అమరావతిలో 1497 దీపాలు- రాజధానిని కాపాడు రామయ్య అంటూ నినాదాలు

Amaravathi People 1497 Lights Due to Ayodhya Ram Mandir Inauguration: అయోధ్య రామమందిరం ప్రారంభోత్సవం సందర్భంగా రాష్ట్రవ్యాప్తంగా విశేష పూజా కార్యక్రమాలు, శోభాయాత్రలు, దీపోత్సవాలతో శ్రీరామ నామస్మరణ మిన్నంటింది. రాష్ట్రవ్యాప్తంగా సోమవారం సాయంత్రం ప్రజలు దీపాలు వెలిగించి రామయ్యకు నీరాజనం పలికారు. రామ్​లల్లా ప్రాణప్రతిష్ఠ వేడుకను పురస్కరించుకుని దేశవ్యాప్తంగా దీపాలు వెలిగించాలని ప్రధాని మోదీ పిలుపు ఇవ్వటంతో రాజధాని అమరావతిలో మహిళలు 1497 దీపాలు వెలిగించి ప్రత్యేక పూజలు నిర్వహించారు. 

గుంటూరు జిల్లా తుళ్లూరు రామాలయంలో మహిళలు ప్రమిదలు వెలిగించి అమరావతిని కాపాడయ్య రామయ్య అంటూ నినాదాలు చేశారు. రాజధాని అమరావతి కోసం ఉద్యమం ప్రారంభించి 1497 రోజులు పూర్తి అవుతున్న సందర్భంగా అదే సంఖ్యలో ప్రమిదలు వెలిగించి అమరావతికి మద్దతుగా నినదించామని స్థానికులు తెలిపారు. అయోధ్యను రక్షించినట్లే అమరావతిని కాపాడాలని ప్రజలు పూజలు చేశారు. ప్రజలు రాత్రి రామజ్యోతిని వెలిగించి రామునిపై తమ భక్తిని చాటుకున్నారు. మరికొందరు బాణసంచా కాల్చి జై శ్రీరామ్‌ అనే నామస్మరణతో సంబరాలు చేసుకున్నారు.