Karnataka Reservation : ప్రైవేటు సంస్థల్లోని గ్రూప్-సీ, గ్రూప్-డీ పోస్టులను 100 శాతం కన్నడ వాసులతోనే భర్తీ చేసేందుకు ఉద్దేశించిన బిల్లుకు కేబినెట్‌ ఆమోదం తెలిపిందని కర్ణాటక ముఖ్యమంత్రి సిద్ధరామయ్య తెలిపారు. మంత్రివర్గ సమావేశంలోనే ఈ నిర్ణయం తీసుకున్నామని పేర్కొన్నారు. ఈ విషయాన్ని సామాజిక మాధ్యమం ఎక్స్‌లో పోస్టు చేశారు.
"రాష్ట్రంలో నెలకొల్పిన అన్ని ప్రైవేట్‌ సంస్థల్లో గ్రూప్-సీ, గ్రూప్-డీ పోస్టులకు సంబంధించి 100% కన్నడిగుల నియమకాన్ని తప్పనిసరి చేసే బిల్లుకు కేబినెట్‌ ఆమోదం తెలిపింది." - సిద్దరామయ్య, కర్ణాటక సీఎం
కన్నడిగులకు సొంత రాష్ట్రంలోనే ఉద్యోగాలు కల్పించాలన్నదే తమ ప్రభుత్వం ఉద్దేశమని సిద్ధరామయ్య పేర్కొన్నారు. కన్నడిగుల సంక్షేమమే తమ ప్రాధాన్యతని రాసుకొచ్చారు. ఈ బిల్లును గురువారం శాసనసభలో ప్రవేశపెట్టనున్నట్లు కర్ణాటక న్యాయశాఖ వర్గాలు తెలిపాయి. ఏదైనా పరిశ్రమ లేదా సంస్థ మేనేజ్మెంట్ కేటగిరీలో 50 శాతం, నాన్‌-మేనేజ్మెంట్ కేటగిరీలో 70 శాతం మందిని కేవలం స్థానికుల నుంచే నియమించుకోవాలని బిల్లులో పొందుపరిచారు.
