దేశవ్యాప్తంగా గణేశ్ నవరాత్రుల వేడుకలు ఘనంగా జరుగుతున్నాయి. బొజ్జ గణపయ్యకు భక్తులు పూజలు చేస్తూ తరిస్తున్నారు. తొమ్మిది రోజులు పూజలు చేసిన తర్వాత గజాననుడిని నీటిలో నిమజ్జనం చేస్తారు. అయితే బిహార్ నలందలోని ఓ వినాయకుడు మాత్రం ఏడాదిలో 355 రోజులు పోలీస్ స్టేషన్లోనే ఉంటాడు. 10 రోజులు మాత్రమే భక్తులకు కనిపిస్తాడు. ఈ పది రోజులు భక్తులు వైభవంగా వినాయక చవితి వేడుకలు నిర్వహిస్తారు. ఎందుకు ఇంతలా ఈ విగ్రహానికి భద్రత కల్పిస్తున్నారు? ఈ విగ్రహంలో ఏముందని ఆలయ పూజారి గోవింద్ రామ్ను ఆరా తీయగా.. అసలు విషయాలు చెప్పారు.
ఈ గణేశ్ విగ్రహం 150 ఏళ్ల పురాతనమైనదని పూజారి గోవింద్ రామ్ తెలిపారు. అందుకే ప్రత్యేక జాగ్రత్తలు తీసుకుంటున్నట్లు వెల్లడించారు. పాలరాయితో తయారు చేసిన ఈ విఘ్నేశ్వరుడి విగ్రహాన్ని.. దొంగల కంట పడకుండా ఉంచేందుకే ఇలా చేస్తున్నట్లు వివరించారు. పోలీస్ స్టేషన్ ఆవరణలో ఉన్న మందిరంలో వినాయకుడిని ఉంచుతున్నట్లు చెప్పారు.
"ఈ విగ్రహాన్ని పాలరాతితో తయాారు చేశారు. కొన్నాళ్ల క్రితం పూజల కోసం బయటకు తెచ్చారు. కానీ విగ్రహాన్ని దొంగిలించేందుకు దొంగలు పలుమార్లు ప్రయత్నించారు. ఓ సారి ఎత్తుకెళ్లిపోయారు. స్థానికులు వారిని పట్టుకుని విగ్రహాన్ని స్వాధీనం చేసుకున్నారు. అందుకే విగ్రహాన్ని భద్రత కోసం సిలావ్ పోలీస్ స్టేషన్ ఆవరణలోని దేవాలయంలో ఉంచుతాం. వినాయక చవితి సమయంలో 10 రోజులు బయటకు తెచ్చి ఘనంగా వేడుకలు నిర్వహిస్తాం. ఆ తర్వాత పోలీస్ స్టేషన్ ఆవరణలోని దేవాలయంలో విగ్రహాన్ని పెట్టేస్తాం."
--బాల గోవింద్ రామ్, ఆలయ పూజారి
ఇవీ చదవండి: కడియాల కోసం దారుణం.. వృద్ధురాలి కాలు నరికి పరార్.. స్కూల్లో దళితులపై కులవివక్ష
