చినగంజాం జాతీయ రహదారిపై ప్రమాదం - యువకుడు మృతి

Road Accident in Young Man Dead at Chinaganjam: గుర్తు తెలియని వాహనం ఢీకొని ద్విచక్ర వాహనదారుడు మృతి చెందిన ఘటన బాపట్ల జిల్లా చినగంజాం జాతీయ రహదారిపై జరిగింది. చినగంజాం ఎస్సై మాతంగి శ్రీనివాసరావు అందించిన వివరాల ప్రకారం చీరాలలోని స్వర్ణ రైల్వే గేటు ప్రాంతానికి చెందిన యువకుడు రాజు స్వామిరెడ్డి (24) ఒంగోలు నుంచి చీరాలకు తన ద్విచక్ర వాహనంపై వెళ్తుండగా ఎదురుగా వెళ్తున్న వాహనాన్ని చూసుకోకుండా ఢీకొనడంతో ఈ ప్రమాదం జరిగిందని భావిస్తున్నారు. ఈ ప్రమాదంలో స్వామిరెడ్డి అక్కడిక్కడే మృతి చెందాడు. 

సమాచారం అందుకున్న వెంటనే సంఘటన స్థలానికి చేరుకుని మృతుడి వివరాలు సేకరించి కుటుంబ సభ్యులకు తెలిపినట్లు ఎస్సై పేర్కొన్నారు. స్వామిరెడ్డి మృతదేహాన్ని చూసిన కుటుంబ సభ్యులు కన్నీరు మున్నీరయ్యారు. పోస్టుమార్టం నిమిత్తం మృతదేహాన్ని చీరాల ప్రభుత్వ వైద్యశాలకు తరలించామని పోలీసులు వెల్లడించారు. కుటుంబ సభ్యుల ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నట్లు తెలిపారు.