Tsunami 2004 in AP : ప్రశాంత సాగర తీరంలో ఒక్కసారిగా అశాంతి! తాడెత్తున ఎగసిన కెరటాలు! రెప్పపాటులో ఈడ్చుకెళ్లిన రాకాసి అలలు! పుట్టకొకటి- చెట్టుకొకటి, నీటిలో ఇంకొకటి -నేలపై మరొకటిఇలా వెతికేకొద్దీ శవాలు వెళ్లేకొద్దీ విధ్వంసపు ఆనవాళ్లు! ఆహ్లాద తీరంలో ఆర్తనాదాలు! ఇదేమీ సినిమా స్క్రీన్‌ప్లే కాదు! 20 సంవత్సరాల క్రితం సునామీ సృష్టించిన విధ్వంసం! గుర్తు చేస్తేనే గంగపుత్రుల గుండెలదిరే ఉత్పాతం. ఇంతకీ ఆరోజు ఏం జరిగింది? కృష్ణాజిల్లాలో సునామీ బాధితులు కోలుకోడానికి ఎన్నేళ్లు పట్టింది?
2004 డిసెంబర్ 26! కృష్ణా జిల్లా మచిలీపట్నం సమీపంలోని మంగినపూడి బీచ్! సమయం ఉదయం తొమ్మిదిన్నర గంటలు! తీరంలో ఎక్కడెక్కడి నుంచో వచ్చిన పర్యాటకుల కేరింతలు. అప్పుడే కడలి గర్భంలో కల్లోలం. అప్పటిదాకా సవ్వడి చేసిన అలలు, అంతలోనే తాడెత్తున లేచాయి. రెప్పమూసి తెరిచేలోగా, బీచ్ మొత్తం ఖాళీ. జల ప్రళయాన్ని కళ్లారా చూసిన కొందరు సముద్ర గర్భంలో కలిసిపోయారు. బతికి బట్టకట్టిన వాళ్లు ఇదిగో ఈ విధ్వంసానికి సాక్షులుగా మిగిలిపోయారు. 60 మందితో గుంటూరు నుంచి వచ్చిన లారీ, మరికొందరి యాత్రికులతో బీచ్‌కు వచ్చిన ఈ సుమో ఇలాంటివెన్నో నాటి సునామీ విధ్వంసానికి ఆనవాళ్లే.
2004 Indian Ocean Tsunami : గంగపుత్రులకు కడలి కల్లోలం కొత్తేమీకాదు. తుపాన్లు వచ్చిన ప్రతీసారి ఆటుపోట్లకు తట్టుకుని నిలబడతారు. కానీ ఆ రోజు మాత్రం మత్స్యకారులు ముందెన్నడూ చూడని రాకాసి అలల బీభత్సాన్ని చూసి భీతిల్లారు. అప్పటికే వేటకు వెళ్లిన మత్స్యకారులు ఏదో జరుగుతోందని అనుకున్నారేగానీ ఇంతటి విధ్వంసాన్ని మాత్రం ఊహించలేకపోయారు.
2004 డిసెంబర్ 26న ఉదయం 09:30 గంటల నుంచి మధ్యాహ్నం 12:30 గంటల వరకూ ఐదు సార్లు సముద్రం ఉప్పొంగింది. అరకిలోమీటర్‌ వెనక్కి వెళ్లిన సముద్రం అఖరుసారి మాత్రం ఒక్కఉదుటున విరుచుకుపడింది. 20, 30 అడుగుల ఎత్తున ఎగసిన కెరటాలు తీరప్రాంత గ్రామాలపైనా పంజా విసిరాయి. కొందరు ఎత్తైన భవనాల్లోకి వెళ్లి తలదాచుకోగా మరికొందరు కట్టుబట్టలతో బతుకుజీవుడా అంటూ బందరు వెళ్లిపోయారు. తిరిగొచ్చి చూస్తే మిగిలింది కన్నీళ్లే. అల్లకల్లోల ఆనవాళ్లే.
సునామీ కోతతో మంగినపూడి బీచ్ బీచ్ కకావికలమైంది. అలల తాకిడికి కొట్టుకొచ్చిన శవాలతోనాడు బీచ్ ఓ మత్యు దిబ్బనే తలపించింది. గల్లంతైనవారి కోసం విశాఖ నుంచి వచ్చిన నౌకాదళ హెలికాప్టర్లు, ఓడలతో జల్లెడపట్టాల్సి వచ్చింది. కొన్ని మృతదేహాలు లభ్యమైనా బంధువులే గుర్తుపట్టలేనంతగా ఛిద్రమయ్యాయి. బీచ్‌లో పర్యాటక ఆకర్షణగా నిలిచిన కట్టడాలు ధ్వంసం అయ్యాయి. రోడ్లు కోతకు గురయ్యాయి. మొత్తంగా బీచ్‌లో అప్పట్లోనే దాదాపు రూ.50 లక్షలమేర ఆస్తి నష్టం వాటిల్లిందని అంచనా.
తీరప్రాంత గ్రామాల్లోనూ కల్లోలం : తుపాను హెచ్చరికలు, కనీసం చిరు జల్లుల జాడకూడా లేకుండా విరుచుకుపడిన సునామీ కేవలం కృష్ణాజిల్లా అవనిగడ్డ, పెడననియోజవకర్గాల్లోని తీరప్రాంత గ్రామాలన్నింట్లోనూ కల్లోలం సృష్టించింది. నాగాయలంక, కోడూరు మండలాల్లోని పలు గ్రామాలలోకి నీరు చేరింది. బందరు మండలం పెదపట్టణం, కేపీటీ పాలెం, కానూరు, మాలకాయలంక, గిలకలదిండి, తుమ్మలపాలెం, పాతేరు, పెడన నియోజకవర్గం కృత్తివెన్ను, బంటుమిల్లి మండలాల్లోని తీరప్రాంత గ్రామాల్ని అధికారులు ఆగమేఘాలపై ఖాళీ చేయించారు. తిరిగివచ్చి చూస్తే జీవనాధారమైన బోట్లు, వలలు ఒక్కటీ కనిపించలేదు.
మంగినపూడి బీచ్ సమీపంలోని యానాదుల గుడిసెలు కొట్టుకుపోయాయి. నాటి ప్రభుత్వం వారికి వేరేచోట పక్కా ఇళ్లు కేటాయించినా.. కుదురుకోడానికి కొన్నేళ్లు పట్టింది. కొన్ని నెలలపాటు దాతలు, స్వచ్ఛంద సంస్థలు అందించిన నిత్యావసరాలతోటే కాలం వెళ్లదీయాల్సి వచ్చింది. అందుకే 20 ఏళ్లైనా సునామీ పీడకల మత్స్యకారుల కళ్లలో ఇంకా సుడులు తిరుగుతోంది. డిసెంబర్ 26 వచ్చిందంటే బీచ్‌లో శవాల గుట్టలు గుర్తుకొస్తుంటాయి. ఆర్తనాదాలు చెవుల్లో మార్మోగుతుంటాయి. అధికారిక లెక్కల ప్రకారం కృష్ణాజిల్లాలో సునామీ విధ్వంసానికి 36 మంది విగతజీవులయ్యారు. గల్లంతైనవారి లెక్క తెలియక ఎంతో మంది ఏకాకుల్లా మిలిగిపోయారు.
