విజయవాడలో త్వరలో కెనాల్​ బోటింగ్ - కాలువల అభివృద్ధితో దృష్టి పెట్టిన వీఎంసీ​ - Canals Development in Vijayawada

Vijayawada Municipal Commissioner Focus on Canals Development : విజయవాడలో ప్రవహిస్తున్న బందరు, ఏలూరు, రైవస్ కాలువలు పర్యాటకులను ఆకర్షించే విధంగా బోటింగ్ ప్రణాళిక సిద్ధం చేయాలని సంబంధిత అధికారులను నగరపాలక సంస్థ కమిషనర్ ధ్యానచంద్ర ఆదేశించారు. కొత్తగా వచ్చిన కమిషనర్​ పర్యాటక ప్రాంతాలపై దృష్టి పెట్టారు. నగరంలో పర్యాటక ప్రాంతాలు ఉన్నా పూర్తి స్ధాయిలో అభివృద్ధి లేకపోవడంతో ప్రజలు సేద తీరేందుకు అనువైన ప్రదేశాలు లేక ఇతర ప్రాంతాలకు వెళ్లాల్సిన పరిస్ధితి నెలకొంటుంది. కెనాల్స్​ అభివృద్ధితోపాటు ​బోటింగ్ సౌకర్యం కల్పిస్తే పర్యాటకులను ఆకర్షించవచ్చని నగరపాలక కమిషనర్​ అన్నారు. దీంతో పర్యాటకులతో పాటు స్థానికులనూ ఆకట్టుకునేందుకు నగరపాలక సంస్థ త్వరలో కెనాల్ బోటింగ్​ను ప్రారంభించనుంది.  

ఈ సందర్భంగా కాలువల్లో పర్యటించిన ధ్యానచంద్ర బోటింగ్​పై దృష్టి పెట్టాలని అధికారులకు తెలిపారు. ఈ కాలువల్లో ఎటువంటి చెత్త, గృహ వ్యర్థాలు వేయకుండా చర్యలు తీసుకోవాలన్నారు. డ్రోన్ల సహాయంతో ఎప్పటికప్పుడు పర్యవేక్షించి, వ్యర్థాలు వేసిన వారికి జరిమానా విధించాలన్నారు. కాలువల్లోకి వస్తున్న ప్లాస్టిక్ వ్యర్థాలను ఎప్పటికప్పుడు తొలగించాలని అధికారులను ఆయన ఆదేశించారు.