ఇంట్లోని పనికిరాని వస్తువులతో ఓ రోబోను తయారుచేశాడు బంగాల్కు చెందిన దేబాశిష్ దత్తా అనే యువకుడు. ఇంటికి వచ్చిన అతిథులకు ఆహారం, నీళ్లు అందించడం సహా వివిధ పనులు చేసిపెట్టేలా ఆ మరమనిషిని తీర్చిదిద్దాడు. అవార్డు ఫంక్షన్లలో పురస్కారాలు సైతం ఇది ప్రదానం చేస్తుందని అతడు చెబుతున్నాడు.
దేబాశిష్ దత్తా.. సిలిగుడికిలో బాగ్డోగ్రా ప్రాంతంలో నివాసం ఉంటున్నాడు. నగరంలోని పాలిటెక్నిక్ కళాశాలలో రెండో ఏడాది చదువుతున్న దేబాశిష్కు రోబోలంటే చాలా ఇష్టం. వాటిని తయారుచేయాలని కలల కనేవాడు. కానీ, వాటిని తయారు చేసేంత ఆర్థిక స్తోమత లేదు. అయినా పట్టువిడవకుండా ఇంట్లో పనికిరాని వస్తువులతో.. రెండు నెలలు శ్రమించి ఓ రోబోను తయారుచేశాడు. సీ-ప్రోగ్రామింగ్ సహాయంతో.. కోడింగ్ చేశాడు. రోబోకు 'బిధు శేఖర్' అని పేరు పెట్టాడు. ఆ మరమనిషిని తయారు చేయడానికి 2వేల రూపాయలు మాత్రమే ఖర్చు అయిందని చెప్పాడు దేబాశిష్.
ఈ రోబోకు నాలుగు చక్రాలు అమర్చి.. బ్లూటూత్తో అనుసంధానం చేశాడు దేబాశిష్. రోబోను నియంత్రించడానికి రిమోట్ యాప్ను రూపొందించాడు. మొబైల్ ఫోన్లోని ఆ యాప్ ద్వారా రోబోను కదిలించవచ్చు. ఇంట్లోకి ఎవరైనా అతిథులు వస్తే.. వారికి టీ, టిఫిన్లు అందించడానికి రోబోను ఉపయోగించుకోవచ్చని దేబాశిష్ చెబుతున్నాడు. ఈ చిన్ని రోబో మన బదులు అటూ ఇటూ తిరుగుతూ పనులన్నీ చేసేస్తుందని అంటున్నాడు. ఏదైనా ఈవెంట్లలో అవార్డులు కూడా అందిస్తుందని తెలిపాడు.
భవిష్యత్తులో ఆర్టిఫిషియల్ ఇంటెలిజెన్స్ను ఉపయోగించి ఇంకా మెరుగైన రోబోను తయారుచేయాలనేది తన కోరికని చెబుతున్నాడు దేబాశిష్. ఆ రోబ్కు కెమెరా అమర్చి.. అడ్డంకులు గుర్తించేలా చేయాలనుకుంటున్నట్లు తెలిపాడు. వివిధ పనులను సులభంగా చేయగల.. నాణ్యమైన రోబోలను రూపొందించే వ్యాపారం చేయాలనే ఆసక్తితో ఉన్నట్లు చెప్పాడు.
మురికి వాడల వాళ్ల వ్యథలు చూడలేక..
ముంబయి మురికివాడల నుంచి వచ్చి.. వ్యాపారం చేసి ఉన్నత స్థాయికి ఎదిగాడు ఉదయ్ పవార్ అనే వ్యక్తి. కానీ, తాను గతంలో నివసించిన మురికివాడల యువకులు చెడు అలవాట్లకు బానిసై నేరగాళ్లలా ఉన్నారు. వీటన్నింటికీ నిరుద్యోగమే కారణమని.. యువతకు ఎలాగైనా ఉపాధి కల్పించాలని అనుకున్నారు ఉదయ్. ఆ ఆలోచననే ఆచరణలో పెట్టి.. తన స్నేహితుల సహాయంతో 'టింగ్ టాంగ్' అనే యాప్ను రూపొందించారు.
' మురికివాడల నుంచి వచ్చామంటే చాలా మంది హీనంగా చూస్తారు. కానీ, ఇలాంటి వాడల్లో నివసించే వాళ్లకు ఒక్కోరకమైన గుణాలు, నైపుణ్యాలు ఉంటాయి. అవి బయటవారికి కనిపించవు. ఆ నైపుణ్యాలతోనే ఉపాది పొందొచ్చు. ఇక్కడ ఉండే తండ్రులు, భార్యలు, చెల్లెళ్లు తమ వారికి ఏమైనా ఉద్యోగాలుంటే చూడండి అంటుంటారు. వారికి ఉద్యోగాలు ఇవ్వలేకపోయాను. కానీ, వారి కోసమే ఈ యాప్ రూపొందించాను. ఇక్కడున్న వారికి ప్లంబర్, ఎలెక్ట్రిషియన్ లాంటి పనులు వచ్చినా.. వారు ఈ యాప్లో రిజిస్ట్రేషన్ చేసుకోవచ్చు. రిజిస్ట్రేషన్ కోసం ఏడాదికి రూ.365 చెల్లించాల్సి ఉంటుంది. ఎవరికైనా ఏదైనా అవసరం అయితే.. వారు ఇందులో రిజిస్టర్ అయిన వాళ్లను సంప్రదిస్తారు. అలా పని సేవలను వినియోగదారులకు చేరతాయి. అయితే, ఇతర యాప్లాగా ఇందులో కమిషన్ ఉండదు' అని ఉదయ్ పవార్ వివరించారు.
