ఉషాకిరణాల్లాంటి ఆయన కీర్తి అజరామరమై వెలుగుతుంది: చంద్రబాబు - TDP chief Chandrababu Naidu

TDP chief Chandrababu Naidu: తెలుగు వెలుగు, అక్షర యోధుడు రామోజీరావు అంతిమ సంస్కార కార్యక్రమంలో పాల్గొన్నప్పుడు తనకు కలిగిన బాధపై కాబోయే ముఖ్యమంత్రి చంద్రబాబు ఎక్స్ వేదికగా స్పందించారు. తెలుగువారి ఆత్మబంధువు రామోజీగారికి కడసారి వీడ్కోలు పలికానని ఆవేదన వ్యక్తం చేశారు. హృదయం బాధతో నిండిపోయిందని విచారం వ్యక్తం చేశారు. ఆయన మన మధ్య లేకపోయినా, ఆ మహనీయుడు ఇచ్చిన స్ఫూర్తి మార్గదర్శిగా మనల్ని ముందుకు నడిపిస్తుందన్నారు. ఉషాకిరణాల్లాంటి ఆయన కీర్తి అనునిత్యం అజరామరమై వెలుగుతుందని కొనియడారు. ఇక అక్షర యోధుడికి కడసారి వీడ్కోలు పలికేందుకు వివిధ పార్టీలకు చెందిన నేతలు, రామోజీ గ్రూపు సంస్థల ఉద్యోగులు, ప్రజలు తరలివచ్చారు. రామోజీరావు పార్థివదేహం వద్ద కుటుంబసభ్యులు కన్నీరు మున్నీరయ్యారు.  

రామోజీరావు తన స్మారక కట్టడాన్ని ముందే సిద్ధం చేసుకున్నారు. రామోజీ ఫిల్మ్‌ సిటీలోని విశాలమైన ప్రాంతంలో ఆయన నిర్మాణం చేయించుకున్న ఆ స్మృతి కట్టడం వద్దే ఇప్పుడు అంతిమ సంస్కారాలు జరిగాయి. తెలంగాణ ప్రభుత్వ అధికారిక లాంఛనాలతో అంత్యక్రియలు జరిగాయి. రాజకీయ నాయకులు సహా పలువురు ప్రముఖులు ఆయన అంత్యక్రియల్లో పాల్గొన్నారు.