Raksha Bandhan Gift Ideas : అన్నా-చెల్లెళ్లు, అక్కా-తమ్ముళ్ల అనుబంధానికి ప్రతీక రక్షా బంధన్ (రాఖీ పండుగ). భారతదేశంలో ఈ పండుగకు ఒక ప్రత్యేకమైన స్థానం ఉంది. ఈ రోజున అక్కచెల్లెళ్లు.. తమ అన్నదమ్ములకు ప్రేమతో రాఖీని కడతారు. ప్రతిఫలంగా వాళ్లకు అన్నదమ్ములు ప్రత్యేకమైన కానుకలు ఇస్తారు. అవి డబ్బులు కావచ్చు.. లేదా స్మార్ట్ఫోన్లు, కాస్మోటిక్స్, కొత్త దుస్తులు ఇలా ఏమైనా కావచ్చు. అయితే ఇవి ఎప్పుడూ ఇచ్చే బహుమతులే. కానీ ఈసారి ఓ సరికొత్త గిఫ్ట్ ఇచ్చే ప్రయత్నం చేయండి. మీ సోదరీమణుల భవిష్యత్ కోసం, వారి ఆర్థిక భద్రత కోసం కొన్ని ప్రత్యేకమైన ఏర్పాట్లు చేయండి. ముఖ్యంగా ఇక్కడ చెప్పిన ఫైనాన్సియల్ గిఫ్ట్స్ ఇచ్చే ప్రయత్నం చేయండి.
Best Gift Ideas Raksha Bandhan
1. క్రమబద్ధమైన పెట్టుబడి ప్రణాళిక (సిప్)
Systematic Investment Plan (SIP) : మ్యూచువల్ ఫండ్స్లో క్రమం తప్పకుండా పెట్టుబడి పెట్టడం వల్ల భవిష్యత్లో ఒక మంచి కార్పస్ (ఆర్థిక నిధి) ఏర్పడుతుంది. ఇది మీ సోదరి ఆర్థిక భవిష్యత్కు ఎంతో తోడ్పడుతుంది. అందుకే ఇప్పటి నుంచే మీ సోదరి పేరు మీద ఒక మంచి మ్యూచువల్ ఫండ్ను తీసుకొని, సిప్ను ప్రారంభించండి.
2. ఆరోగ్య బీమా పాలసీ
Health Insurance Policy : నేటి కాలంలో ప్రతి ఒక్కరికీ కచ్చితంగా ఆరోగ్య బీమా, జీవిత బీమా ఉండి తీరాల్సిందే. అందుకే మీ సోదరికి అత్యవసర పరిస్థితుల్లో ఉపయోగపడే విధంగా ఇప్పుడే.. ఆమె పేరు మీద మంచి హెల్త్ ఇన్సూరెన్స్ పాలసీ తీసుకోవడం ఉత్తమం.
3. బ్యాంక్ సేవింగ్స్ అకౌంట్
Bank Savings Account : భవిష్యత్ బంగారుమయంగా ఉండాలంటే.. పొదుపు, మదుపు తప్పనిసరి. వాస్తవానికి ఇవి ఎంత తొందరగా ప్రారంభిస్తే అంత మంచిది. అందుకే మీరు మీ సోదరీమణుల పేరు మీద బ్యాంక్ సేవింగ్ అకౌంట్ లేదా పోస్ట్ ఆఫీస్ సేవింగ్స్ అకౌంట్ ఓపెన్ చేయడం మంచిది.
4. డీమ్యాట్ అకౌంట్
Demat Account : రోజురోజుకూ పెరిగిపోతున్న ద్రవ్యోల్బణానికి అనుగుణంగా మన రాబడి కూడా పెరగాల్సి ఉంటుంది. ఇందుకోసం కేవలం పొదుపు చేస్తే సరిపోదు. వీలైనంత త్వరగా మదుపు చేయడం ప్రారంభించాలి. అందుకే మీ అక్క లేదా చెల్లెలు పేరు మీద డీమ్యాట్ అకౌంట్ ఓపెన్ చేయండి. ఆర్థిక నిపుణుల సలహాలు తీసుకుని, మంచి క్వాలిటీ స్టాక్స్లో దీర్ఘకాలంపాటు పెట్టుబడి కొనసాగించేలా వారిని ప్రోత్సహించండి. ఇది వారి భవిష్యత్కు బాగా ఉపయోగపడుతుంది.
నోట్ : స్టాక్ మార్కెట్ ఇన్వెస్ట్మెంట్స్ బాగా రిస్క్తో కూడుకున్నవి. కనుక ఆర్థిక నిపుణుల సలహాలు తప్పనిసరి.
5. డిజిటల్ గోల్డ్ :
Digital Gold : రాఖీ పండగ పూట సోదరులు.. తమ అక్కచెల్లెళ్లకు బంగారు ఆభరణాలు బహుమతిగా ఇవ్వడం మామూలే. కానీ నేటి కాలంలో డిజిటల్ గోల్డ్ను కూడా గిఫ్ట్గా ఇచ్చే అవకాశం ఉంది. అందుకే మీరు దీనిని కూడా ప్రయత్నించవచ్చు.
6. గోల్డ్ ఈటీఎఫ్లు
Gold ETFs : అన్నదమ్ములు.. తమ సిస్టర్స్ పేరు మీద ఈటీఎఫ్ లేదా గోల్డ్ సేవింగ్స్ ఖాతాల ద్వారా పేపర్ గోల్డ్లోనూ పెట్టుబడి పెట్టవచ్చు.
7. డెట్ ఇన్స్ట్రుమెంట్స్
Debt Instruments : డెట్ ఫండ్స్లో.. లిక్విడిటీ, భద్రత, క్రమమైన ఆదాయం లభిస్తాయి. ముఖ్యంగా డెట్ పథకాల్లోని పెట్టుబడులకు రిస్క్ కాస్త తక్కువ. అందుకే డెట్ పథకాలైన.. గ్రీన్ ఫిక్స్డ్ డిపాజిట్స్ (ఎఫ్డీ) లేదా రికరింగ్ డిపాజిట్స్లో.. మీ సోదరీమణుల పేరు మీద ఇన్వెస్ట్ చేయడం మంచిది.
8. 'రియల్' కానుకలు :
మీ అక్కచెల్లెళ్లకు.. ఇళ్లు, స్థలాలు, పొలాలు లాంటి బహుమతులు కూడా ఇవ్వవచ్చు. ఇవి కూడా వారికి ఆర్థిక భద్రతను, ఆర్థిక స్వాతంత్ర్యాన్ని కల్పిస్తాయి.
రక్షా బంధన్ (రాఖీ పండుగ) ఎప్పుడు?
2023 సంవత్సరంలో రాఖీ పండుగ తేదీ గురించి చిన్న కన్ప్యూజన్ ఉంది. ఆగస్టు 30న రాఖీ పండుగ అని కొందరు.. లేదూ ఆగస్టు 31న రక్షా బంధన్ అని మరికొందరు అంటున్నారు. పండుగ ఎప్పుడైతే ఏమిటి? అన్నాచెల్లెళ్లు, అక్కాతమ్ముళ్ల అనుబంధానికి ప్రతీకగా రెండు రోజుల్లోనూ రాఖీ పండుగను హాయిగా జరుపుకోండి.
