ప్రేమ ఎంత మధురం.. ప్రియురాలు అంత కఠినం అన్నాడో సినీ కవి. ఆ తర్వాత ఒక్కసారి ప్రేమించు చూడు అన్నాడు మరో కవి...వెంటనే వద్దురా సోదరా పెళ్లంటే నూరేళ్ల మంటరా అన్నాడు ఇంకో కవి...సినీ రచయితల ప్రతీ పాటకు సమాజం ప్రభావితమవుతోంది...ప్రేమ అనే పరీక్ష రాయడం.. ఫెయిల్ అవ్వడం లేదా పాసవడం...అంతటితో ఆగకుండా సినీకవి చెప్పిన మాటలను విని...సంసార సాగరాన్ని ఈదడం కన్నా ఒంటరిగా మిగలడమే మిన్నా అనే అభిప్రాయానికి వచ్చేస్తున్నారు...నేటి తరం యువత.
సృష్టిలో రెండక్షరాల ప్రేమకు ఉన్న విలువ అంతా ఇంతా కాదు. కానీ మారుతున్న కాలం, పెరుగుతున్న పాశ్చాత్య పోకడల వల్ల ఆ పదాలకు అర్థాలు మారిపోతున్నాయి. సినిమాలు సైతం ప్రేమ మత్తును సమాజంపై బాగానే వెదజల్లుతున్నాయి. ఇదంతా నాణానికి ఒకవైపే. లోతుగా పరిశీలించి చూస్తే మరో కోణం కన్పిస్తుంది. అదే ఏక్ నిరంజన్.
'ఏక్ నిరంజన్' అంటే ప్రభాస్ సినిమా అనుకునేరు... కానే కాదు...ఇప్పుడు కొంతమంది యువతలో కనిపిస్తున్న కొత్త కోణం.. ప్రేమిస్తారట... ప్రేమిస్తూనే ఉంటారట... కానీ పెళ్లికి మాత్రం ససేమిరా అంటున్నారు. కొంత మంది అమ్మనాన్నలకు, తోబుట్టువులకే మా ప్రేమ అంకితం అంటుంటే.. మరికొంత మంది ప్రేయసికీ స్థానం ఉంది.. కానీ ఆ ప్రేయసిని అర్థాంగి మాత్రం చేసుకోం అంటున్నారు. అలాంటి వాళ్లే సహజీవనానికి సై అంటున్నారు.
ఈ విపరీత పోకడలకు మానసిక పరిస్థితులే కారణమంటున్నారు వైద్యులు. పెళ్లి, పిల్లలు అనే బంధాల వల్ల వచ్చే బాధ్యతను మోయలేని భారంగా భావిస్తున్న యువతీ, యువకులు ఇలాంటి నిర్ణయాలు తీసుకుంటున్నారు. ప్రేమ మాత్రమే... పెళ్లి వద్దు అనే పోకడలు కేవలం యువకులకు మాత్రమే కాదు యువతుల్లో సైతం పెరుగుతోంది.
