దేశవ్యాప్తంగా కరోనా మృతుల సంఖ్య రోజురోజుకూ పెరుగుతోంది. కేంద్ర ఆరోగ్యశాఖ తాజా గణాంకాల ప్రకారం దేశంలో కొవిడ్-19 మరణాలు 25కు చేరాయి. శనివారం 19 మంది మరణించగా.. తాజాగా మరో ఆరుగురు మృతి చెందినట్లు తెలుస్తోంది. ప్రస్తుతం దేశంలో 867 కరోనా యాక్టివ్ కేసులున్నాయి. మరో 86 మంది ఈ మహమ్మారి బారిన పడి కోలుకున్నారు.
గుజరాత్లో 5కు చేరిన మృతులు
అహ్మదాబాద్లో 45 ఏళ్ల వ్యక్తి వైరస్ కారణంగా ఇవాళ మృతి చెందినట్లు గుజరాత్ వైద్య మంత్రిత్వశాఖ ప్రకటించింది. అయితే అతను ఎప్పటి నుంచో మధుమేహం వ్యాధితో బాధపడుతున్నట్లు చెప్పింది.
తాజా మరణంతో గుజరాత్లో కరోనా మృతుల సంఖ్య 5కు పెరిగింది. కరోనా సోకిన వారి సంఖ్య 55గా ఉంది.
కశ్మీర్లో 2కు చేరిన మృతులు
జమ్ముకశ్మీర్ బారాముల్లాలో కరోనా కారణంగా మరో వ్యక్తి మృతిచెందాడు. ఫలితంగా రాష్ట్రంలో ఈ మహమ్మారి బారిన పడి మరణించిన వారి సంఖ్య రెండుకు చేరింది. జమ్ముకశ్మీర్లో ప్రస్తుతం 20 మంది కరోనాతో బాధపడుతున్నారు.
మహారాష్ట్రలో మరో 12 మందికి కరోనా
మహారాష్ట్రలో మరో 12 మందికి కరోనా సోకినట్లు అధికారులు వెల్లడించారు. ఇందులో పుణె-5, ముంబయి-4, సింగ్లి, జల్గావ్, నాగ్పుర్లో ఒక్కో కేసు నమోదయ్యాయి. ఫలితంగా రాష్ట్రంలో కొవిడ్-19 బారినపడ్డవారి సంఖ్య 193కు చేరింది.
మధ్యప్రదేశ్లో మరో 5
మధ్యప్రదేశ్లో మరో ఐదుగురికి కరోనా సోకినట్లు నిర్ధరణ అయింది. వీరిలో ఒకరు ఉజ్జయినికి చెందిన 17 ఏళ్ల బాలిక. మిగిలిన నలుగురు 21, 28, 40, 48 ఏళ్ల వయసున్న పురుషులు. వీరంతా ఇండోర్ వాసులే.
కొత్త కేసులతో కలిపి మధ్యప్రదేశ్లో కరోనా సోకిన వారి సంఖ్య 39కి చేరింది.
నర్సు.. నువ్వు వెళ్లిపో
ఛత్తీస్గఢ్ బిలాస్పుర్లో కాంగ్రెస్ కార్పొరేటర్ సీతారాం జైశ్వాల్పై ఎఫ్ఐఆర్ నమోదు చేశారు పోలీసులు. తన భవనంలో అద్దెకుంటున్న ఓ నర్సును ఖాళీ చేయమని బలవంతం చేసినట్లు ఆమె పోలీసులకు ఫిర్యాదు చేశారు. ఈ నేపథ్యంలో పోలీసులు జైశ్వాల్పై కేసు నమోదు చేశారు.
ఇదీ చూడండి : గర్భిణిని అడ్డుకున్న పోలీసులు- అంబులెన్స్లోనే ప్రసవం
