Delhi Airport crowd: ఓవైపు ఒమిక్రాన్ భయాలతో మళ్లీ రక్షణ కవచాలవైపు చూస్తున్న తరుణంలో దిల్లీలోని ఇందిరాగాంధీ అంతర్జాతీయ విమానాశ్రయం ఇసుక వేస్తే రాలనంత జనంతో కిక్కిరిసిపోయింది. కరోనా కొత్త వేరియంట్ నేపథ్యంలో విదేశీ ప్రయాణికులకు కఠిన నిబంధనలు తీసుకొచ్చింది కేంద్రం. దీంతో ఎయిర్పోర్ట్లో రద్దీ పెరుగుతోంది. దాని ఫలితంగా కొవిడ్ నిబంధనలు గాలికొదిలేసే పరిస్థితులు తలెత్తుతున్నాయి.
గంటల తరబడి అక్కడే..
విదేశాల నుంచి ముఖ్యంగా ఒమిక్రాన్ ప్రభావిత దేశాల నుంచి వచ్చే ప్రయాణికులకు విమానాశ్రయాల్లో కరోనా పరీక్షలు తప్పనిసరి చేసింది కేంద్రం. దీంతో పరీక్షలు చేయించుకుని ఫలితం వచ్చే వరకు గంటల తరబడి వేచి చూడాల్సి వస్తోంది. దిల్లీ ఎయిర్పోర్ట్లో రెండు రకాల పరీక్షలు చేస్తున్నారు. ఒకటి.. సాధారణ ఆర్టీపీసీఆర్ పరీక్ష. దీనికి రూ.500 వసూలు చేస్తుండగా.. ఈ పరీక్ష ఫలితం కోసం 6-8 గంటలు ఎదురుచూడాల్సి వస్తోంది. రెండోది.. ర్యాపిడ్ పీసీఆర్ టెస్ట్. దీనికి రూ.3,500 వసూలు చేస్తుండగా.. రెండు గంటల్లో ఫలితం వస్తుంది. ఆర్టీపీసీఆర్ ఫలితానికి సమయం ఎక్కువ పడుతున్న క్రమంలో ప్రయాణికులు ర్యాపిడ్ టెస్టులకే మొగ్గు చూపుతున్నారు. పరీక్ష ఫలితాల కోసం ఇమ్మిగ్రేషన్ డెస్క్ల వద్ద రద్దీ ఎక్కువగానే ఉంటోంది.
దిల్లీ విమానాశ్రయంలోని పరిస్థితులను కొందరు ఫొటోలు తీసి సామాజిక మాధ్యమాల్లో పంచుకోగా వైరల్గా మారాయి. కరోనా నిబంధనలు కాదు.. ఎయిర్పోర్ట్లే హాట్స్పాట్లుగా మారుతున్నాయని ఆవేదన వ్యక్తం చేశారు.
120 ర్యాపిడ్ పీసీఆర్ టెస్టింగ్ యంత్రాల ఏర్పాటు
ఒమిక్రాన్ వేరియంట్ భయాలతో ఎట్ రిస్క్ దేశాల నుంచి భారత్కు వస్తున్న ప్రయాణికుల సంఖ్య భారీగా పెరిగింది. ఈ క్రమంలో రద్దీని తగ్గించేందుకు దిల్లీ అంతర్జాతీయ విమానాశ్రయం పరీక్ష కేంద్రాల సామర్థ్యాన్ని పెంచింది. 20 కౌంటర్లతో పాటు 120 ర్యాపిడ్ పీసీఆర్ టెస్టింగ్ యంత్రాలను అందుబాటులోకి తీసుకొచ్చింది. గంటకు 500-600 పరీక్షల సామర్థ్యం ఉంటుందని తెలిపారు అధికారులు. అలాగే గంటకు 500 ఆర్టీపీసీఆర్ పరీక్షలు నిర్వహిస్తున్నామని చెప్పారు.
'ఎట్ రిస్క్ దేశాల నుంచి వచ్చే ప్రయాణికుల స్క్రీనింగ్, టెస్టింగ్ సౌకర్యాలను ఎప్పటికప్పుడు పెంచుతున్నాం. ప్రతిరోజు కొవిడ్ టెస్టు కోసం ముందే బుక్ చేసుకుంటున్న ప్రయాణికుల సంఖ్య పెరుగుతోంది. సాధారణ ఆర్టీపీసీఆర్తో పోలిస్తే ర్యాపిడ్ పీసీఆర్ కోసం చూస్తున్న వారి సంఖ్య గణనీయంగా పెరిగింది. దీనిని దృష్టిలో పెట్టుకుని 120 ర్యాపిడ్ పీసీఆర్ టెస్ట్ మిషన్స్ని ఏర్పాటు చేశాం.' అని పేర్కొన్నారు డయల్ సీఈఓ విదేశ్ కుమార్ జైపురియార్.
రద్దీపై సింధియా ఆదేశాలు..
విదేశీ ప్రయాణికులు గణనీయంగా పెరిగిన క్రమంలో సరైన రద్దీ నిర్వహణ వ్యూహాలను అనుసరించాలని దిల్లీ ఎయిర్పోర్ట్ ఆపరేటర్ డయల్ను ఆదేశించారు పౌర విమానయాన శాఖ మంత్రి జోతిరాదిత్య సింధియా. కొత్త మార్గదర్శకాల నేపథ్యంలో దిల్లీ ఎయిర్పోర్ట్లో గందరగోళ పరిస్థితులు నెలకొంటున్నాయని ప్రయాణికుల నుంచి ఫిర్యాదులు అందిన నేపథ్యంలో ఈ మేరకు ఆదేశించారు.
ఎయిర్పోర్ట్స్ అథారిటీ ఆఫ్ ఇండియా, ఇమ్మిగ్రేషన్, జీఎంఆర్ నేతృత్వంలోని దిల్లీ అంతర్జాతీయ విమానాశ్రయ సంస్థ (డయల్) అధికారులతో సోమవారం సమావేశమయ్యారు కేంద్ర మంత్రి. ఈ సమావేశంలో జెనస్ట్రింగ్స్ డయగ్నోస్టిక్స్, సోల్ లాబొరెటరీస్ అధికారులు సైతం పాల్గొన్నారు.
ఇదీ చూడండి: Omicron in India: దేశంలో 24కు చేరిన ఒమిక్రాన్ కేసులు
