గుడివాడలో ఎమ్మెల్యే కొడాలి నానికి మరో దెబ్బ - టీడీపీలోకి వైఎస్సార్సీపీ కీలక నేతలు - Gudivada YSRCP Leaders Joined TDP

Gudivada YSRCP Leaders Joined in TDP: కృష్ణాజిల్లా గుడివాడలో ఎమ్మెల్యే కొడాలి నానికి మరో దెబ్బ తగిలింది. గుడ్లవల్లేరు మండలంలో వైఎస్సార్సీపీలో కీలకమైన డోకిపర్రు గ్రామ సర్పంచ్ జ్యోతి, వార్డు సభ్యురాలు, ఆ పార్టీకి చెందిన మరికొంతమంది నేతలు టీడీపీలో చేరారు. వారికి ఎమ్మెల్యే అభ్యర్థి వెనిగండ్ల రాము పార్టీ కండువాలు కప్పి టీడీపీలోకి ఆహ్వానించారు. ఈ సందర్భంగా వెనిగండ్ల రాము మాట్లాడుతూ తమ గ్రామాల భవిష్యత్తు కోసం అనేకమంది ప్రజాప్రతినిధులు టీడీపీలో చేరుతున్నారని తెలిపారు. సమస్యలు పట్టించుకోకుండా ప్రజల వద్ద దోచుకున్న సొమ్మును విచ్చలవిడిగా పంచుతూ ఏదో చేద్దామని ప్రయత్నిస్తున్నాడని ఆయన ఆరోపించారు. తాను పుట్టిన గడ్డ కోసం ఏదైనా చేయాలనే గుడివాడ వచ్చానని, ప్రజల సహకారంతో దోచుకునే వాళ్లకు అడ్డుకట్ట వేస్తానని అన్నారు. చచ్చినా బతికినా ఇక్కడే ఉంటానన్న వెనిగండ్లరాము, తాను అమెరికా తిరిగి ఎందుకు వెళ్తానని బుద్ధి లేకుండా వైఎస్సార్సీపీ నేతలు మాట్లాడుతున్నాడని మండిపడ్డారు. ఈ పిచ్చి మాటలు మాని దమ్ముంటే ఒక్క గ్రామంలోనైనా తనకంటే మెజార్టీ తెచ్చుకోమని కొడాలి నానికి ఛాలెంజ్ చేశారు. గుడివాడను ప్రగతి బాటలో నడిపేందుకు తాను చేస్తున్న ప్రయత్నంలో భాగస్వామ్యం అవుతున్న ప్రతి ఒక్కరికి ధన్యవాదాలు తెలిపారు.