60 ఏళ్లలో చూడని ప్రళయం - వర్షం ధాటికి కొండలు కరిగి ఊర్లనే మింగేసింది - Tribes Problems on Rains

Tribes Facing Severe Problems Due to Heavy Rains : భారీ వర్షాలకు గెడ్డలు పొంగడంతో అల్లూరి జిల్లాలోని గిరిజన ప్రజలు తీవ్రంగా నష్టపోయారు. ఇళ్లన్నీ వరద నీటిలో మునిగి నిరాశ్రయులయ్యారు. వరదలకు గ్రామంలోకి పెద్ద పెద్ద బండరాళ్లు, చెట్టు కొట్టుకొచ్చాయి. పంటపొలాలు ముంపునకు గురయ్యాయి. కొండ ప్రాంతం కావడంతో జరిగిన నష్టాన్ని అంచనా వేయడం కూడా అంత సులభం కాదు. అత్యాధునికమైన సాంకేతికతో కూడిన డ్రోన్‌ కెమెరాలు, జీపీఎస్‌ సర్వే ద్వారా ఆస్తి, పంట నష్టం అంచనాలు వేసి ప్రభుత్వం ఆదుకోవాలని బాధిత గిరిజనులు కోరుతున్నారు.

Tribes Facing Severe Problems Due to Heavy Rains : అల్లూరి సీతారామరాజు జిల్లాలోని జి.కె వీధి మండలంలోని గిరిజన ప్రజలు తీవ్ర ఇబ్బందులు పడుతున్నారు. 60 ఏళ్లలో చూడని వర్షాలు, ఉగ్ర రూపంలో పొంగిన గెడ్డలు గిరిజన గ్రామాలను కకావికలం చేశాయి. సర్వం కోల్పోయిన గిరి పుత్రులు బరువెక్కిన బతుకులతో ఆదుకునే వారి కోసం ఎదురు చూస్తున్నారు. వర్షాలకు కొండ చెరియలు విరిగి, భూమి కోతకు గురై వందల గ్రామాల్లోని పంట భూముల మీదుగా నీరు ప్రవహించింది. గ్రామాలను ఆనుకుని ఉన్న పంట భూములు సహా మొత్తాన్ని తుడిచిపెట్టేసింది. వరదల్లో కొందరు గాయపడ్డారు. కొన్ని చోట్ల పంట పొలాల్లో నీరు ఇప్పటికీ ప్రవహిస్తున్నది. గ్రామాల మీదుగా భారీగా వరద నీరు ప్రవహించడంతో గిరిజనులు పడ్డ కష్టం వర్ణనాతీతం.

నామరూపాలు లేకుండా : గత 60 ఏళ్ల కాలంలో ఈ తరహా భారీ వర్షాలను తాము చూడలేదని గిరిజనులు చెప్తున్నారు. ఒక్కసారిగా గెడ్డలు పొంగి వరద నీరు గిరిజనుల నివాసాల్లోకి చేరి తీవ్ర నష్టం జరిగింది. వరద సమయంలో ఎత్తున ఉన్న రోడ్లపైనా మూడు అడుగుల మేర వరద నీరు ప్రవహించింది. ఆరు పంచాయతీలలో గిరిజనలు సాగు చేసుకుంటున్న వందలాది ఎకరాల భూమి భారీ వర్షం దాటికి నామరూపాలు కూడా లేకుండా పోయింది. ఇప్పటికీ పంటపొలాలు చిన్నపాటి నదుల్ని, వాగుల్ని తలపిస్తున్నాయి. దారకొండ పంచాయితీ పరిధిలో రెండు కిలోమీటర్ అవతల ఉన్న కొండ కరిగి మాది మల్లు గ్రామానికి భారీ వృక్షాలు, పెద్ద పెద్ద బండరాళ్లు కొట్టుకు వచ్చాయి. పంట పొలాలన్ని వాగులను తలపిస్తున్నాయి. కొన్ని ఇళ్లను నామారూపాలు లేకుండా చేసింది. ప్రాణ నష్టం జరగక పోవడంతో అందరూ ఊపిరిపీల్చుకున్నారు.

"మేము చిన్నప్పటినుంచి చూస్తున్నాం ఎప్పుడూ ఇలాంటి వర్షాలు కురవలేదు. భారీ వర్షంతో పంటలు, ఇళ్లు మెుత్తం కొట్టుకుపోయాయి. కొండ కరిగి గ్రామంలోకి భారీ వృక్షాలు, పెద్ద పెద్ద బండరాళ్లు కొట్టుకు వచ్చాయి. నిత్యవసర వస్తువులతో పాటు బంగారం, ఆస్తి పత్రాలు సైతం కొట్టుకుపోయాయి. చివరికి తినడానికి బియ్యం కూడా లేవు. పంటలు పండిచడానికి విలులేకుండా భూమి కొతకు గురైంది. కట్టుబట్టలతో బయట నిలబడ్డాం. నష్టం అంచనాలు వేసి ప్రభుత్వమే ఆదుకోవాలి." - బాధితులు

నష్టాన్ని అంచనా వేయడం సులభం కాదు : వరద నీటి తాకిడికి గుడిసెలలో నిల్వ ఉంచుకున్న నిత్యావసర వస్తువులు కూడా వరద పాలవడంతో తినడానికి తిండి కూడా దొరక్క గిరిజనులు ఇబ్బందులు పడుతున్నారు. వరద ధాటికి గిరిజనులు వేసుకున్న పంట భూముల ఆనవాళ్లు కూడా కనిపించకుండా పోయాయి. వరద కారణంగా జరిగిన ఆస్తి నష్టం అంచనాలకు అందని పరిస్థితి నెలకొంది. కొండ ప్రాంతం కావడంతో జరిగిన నష్టాన్ని అంచనా వేయడం కూడా అంత సులభం కాదు. అత్యాధునికమైన సాంకేతికతో కూడిన డ్రోన్‌ కెమెరాలు, జీపీఎస్‌ సర్వే ద్వారా ఆస్తి, పంట నష్టం అంచనాలు వేసి ప్రభుత్వం ఆదుకోవాలని బాధిత గిరిజనులు కోరుతున్నారు.