Password Manager Security Benefits : బ్యాంకు లావాదేవీలైనా, నగదు చెల్లింపులైనా, కొనుగోళ్లయినా అన్నీ ఉన్న చోటు నుంచే ఆన్లైన్లో కానిచ్చేస్తున్నాం. వీటి లాగిన్ సమాచారం ఇతరులు యాక్సెస్‌ చేయకుండా యూజర్‌ నేమ్, పాస్వర్డ్ ఏర్పాటు చేస్తున్నాం. మరోవైపు యూజర్‌ డేటా కోసం సైబర్ దాడులు జరుగుతున్నాయి. వీటి బారి నుంచి కాపాడుకునేందుకు చాలా మంది పాస్వర్డ్ మేనేజర్లను వినియోగిస్తుంటారు. దీంతో అన్ని ఖాతాల పాస్వర్డ్లు, యూజర్‌ నేమ్లను గుర్తుంచుకోవాల్సిన అవసరం లేకుండా ఒకే చోట వాటిని భద్రపరచుకోవచ్చు. అసలేంటీ ఈ పాస్వర్డ్ మేనేజర్? యూజర్స్కు ఎలా ఉపయోగపడుతుంది? తదితర విషయాలు ఈ కథనంలో తెలుసుకుందాం.
ఈ-మెయిల్, బ్యాంకింగ్, సోషల్ మీడియా, ఓటీటీ ప్లాట్ఫామ్ నెట్‌ఫ్లిక్స్, స్పాటిఫై వంటి వాటికి కూడా పాస్వర్డ్లు పెట్టుకుంటాం. ఇవే కాక ఇంకా చాలా వాటికి పాస్వర్డ్స్ క్రియేట్ చేసి గుర్తుంచుకుంటాం. అయితే సింపుల్ పాస్వర్డ్స్ పెడితే, సైబర్ దాడులకు గురయ్యే ప్రమాదం ఉంటుంది. అందుకే పాస్వర్డ్ మేనేజర్ను వాడుకోవాలి. దీనికి ఒక స్ట్రాంగ్ పాస్వర్డ్ను పెట్టుకుంటే చాలు. మిగతా పాస్వర్డ్లను గుర్తించుకోనక్కర్లేదు. పైగా అవి భద్రంగా ఉంటాయి.
పాస్వర్డ్ మేనేజర్ను ఎందుకు ఉపయోగించాలి?
ప్రస్తుత కాలంలో చాలా మంది తమ ఆన్లైన్ ఖాతాలన్నింటికీ ఒకే పాస్వర్డ్ను పెడుతున్నారు. ఇలా చేయడం వల్ల సైబర్ దాడికి గురైతే భారీగా నష్టపోయే ప్రమాదం ఉంది. ఎలా అంటే, మీ అన్ని అకౌంట్లలోని డేటా, నగదు చోరీ అవుతుంది. చాలా మంది తమ పుట్టిన తేదీ, కుటుంబ సభ్యుల పేర్లు, ఇష్టమైన క్రీడా జట్లు లేదా abc123 వంటి సాధారణ పాస్వర్డ్స్ పెడుతుంటారు. ఇది ఏమాత్రం మంచిది కాదు. సైబర్ ముప్పు నుంచి తప్పించుకోవాలంటే కచ్చితంగా స్ట్రాంగ్ పాస్వర్డ్ పెట్టుకోవాలి. అందుకే ఈ-మెయిల్, సోషల్ మీడియా, యూపీఐ ఖాతాలకు వేర్వేరు పాస్వర్డ్ను పెట్టుకోవడం ఉత్తమం. అయితే వేర్వేరు పాస్వర్డ్లను గుర్తుంచుకోవడం కష్టం అయితే అప్పుడు పాస్వర్డ్ మేనేజర్ను ఉపయోగించుకోవడం మంచిది.
పాస్వర్డ్ మేనేజర్ ఎలా పని చేస్తుంది?
పాస్వర్డ్ మేనేజర్ యాప్స్ మీ పాస్వర్డ్స్ను డిజిటల్ వాల్ట్లో సురక్షితంగా ఉంచుతాయి. మీరు మీ ఈ-మెయిల్, సోషల్ మీడియా ఖాతాలను ఓపెన్ చేయాలనుకున్నప్పుడు లాగిన్, పాస్వర్డ్ ఫీల్డ్లను ఇవి ఆటో ఫిల్ చేస్తాయి. పాస్వర్డ్ మేనేజర్లు ఫిషింగ్ స్కామ్ల బారిన పడకుండా మిమ్మల్ని కాపాడుతాయి. సైబర్ మోసాలకు గురికాకుండా మిమ్మల్ని రక్షిస్తాయి. 1పాస్వర్డ్, బిట్వార్డెన్, డాష్లేన్, బిట్ డెఫెండర్, నార్డ్‌ పాస్, కీపర్, కీపాస్ వంటి చాలా పాస్వర్డ్ మేనేజర్ యాప్స్ మార్కెట్లో అందుబాటులో ఉన్నాయి. వాటిలో మీకు నచ్చినదాన్ని ఎంచుకోవచ్చు.
పాస్వర్డ్ మేనేజర్స్ను హ్యాక్ చేయలేరా?
కొన్నాళ్ల క్రితం 'లాస్ట్పాస్' అనే పాస్ట్వర్డ్ మేనేజర్ సైబర్ దాడికి గురైంది. దీంతో ఒక్కసారిగా ఆందోళనలు వ్యక్తం అయ్యాయి. ఈ నేపథ్యంలో సైబర్ నిపుణులు పలు ఆసక్తికర విషయాలు చెప్పారు. పాస్వర్డ్ మేనేజర్స్ అనేవి చాలా వరకు సురక్షితంగా ఉంటాయి. AES-256 ఎన్క్రిప్షన్‌ ఉన్న పాస్వర్డ్ మేనేజర్స్ను ప్రస్తుతం ఉన్న టెక్నాలజీతో సైబర్ నేరగాళ్లు హ్యాక్ చేయలేరు. ఒక వేళ పాస్వర్డ్ మేనేజర్ను ఎవరైనా క్రాక్ చేసినా, వాటిలోని మిగతా పాస్వర్డ్స్ను ఎన్కోడ్, డీకోడ్ చేయడం చాలా కష్టమని సైబర్ నిపుణులు చెబుతున్నారు. అయితే ప్రధానంగా తరచూ సెక్యూరిటీ ఆడిట్స్ చేసే పాస్వర్డ్ మేనేజర్స్ను ఎంచుకోవాలని సూచిస్తున్నారు. పాస్వర్డ్ మేనేజర్స్ సాధారణంగా డేటాను క్లౌడ్లో స్టోర్ చేస్తుంటాయి. కనుక భద్రతకు ముప్పు కలిగే అవకాశం ఉంది. కనుక మీ సొంత డివైజ్ (ల్యాప్టాప్, పీసీ, ట్యాబ్లెట్)లోనే మీ వివరాలు స్టోర్ చేసుకునే వెసులుబాటు కల్పించే పాస్వర్డ్ మేనేజర్లను ఎంచుకోవాలి.
