ఎన్నో ఆశలతో పర్యటకులు - అసౌకర్యాలతో నిరాశ

విదేశీ పక్షులకు ఆలవాలంగా పులికాట్‌ సరస్సు - నాసిరకం పనులతో శిథిలమవుతున్న సౌకర్యాలు

Tourists Disappointment at Pulicat Lake: అందమైన సరస్సు. అందులో రెక్కలు కట్టుకువాలే విదేశీ అతిథులు. పక్షుల కిలకిలారావాలు. కొంగబావ జపాలు. అలా చూస్తూ ఎంతసేపైనా ఉండిపోవచ్చు. రోజంతా గడిపేయొచ్చు. మనసులో ముచ్చటైన జ్ఞాపకాలు మూటకట్టుకోవచ్చు అని అక్కడికి వెళ్లినవారికి నిరాశే మిగులుతోంది. పులికాట్‌ సరస్సు వెంట గత ఐదేళ్లలో చేపట్టిన నాసిరకం నిర్మాణాలు పర్యాటకులకు ఆహ్లాదం పంచలేకపోతున్నాయి.

అతిపెద్ద మంచినీటి చెరువుగా పేరొందిన పులికాట్ సరస్సు విదేశీ పక్షులకు ఆలవాలం. వేసవిలో విదేశీ విహంగాలు విడిదికి ఎక్కువ సంఖ్యలో వస్తుంటాయి. మిగతా రోజుల్లోనూ పులికాట్‌లో ఎంతో కొంత సందడి కనిపిస్తూనే ఉంటుంది. తిరుపతి జిల్లా సూళ్లూరుపేట నియోజకవర్గ పరిధిలో వన్యప్రాణి విభాగం కొన్ని పక్షి సంరక్షణ కేంద్రాలు ఏర్పాటు చేసింది. అక్కడకు వచ్చే పక్షుల సందడిని తిలకించడానికి పర్యాటకులను ఆకర్షించేలా కేంద్ర ప్రభుత్వ స్వదేశీ దర్శన్ పథకం నిధులతో కొన్ని అభివృద్ధి కార్యక్రమాలు చేపట్టారు.

నేలపట్టుకు 5.32 కోట్ల రూపాయలు, అటకానితిప్పలోని పర్యావరణ కేంద్రంలో అభివృద్ధి పనులకు 1.20 కోట్ల రూపాయలు, వేనాడుకు 2 కోట్ల రూపాయలు మంజూరు చేశారు. ఈ నిధులతో సందర్శకులను ఆకట్టుకునేందుకు వీలుగా పలు రకాల అభివృద్ధి పనులకు డిజైన్లు రూపొందించి పనులు చేపట్టారు. వీటిల్లో చిన్న పిల్లలకు, పెద్దలకు ఆహ్లాదకరంగా ఉండేలా నాలుగు ప్రాంతాల్లో పనులు చేశారు. ఆ డబ్బుతో వైఎస్సార్సీపీ హయాంలో చేపట్టిన నిర్మాణాలు వినియోగంలోకి రాకుండానే శిథిలమవుతున్నాయి.

శ్రీహరికోట రోడ్డులోని పులికాట్ సరస్సులో వన్యప్రాణి విభాగం పరిధిలోని ఆటకానితిప్ప వద్ద పర్యావరణ విజ్ఞాన కేంద్రంలో పర్యటకులను ఆకర్షించడంతో పాటు ఆహ్లాద పరిచేలా 30 లక్షల రూపాయలతో నీటికుంట నిర్మాణాలు చేపట్టారు. సందర్శకులకు ఆహార పదార్థాలు అందించడానికి వీలుగా రెస్టారెంట్లు ఏర్పాటు చేశారు. బోటు షికారు కోసం చేపట్టిన నీటికుంటలో మట్టికట్ట జారిపోకుండా ఏర్పాటు చేసిన రివిట్మెంట్‌ నాణ్యతాలోపాలతో పలుచోట్ల కుంగిపోయింది. పులికాట్ సరస్సులోని వేనాడులో సందర్శకుల కోసం రెండు కోట్ల రూపాయలతో నిర్మించిన భవనం ప్రారంభానికి ముందే శిథిలావస్థకు చేరుకుంది.

ఇక సందర్శకులకు ఆహార పదార్థాలు అందించేలా నిర్మించిన రెస్టారెంట్ల పైకప్పు పెచ్చులూడిపోతున్నాయి. పిల్లలు ఆడుకునేందుకు ఏర్పాటు చేసిన పరికరాలు పాడైపోతున్నాయి. కూర్చోడానికి ఏర్పాటు చేసిన బల్లలు కూడా. ధ్వంసమవుతున్నాయి. సరదాగా విహరిద్దామని వచ్చిన పర్యాటకులు పెదవి విరుస్తున్నారు.

వైఎస్సార్సీపీ కాంట్రాక్టర్ల జేబులునింపడమే లక్ష్యంగా పనులు సాగాయని, కనీస నాణ్యత లేదనే విమర్శలున్నాయి. ఇకనైనా నిధులు సద్వినియోగం చేయాలని స్థానికులు కోరుతున్నారు. వేనాడులోని పర్యావరణ, పక్షి సంరక్షణ కేంద్రంలో చేసిన పనులూ ఇలాగే ఉన్నాయనే ఆరోపణలున్నాయి. నిర్మాణాలకు మళ్లీ మెరుగులద్ది వచ్చే వేసవి కల్లా అందుబాటులోకి తెస్తే పర్యాటకులకు సౌకర్యంగా ఉంటుంది.