టెక్కలిలో పోలీసు జులుం - విద్యుత్​ ఉద్యోగిపై సీఐ దాడి - CI Attack on Electricity Employee

CI Attack on Electricity Officer in Tekkali : ఓ చిరుద్యోగిపై పోలీసు అధికారి దాడి చేయడం ప్రస్తుతం చర్చనీయాంశమైంది. ఈ సంఘటన శ్రీకాకుళం జిల్లాలో చోటు చేసుకుంది.టెక్కలి రూరల్​ పోలీస్​ స్టేషన్​ సీఐ చంద్రమౌళి సతీష్​కుమార్​ విద్యుత్​ శాఖ ఉద్యోగి సతీష్​ కుమార్​పై దాడి చేశారు. సీఐ ఇంటికి విద్యుత్​ కనెక్షన్​ తొలగించానన్న కోపంతో స్టేషన్​కు పిలిపించి తనపై దాడి చేశారంటూ బాధితుడు ఆరోపించాడు. సతీష్​ కుమార్​పై దాడిని ఉద్యోగుల సంఘం తీవ్రంగా ఖండించింది. సహ ఉద్యోగులంతా ఆసుపత్రికి చేరుకుని బాధితుని పరామర్శించారు. ఈ ఘటనపై జిల్లా అధికారుల దృష్టికి తీసుకెళ్లి బాధితుడికి న్యాయం జరిగేవరకు పోరాడతామని సృష్టం చేశారు. 

టెక్కలిలో సచివాలయ విద్యుత్​ శాఖలో ఉద్యోగిగా పని చేస్తున్న రాజమహంతి సతీష్​ కుమార్​  బిల్లులు కట్టని సర్వీసు కనెక్షన్​ తొలగింపు ప్రక్రియను అధికారులు అతనికి గురువారం అప్పగించారు. ఈ నేపథ్యంలో స్థానిక అయ్యప్పనగర్​లో ఓ గృహ సముదాయం పరిధిలో మూడిళ్లకు తన జాబితా ప్రకారం విద్యుత్తు సేవలను నిలిపివేస్తూ ఫీజులు తొలగించారు. 

విద్యుత్​ సరఫరా నిలిచిపోవడంతో ఇంట్లో ఉన్న మహిళ ఎందుకు తొలగించారని సతీష్​కుమార్​ను ప్రశ్నించింది. అతను విద్యుత్​ బిల్లులు చెల్లించనందున తొలగించినట్లు ఆమెకు తెలియజేశారు. దీంతో ఆమె ఫోన్​ పే ద్వారా బిల్లులను చెల్లించింది. సతీష్​ కుమార్​ విద్యుత్​ సేవలను పునరుద్ధరించి అనంతరం అక్కడి నుంచి వెళ్లిపోయారు. కొద్ది సేపటికి టెక్కలి పోలీస్​ స్టేషన్​కు రావాల్సిందిగా అధికారులు సతీష్​ కుమార్​కి ఫోన్​​ చేశారు. అక్కడి వెళ్లిన సతీష్​ కుమార్​పై సీఐ సూర్య చంద్రమౌళి దాడి చేశారు. ప్రస్తుతం సతీష్​ కుమార్​ స్థానిక ఆసుపత్రిలో చికిత్స పొందుతున్నారు.