దేశంలో సంచలనం సృష్టించిన దిల్లీ కాల్సెంటర్ ఉద్యోగి శ్రద్ధా వాకర్ హత్య తరహా మరో దారుణమైన ఘటన ఉత్తర్ప్రదేశ్లో వెలుగుచూసింది. తనతో సహజీవనం చేస్తున్న యువతి గొంతు కోసి చంపేశాడు ఓ వ్యక్తి. ఘటన జరిగిన ఏడు నెలల తర్వాత పోలీసులు ఈ కేసు ఛేదించి నిందితుడిని అరెస్ట్ చేశారు.
పోలీసులు తెలిపిన వివరాల ప్రకారం.. గాజియాబాద్ జిల్లాలోని వసుంధర ప్రాంతానికి చెందిన ఓ వృద్ధురాలు.. ఈ నెల 18న పోలీసుల దగ్గరకు వెళ్లింది. తన 35 ఏళ్ల కుమార్తె కనిపించడం లేదని ఫిర్యాదు చేసింది. ఈ ఏడాది మే నెల నుంచి కనిపించడం లేదని చెప్పింది. దీంతో పోలీసులు దర్యాప్తు ప్రారంభించారు. వృద్ధురాలి కుమార్తె మొబైల్ ఫోన్ వివరాలను రాబట్టారు. అందులో రామన్ అనే యువకుడికి సంబంధించిన నంబర్‌ను పోలీసులు గుర్తించారు. అయితే రామన్ కూడా వసుంధరలోనే నివసిస్తున్నాడు. రామన్‌ను అదుపులోకి తీసుకున్న పోలీసులు తమదైన శైలిలో విచారించారు. అన్ని రకాల సమాచారాన్నిసేకరించారు. వీరిద్దరి చివరి లొకేషన్ హిమాచల్ ప్రదేశ్‌లోని కులులో ఉన్నట్లు గుర్తించారు. అప్పుడు నిందితుడు అసలు విషయాన్ని బయటపెట్టాడు. ఏడు నెలల క్రితం మే 18న ఆమెను కులు ప్రాంతానికి తీసుకెళ్లి ఆమెను కారులోనే గొంతు కోసి హత్య చేశానని ఒప్పుకున్నాడు. తనను పెళ్లి చేసుకోవాల్సిందిగా యువతి పదే పదే ఒత్తిడి చేస్తోందని.. పెళ్లి తనకు ఇష్టం లేదని నిందితుడు పోలీసులకు తెలిపాడు.
కొన్ని నెలల క్రితం బాధితురాలికి, రామన్ మధ్య పెద్ద గొడవ జరిగిందని ఆమె స్నేహితురాలు తెలిపింది. ఆ తర్వాత అతడిని వదిలించుకునేందుకు యువతి ప్రయత్నించిందని చెప్పింది. అందుకే ఆమెను రామన్ హత్య చేసి ఉంటాడని బాధితురాలి స్నేహితురాలు తెలిపింది. హత్య జరిగాక రామన్.. ప్రశాంతంగా ఉండేవాడని చెప్పింది.
శ్రద్ధ హత్య కేసుకు, ఈ కేసుకు చాలా పోలికలు ఉన్నాయి. ఈ ఘటన కూడా మే 18న పక్కా ప్లాన్తోనే జరిగింది. శ్రద్ధా హత్య కేసులో నిందితుడు ఆఫ్తాబ్ కూడా హిమాచల్‌లో హత్య చేయనప్పటికీ శ్రద్ధతో పాటు హిమాచల్‌కు వెళ్లాడు. శ్రద్ధ, ఆఫ్తాబ్ కూడా సహజీవనం చేశారు.
పాతిపెట్టిన మృతదేహం మాయం!
మధ్యప్రదేశ్లోని రేవా జిల్లాలో ఖననం చేసిన మృతదేహం మాయమవ్వడం స్థానికంగా కలకలం రేపింది. ఉమారియా జిల్లాకు చెందిన కవితా వాధ్వాని అనే మహిళ డిసెంబర్ 16న తప్పిపోయింది. దీంతో ఆమె కుటుంబసభ్యులు పోలీసులకు ఫిర్యాదు చేశారు. అయితే డిసెంబర్ 18న డబౌరా రైల్వే స్టేషన్లో రైలు ఢీకొని ఓ మహిళ మృతి చెందింది. సమాచారం అందుకున్న పోలీసులు ఘటనాస్థలానికి చేరుకుని మృతదేహాన్ని పోస్టుమార్టం నిమిత్తం ఆస్పత్రికి తరలించారు. తర్వాత ఆ మృతదేహాన్ని అటవీ ప్రాంతంలో అధికారులు ఖననం చేశారు.
అయితే రైల్వే స్టేషన్లో చనిపోయింది కవితనేనని గుర్తించిన ఆమె కుటుంబసభ్యులు.. పోలీసులను ఆశ్రయించారు. పోలీసులు వారిని తీసుకుని ఖననం చేసిన ప్రదేశానికి తీసుకెళ్లారు. తీరా తవ్విచూడగా అందులో మృతదేహం లేదు. దీంతో ఒక్కసారిగా అధికారులు షాకయ్యారు. ప్రస్తుతం మహిళ మృతదేహం కోసం వెతుకుతున్నారు. కానీ, మృతురాలి బంధువులు వేరే విధంగా ఆరోపిస్తున్నారు. మృతదేహాన్ని పోలీసులు ఖననం చేయకుండా.. ఎక్కడో విసిరేశారని ఆరోపణలు చేస్తున్నారు.
మూడు రోజుల్లో ముగ్గురు పిల్లలు మృతి.. ఏం జరిగింది?
మధ్యప్రదేశ్లోని కైలారస్ జిల్లా.. భిల్సయ్య గ్రామంలో భయాందోళన వాతావరణం నెలకొంది. కల్యాణ్ సింగ్ అనే వ్యక్తి ఇంట్లో మూడు రోజుల వ్యవధిలో ముగ్గురు పిల్లలు మృతి చెందారు. వారి మరణానికి అనారోగ్యమే కారణమని వైద్యులు చెబుతున్నప్పటికీ.. బంధువులు మాత్రం వేరేవిధంగా చెబుతున్నారు. తమ ఇంట్లో దెయ్యాలు తిరుగుతున్నాయని అందుకే వారు మరణించారని అంటున్నారు. అయితే ముగ్గురు పిల్లల మరణం తర్వాత వారి తల్లి ఆరోగ్యం కూడా క్షీణించింది.
