cars safety rating India: దేశంలో జరుగుతున్న రోడ్డు ప్రమాదాలను తగ్గించడమే లక్ష్యంగా కేంద్ర ప్రభుత్వం పటిష్ఠ చర్యలు తీసుకుంటోంది. ఇందులో భాగంగా కొత్త కార్లకు అసెస్మెంట్ ప్రోగ్రామ్ను (భారత్ ఎన్సీఏపీ) ప్రవేశపెట్టనున్నట్లు కేంద్ర రోడ్డు రవాణా, జాతీయ రహదారుల మంత్రి నితిన్ గడ్కరీ వెల్లడించారు. క్రాష్ టెస్ట్ ఫలితాల ఆధారంగా 'స్టార్ రేటింగ్స్' ఇచ్చే వ్యవస్థను తీసుకురానున్నట్లు తెలిపారు. ఈ విధానం పూర్తిగా వినియోగదారుడి కేంద్రంగా పనిచేస్తుందని పేర్కొన్నారు. దీని ద్వారా ఇచ్చే రేటింగ్స్తో వినియోగదారుడు.. తనకు నచ్చిన భద్రత గల కార్లను కొనుగోలు చేసే వీలు ఉంటుందన్నారు. దీంతో తయారీదారుల(ఓఈఎమ్) మధ్య స్నేహపూర్వక పోటీ పెరుగుతుందని.. భారత్లో భద్రత గల వాహనాల తయారవుతాయని ఆయన ఆశాభావం వ్యక్తం చేశారు. ఈ విధానంలో 1 నుంచి 5 వరకు రేటింగ్స్ ఇవ్వనున్నట్లు వివరించారు.
ప్రస్తుతం దేశంలో అమల్లో ఉన్న నిబంధనలతో పాటు అంతర్జాతీయ నియమాల మేరకు క్రాష్ టెస్టులు నిర్వహిస్తామని గడ్కరీ చెప్పారు. స్టార్ రేటింగ్స్ ఇవ్వడంలో క్రాష్ టెస్టులు ఫలితాలు ముఖ్యమని.. ఈ విధానంతో కార్ల నాణ్యత, ప్రయాణికుల భద్రతతో పాటు భారత వాహనాల ఎగుమతులు పెరుగుతాయన్నారు. ఉత్పత్తిదారులు తమ సొంత తయారీ కేంద్రాల్లోనే పరీక్షించుకునే సదుపాయం సైతం కల్పిస్తామని తెలిపారు. ఈ విధానం ఆటోమొబైల్ రంగంలో మేక్ ఇన్ ఇండియా, ఆత్మనిర్భర్ భారత్ కీలక పాత్ర పోషిస్తుందని.. ప్రపంచంలోనే భారత్ ఆటోమొబైల్ హబ్గా మారుతుందని ధీమా వ్యక్తం చేశారు. భద్రతగల కార్లు తయారు చేసే ఈ ప్రక్రియలో ఉత్పత్తిదారులు స్వచ్ఛందంగా పాల్గొనేలా ప్రోత్సహిస్తుందన్నారు గడ్కరీ.
2020లో 3,66,138 ప్రమాదాలు జరగగా.. సుమారు 1,31,714 మంది మరణించారు. 2024 నాటికి రోడ్డు ప్రమాదాల శాతాన్ని 50 శాతానికి తగ్గించడమే లక్ష్యంగా పెట్టుకున్నట్లు గడ్కరీ చెప్పారు.
ఇదీ చదవండి: టర్మ్‌ పాలసీ తీసుకుంటున్నారా? అయితే ఈ ప్రయోజనాల గురించి తెలుసుకోండి!
