ఏడాదికి ఒక్కసారే దర్శనం - కార్తిక పౌర్ణమి నాడు రుద్రాభిషేకం

ప్రతి కార్తిక పౌర్ణమి రోజున 24 గంటల పాటు తెరిచే ప్రత్యేకమైన ఆలయం

Yearly Once Open Temple in Nalgonda District Of Telangana : సాధారణంగా ఏ ఆలయంలోనైనా ఏడాది పొడవునా పూజలు జరుగుతుంటాయి. కొన్ని ఆలయాలను మాత్రం కొన్ని నెలలపాటు తెరిచి మళ్లీ మూసేస్తారు. కానీ తెలంగాణ రాష్ట్రం నల్గొండ జిల్లాలోని సంస్థాన్‌ నారాయణపురం మండలంలోని చిల్లాపురం గ్రామంలో ఉన్న స్వయంభూ రామలింగేశ్వరస్వామి ఆలయానికి ఒక ప్రత్యేకత ఉంది. ఈ గుడి ఏడాదిలో ఒక్క రోజు మాత్రమే తెరుచుకుంటుంది. ఆ ఒక్క రోజే వేల మందికి పైగా భక్తులు దర్శించుకుంటారు ఇక్కడికి వచ్చి దైవ దర్శనం చేసుకుంటారు. ఏటా కార్తిక పౌర్ణమి రోజున ఈ ఆలయ తలుపులు తెరుచుకోవడం ఈ ఆలయ విశేషం.

900 ఏళ్ల నాటి దేవాలయం ఇది : చిల్లాపురం గ్రామంలోని ఓ ఎత్తైన గుట్టపైన 900 ఏళ్ల క్రితం శ్రీ రామలింగేశ్వరస్వామి వెలిసినట్లు చరిత్ర చెబుతుంది. ఆ గుట్టను రామస్వామి గుట్టగా పిలుస్తారు. ప్రతి కార్తిక పౌర్ణమి రోజున 24 గంటల పాటు తెరిచే ప్రత్యేకమైన ఆలయమిది. నేడు (15 వ తేదీన) కార్తిక పౌర్ణమి నాడు ఆలయం తలుపులు తెరుచుకున్నాయి. ఈ జాతరకు ఎలాంటి ప్రచార ఆర్భాటాలు ఉండవు. ఉమ్మడి జిల్లాతో పాటు చుట్టుపక్కల జిల్లాల నుంచి వేలాది మంది భక్తులు ఈ ఆలయానికి తరలొచ్చి దర్శించుకుంటున్నారు.

తెల్లవారుజాము నుంచే పూజలు : తెల్లవారుజామున శివునికి రుద్రాభిషేక పర్వంతో జాతర ప్రారంభమవుతుంది. గుడి పక్కనే పుట్ట వద్ద నాగదేవతకు ప్రత్యేక పూజలు చేసి మొక్కులు తీర్చుకుంటున్నారు. మహిళలు ప్రత్యేకంగా 360 ఒత్తులతో దీపాలను వెలిగించి పూజలు చేస్తారు. సాయంత్రం అఖండ దీపారాధన కార్యక్రమాలు నిర్వహిస్తారు. పోలీసు బందోబస్తు నడుమ జాతర కొనసాగుతుంది.

ప్రతి ఏటా కార్తిక పౌర్ణమినాడు నిర్వహించే చిల్లాపురం జాతరకు స్థానికులు పెద్దమొత్తంలో తరలి వస్తారు. జిల్లా వ్యాప్తంగా ఉన్న భక్తులు వచ్చి స్వయంభూ రామలింగేశ్వర స్వామిని దర్శించుకుంటారు. మొక్కులు చెల్లించుకుంటారు. రుద్రాభిషేకంతో మొదలయ్యే ఈ జాతరను భక్తి శ్రద్దలతో నిర్వహిస్తారు.