సీఎస్ జవహర్ రెడ్డిని తొలగించి ఒత్తిళ్లకు లొంగని అధికారిని నియమించాలి: లంకా దినకర్ - lanka dinakar on cs jawahar reddy

Lanka Dinakar Comments on CS Jawahar Reddy: సీఎస్ జవహర్ రెడ్డిని తొలగించి, ఆస్థానంలో ఏ ఒత్తిళ్లకు లొంగని ఐఏఎస్ అధికారిని నియమించాలని బీజేపీ అధికార ప్రతినిధి లంకా దినకర్ అన్నారు. ప్రస్తుత సీఎస్ జవహర్ రెడ్డి ఐఏఎస్​లా కాకుండా ముఖ్యమంత్రి దగ్గర అయ్యా ఎస్ అనే విధంగా ప్రవర్తిస్తున్నారని ఆరోపించారు. ఈ అంశాలను ఎన్నికల కమిషన్ దృష్టికి తీసుకువెళ్లామన్నారు. రాష్ట్రంలో సచివాలయ సిబ్బంది ద్వారా పింఛన్లు పంపిణీ చేసే అవకాశం ఉన్నా, పంపిణీ చేయకుండా 33 మంది మృతికి రాష్ట్ర ప్రభుత్వం కారణమైందని విమర్శించారు. ఆ మృతులు ప్రభుత్వ హత్యలుగా పరిగణిస్తామని ఆరోపించారు. రాష్ట్రంలో సీఎస్​ను తొలగిస్తే తప్ప సక్రమంగా ఎన్నికలు జరగవని ఆరోపించారు. డీజీపీ, ఇంటిలిజెన్స్ అధిపతి అసమర్థంగా పనిచేస్తున్నారని విమర్శించారు. రాష్ట్రంలో సీఎస్​ను, డీజీపీని, ఇంటిలిజెన్స్ చీఫ్​ను తొలగించి సమర్థులైన వారిని నియమించాలని డిమాండ్ చేశారు.

Purandeswari Nomination AP Elections 2024: శుక్రవారం రాజమహేంద్రవరం కలెక్టరేట్​లో ఎన్డీఏ కూటమి ఎంపీ అభ్యర్థి పురందేశ్వరి నామినేషన్ దాఖలు చేయనున్నట్లు తెలిపారు. శుక్రవారం మధ్యాహ్నం 1:10 గంటలకు రాజమహేంద్రవరంలోని పురందేశ్వరి నివాసం నుంచి ర్యాలీగా జిల్లా కలెక్టరేట్ కార్యాలయానికి వెళ్లి 2:20 గంటలకు నామినేషన్ వేయనున్నట్లు పేర్కొన్నారు. నామినేషన్ కార్యక్రమంలో తమిళనాడు బీజేపీ మహిళా నేత కుష్బూ, జనసేన అధినేత పవన్ కల్యాణ్, కేంద్ర బీజేపీ నేతలు పాల్గొనే అవకాశం ఉందన్నారు. అదేవిధంగా పార్లమెంట్ నియోజకవర్గంలోని టీడీపీ, బీజేపీ, జనసేన కూటమి నేతలు పాల్గొంటారన్నారు.