వైఎస్సార్సీపీ నేతలు వెళ్లిన దేవాలయాలను శుద్ధి చేసిన బీజేపీ కిసాన్​మోర్చా - BJP Leaders Fires on YSRCP

BJP Leaders Fires on YSRCP : రాష్ట్రంలో గోవు ఘోష విను గోవిందా పేరిట బీజేపీ కిసాన్​మోర్చా గోమాత పూజలు చేపట్టింది. పరిశుద్ధ కార్యక్రమాల పేరుతో శనివారం నాడు వైఎస్సార్సీపీ నేతలు వెళ్లిన దేవాలయాలను వారు పునఃశుద్ధి చేశారు. ఇందులో భాగంగా విజయవాడ లబ్బీపేట వెంకటేశ్వరస్వామి ఆలయాన్ని కిసాన్‌ మోర్చా రాష్ట్ర అధ్యక్షుడు చిగురుపాటి కుమారస్వామి నేతృత్వంలో గోమూత్రంతో శుద్ధి చేశారు. 

మాజీ ముఖ్యమంత్రి జగన్, వైఎస్సార్సీపీ నేతలు తిరుమలను అపవిత్రం చేశారని చిగురుపాటి కుమారస్వామి ఆరోపించారు. జంతువుల కొవ్వు కలిసిన నెయ్యి వాడి తిరుపతి లడ్డూను అపవిత్రం చేశారని మండిపడ్డారు. తద్వారా కోట్లమంది భక్తుల మనోభావాలను దెబ్బతీశారని దుయ్యబట్టారు.  ఆ పార్టీ నాయకులు లడ్డూను అపవిత్రం చేసిందే కాక తప్పును కప్పిపుచ్చుకునేందుకు దేవాలయాలకు వచ్చి నాటకాలు ఆడారని కుమారస్వామి ఆగ్రహం వ్యక్తం చేశారు.

BJP Leaders Temples Clean in AP : మాజీ స్పీకర్ తమ్మినేని సీతారాం హిందువుల మనోభావాలను దెబ్బతీసేలా గోవుపైనే అభాండాలు వేస్తున్నారని కుమారస్వామి ఆగ్రహం వ్యక్తం చేశారు. ఇటువంటి వారిని ప్రజలు చూస్తూ ఊరుకోబోరని హెచ్చరించారు. వైఎస్సార్సీపీ నాయకులు చేసిన అపవిత్రమైన పనులకు గోవులు కూడా కన్నీరు పెడుతున్నాయని కుమారస్వామి ఆవేదన వ్యక్తం చేశారు. ఈ కార్యక్రమంలో ఎన్టీఆర్‌ జిల్లా బీజేపీ అధ్యక్షుడు అడ్డూరి శ్రీరాం, తదితరులు పాల్గొన్నారు.