"వైఎస్సార్సీపీ సైబర్‌ సైకోల దాడిని అడ్డుకోవడం కష్టమే - అదంతా తాడేపల్లిలో మొదలై విదేశాల్లోనూ వేళ్లూనుకున్న వ్యవస్థ"

జాతీయ మహిళా కమిషన్​కు వాసిరెడ్డి పద్మ లేఖ - సోషల్ మీడియాపై సుప్రీంకోర్టు గతంలో ఇచ్చిన తీర్పులను రివ్యూ చేయాలన్న పద్మ

Vasireddy Padma Letter To National Women Commission : సోషల్ మీడియాలో మహిళల పట్ల సాగుతున్న వికృత దాడిపై కఠిన చట్టం కోసం సుప్రీంకోర్టులో పిల్ వేయాలని మహిళా కమిషన్ మాజీ ఛైర్ పర్సన్ వాసిరెడ్డి పద్మ కోరారు. ఈ మేరకు జాతీయ మహిళా కమిషన్​కు ఆమె లేఖ రాశారు. సీఎం, డిప్యుటీ సీఎంతోపాటు వారి కుటుంబసభ్యులు, హోంమంత్రి, మహిళా నేతలపై సోషల్ మీడియాలో అసభ్యకరమైన పోస్టులు పెడుతున్నారంటూ లేఖలో పేర్కొన్నారు. పసలేని చట్టాలతో ఈ సైకోల దాడి నుంచి మహిళలను కాపాడలేమన్నారు. సోషల్ మీడియాపై సుప్రీంకోర్టు గతంలో ఇచ్చిన తీర్పులను రివ్యూ చేయాలని లేఖలో పేర్కొన్నారు. తక్షణమే సుప్రీంకోర్టులో పిల్ వేసి కఠినమైన చట్టం తీసుకువచ్చేలా చూడాలన్నారు.

తాడేపల్లిలోని కేంద్ర కార్యాలయం వేదికగా వైఎస్సార్సీపీ ఏకంగా ఓ సైబర్‌ టెర్రరిస్ట్‌ల ఫ్యాక్టరీని నడిపిస్తోంది. ఒకరో ఇద్దరో కాదు రాష్ట్రస్థాయి నుంచి మండల స్థాయి వరకూ దాదాపు 50వేల మంది సైబర్‌ ఉగ్రవాదుల్ని తయారు చేసి నిత్యం రేచుకుక్కలు, రాబందుల మాదిరిగా వారిని ఉసిగొల్పుతోంది. ఈ వైఎస్సార్సీపీ ఉగ్రవాదులకు తల్లి, చెల్లి, అక్క అనే ఉచ్ఛనీచాలుండవు. పాము తన పిల్లల్ని తానే తిన్నట్లుగా వారి పార్టీ అధ్యక్షుడు జగన్‌కు, వారి పార్టీకి ఎదురు తిరిగితే చాలు అది షర్మిల అయినా, విజయమ్మ అయినా కూడా చూడకుండా అసభ్య పోస్టులు పెడుతున్నారు. ముఖ్యమంత్రి చంద్రబాబు, ఉపముఖ్యమంత్రి పవన్‌కల్యాణ్, మంత్రులు నారా లోకేశ్, వంగలపూడి అనిత సహా కూటమిలోని ముఖ్య నాయకులు, వారి కుటుంబాల్లోని మహిళలు, చిన్నపిల్లలే లక్ష్యంగా ఈ ఉన్మాదమూక సామాజిక మాధ్యమాల్లో అత్యంత దారుణమైన పోస్టులు, మార్ఫింగ్, ఎడిటింగ్‌ చిత్రాలు, వీడియోలు పెడుతున్నారు.

వారిని మానసిక క్షోభకు గురిచేసేందుకు విస్తృతంగా దాడి చేస్తున్నారు. ఇదేదో కొద్దిమందో, ఎవరికి వారుగానో చేస్తున్న పని కాదు. గ్రామస్థాయి నుంచి రాష్ట్రస్థాయి వరకూ వ్యవస్థీకృతంగా, పక్కా నేరపూరిత కుట్రతో నడిపిస్తున్న, నడుస్తున్న వైఎస్సార్సీపీ సైబర్‌ ఉగ్రవాదుల దాడి ఇది. దీని మూలాలు తాడేపల్లిలో మొదలై హైదరాబాద్, బెంగళూరు, విదేశాల వరకూ వేళ్లూనుకుని ఉన్నాయి. వారు చేస్తున్న దాడి ప్రభావం నిత్యం లక్షల మందిపై ఉంటోంది. ఈ నెట్‌వర్క్‌ ఛేదనపై ఇప్పుడు ఏపీ పోలీసులు దృష్టిసారించారు. ఇప్పటికే ఇలాంటి వారిని గుర్తించి వందల మందికి నోటీసులిచ్చారు.