరాలు రాబట్టనున్నారు. హైదరాబాద్లో జరిగిన ఓ హత్యాయత్నం ఘటనతో మంత్రి శ్రీనివాస్గౌడ్ హత్యకు.. కుట్ర వివరాలు బయటపడ్డాయి. సుచిత్ర కూడలిలో ఫరూఖ్‌, హైదర్‌ అలీ అనే వ్యక్తులపై ఫిబ్రవరి 25న హత్యాయత్నం జరిగింది. ఈ కేసులో నిందితులు యాదయ్య, నాగరాజు, విశ్వనాథ్‌లను అరెస్టు చేసి.. హత్యాయత్నంపై ప్రశ్నిస్తున్న క్రమంలో కుట్ర కోణం బయటపడింది.
ఇదీ చదవండి: అడవుల్లో ఆయుధాలు.. మంత్రి హత్య కుట్ర కేసులో విస్తుగొలిపే అంశాలు
మంత్రి స్పందన
హైదరాబాద్లో మహిళా దినోత్సవ వేడుకల్లో పాల్గొన్న మంత్రి శ్రీనివాస్.. హత్యకు కుట్ర కేసుపై స్పందించారు. ఆ కేసు కోర్టులో పరిధిలో ఉన్నందున ఎలాంటి వ్యాఖ్యలు చేయనని తెలిపారు. దేశంలోనే తెలంగాణ పోలీసులకు మంచి పేరు ఉందని గుర్తుచేసిన ఆయన.. పలు కీలక కేసులను పరిష్కరించిన సత్తా మన పోలీసులకు ఉందని స్పష్టం చేశారు.
ఇదీ చదవండి: Bhatti on assembly sessions: సభాపతికి నిబంధనలు తెలియకపోవడం దురదృష్టకరం: భట్టి
