Reliance GET 2024 : ప్రముఖ వ్యాపార సంస్థ రిలయన్స్ ఇండస్ట్రీస్ ఇంజినీరింగ్ విద్యార్థులకు శుభవార్త చెప్పింది. దేశవ్యాప్తంగా ట్యాలెంట్ను ఒడిసిపట్టడం కోసం 'గ్రాడ్యుయేట్ ఇంజినీరింగ్ ట్రెయినీ- జీఈటీ 2024' అనే రిక్రూట్మెంట్ కార్యక్రమాన్ని ప్రారంభించింది. ఈ మేరకు రిలయన్స్ ఓ ప్రకటన విడుదల చేసింది. అందులో, దేశ నలు మూలల నుంచి, ముఖ్యంగా చిన్న పట్టణాలు, ప్రాంతీయ విద్యా సంస్థల నుంచి వచ్చిన యువ ఇంజినీర్లకు ప్రంపంచ స్థాయి శిక్షణ, ఉపాధి అవకాశాలు విస్తరించడానికే ఈ కార్యక్రమం రూపొందించామని వెల్లడించింది. అయితే ఈ కార్యక్రమం ద్వారా మొదటి సారి దరఖాస్తు ప్రక్రియను ఆన్లైన్లోకి మార్చింది. దేశంలో ప్రతి యువ ఇంజినీరింగ్ విద్యార్థికి సమాన అవకాశాలు అందించాలనే లక్ష్యంతో దరఖాస్తు ప్రక్రియలో ఈ మార్పు చేసినట్లు తెలిపింది.
భారత దేశంలో అసలైన ప్రతిభ, చిన్నపట్టణాలు, ప్రాంతీయ విద్యాసంస్థల్లో ఉందని భారత అంతరిక్ష పరిశోధన సంస్థ- ఇస్రో ఛైర్మన్ డాక్టర్ ఎస్ సోమనాథ్ ఇటీవల అన్నారు. ఆయన భావాలను అనుగుణంగా ఈ కార్యక్రమాన్ని రూపొందించినట్లు సంస్థ తెలిపింది. ఈ 'జీఈటీ 2024' కార్యక్రమం ద్వారా కెమికల్, ఎలక్ట్రికల్, మెకానికల్, ఇన్స్ట్రుమెంటేషన్ సబ్జెక్టుల్లో ఏఐసీటీఈ గుర్తింపు పొందిన విద్యా సంస్థల నుంచి బీటెక్, బీఈ పూర్తి చేసిన యువ ఇంజీనర్లను రిలయన్స్ దరఖాస్తులను ఆహ్వానిస్తోంది. దీని కోసం రిలయన్స్ సంస్థ ప్రత్యేక వెబ్సైట్ (https://relianceget2024.in/) ను ప్రారంభించింది. అందులో జీఈటీ 2024 ప్రోగ్రామ్కు సంబంధించిన అర్హత, దరఖాస్తు ప్రక్రియ గురించిన వివరాలను ఉంచింది.
ఈ జీఈటీ 2024 రిక్రూట్మెంట్ డ్రైవ్ నాలుగు దశల్లో ఉంటుంది. రిజిస్ట్రేషన్ ప్రక్రియ జనవరి 11 నుంచి జనవరి 19 వరకు ఉంటుంది. ఫిబ్రవరి 5 నుంచి ఫిబ్రవరి 8 వరకు దరఖాస్తులను పరిశీలిస్తారు. ఫిబ్రవరి 23 నుంచి మార్చి 1 వరకు వ్యక్తిగత ఇంటర్వ్యూలు ఉంటాయి. తుది ఫలితాలను మార్చి చివరి వారంలో ప్రకటిస్తారు.
ఈ కార్యక్రమం ద్వారా ఎంపిక చేసిన ట్రైనీలను, రిలయన్స్ ప్రాజెక్ట్ మేనేజ్‌మెంట్ గ్రూప్ (ఆర్పీఎమ్జీ), పెట్రోకెమికల్స్, ప్రొక్యూర్‌మెంట్ & కాంట్రాక్టింగ్, రిలయన్స్ న్యూ ఎనర్జీతో సహా వివిధ విభాగాల్లో చేర్చాలని రిలయన్స్ యోచిస్తోంది.
వరల్డ్ టాప్ 10 కంపెనీల్లో రిలయన్స్- ముకేశ్ అంబానీ తగ్గేదేలే!
