కియా అనుబంధ పరిశ్రమలో అగ్నిప్రమాదం - కార్మికుడికి తీవ్రగాయాలు - Fire Accident in SLAP

Fire Accident in KIA Subsidiary Industry SLAP : శ్రీ సత్య సాయి జిల్లా సోమందేపల్లి మండలంలోని గుడిపల్లి పారిశ్రామిక వాడలో కియా అనుబంధ పరిశ్రమ ఎస్ఎల్​ఏపీలో భారీ అగ్ని ప్రమాదం సంభవించింది. ఈ పరిశ్రమలో కార్మికులు వెల్డింగ్ చేస్తుండగా మంటలు వ్యాపించాయి. మంటలు చెలరేగడంతో ఇద్దరు కార్మికులకు గాయాలయ్యాయి. మంటలు అదుపు చేసేందుకు వెళ్లి ఒక కార్మికుడికి తీవ్ర గాయాలయ్యాయి. మరొకరు పొగతో ఊపిరాడక అస్వస్థకు గురైయ్యారు. వెంటనే అతడిని చికిత్స కోసం పెనుకొండ వైద్యశాలకు తరలించారు. 

ప్రమాదంలో గాయపడిన కార్మికులకు ఎలాంటి ప్రాణాపాయం లేదని తెలియడంతో అందరూ ఊపిరి పీల్చుకున్నారు. విషయం తెలుసుకున్న అగ్నిమాపక సిబ్బంది వెంటనే సంఘటనా స్థలానికి చేరుకొని సహాయక చర్యలు చేపట్టారు. ఈ ఎస్ఎల్​ఏపీ పరిశ్రమలో కియా కార్లకు సంబంధించిన హెడ్ లాంప్స్, మిర్రర్స్ తయారు చేస్తుంటారు. కియా పరిశ్రమ మొత్తం మంటలు వ్యాప్తి చెందడంతో భారీగా నష్టం జరిగినట్లు తెలుస్తోంది. ఎంత నష్టం జరిగిందో అనే పూర్తి వివరాలు తెలియాల్సి ఉంది.