ఆ ప్రభుత్వ ఆసుపత్రిలో కార్పొరేట్ స్థాయి వైద్యం - క్యూ కడుతున్న జనం - ఎక్కడో తెలుసా? - Story On Nizamabad Govt Hospital

Better Medical Services At Nizamabad Govt Hospital : నిజామాబాద్‌ జిల్లా ప్రభుత్వ ఆసుపత్రిలో సూపర్‌ స్పెషాలిటీ సేవలు అందిస్తున్నారు. అత్యవసర సేవలతో పాటు యూరాలజీ, న్యూరాలాజీ, అంకాలజీ విభాగంలో సేవలు అందిస్తున్నారు. త్వరలోనే నెఫ్రాలజీతో పాటు మరిన్ని సేవలు అందించేందుకు సిద్ధం చేస్తున్నారు. ఆసుపత్రికి ఆ హోదా కల్పించక పోయినా అత్యుత్తమ సేవలు అందిస్తూ పేదలకు అండగా నిలుస్తోంది. వైద్యం చేయించుకునేందుకు జిల్లా ప్రజలతో పాటు కామారెడ్డి, నిర్మల్, మహారాష్ట్ర ప్రజలు సైతం భారీగా వస్తున్నారు. దీన్ని దృష్టిలో పెట్టుకుని ఓపీ సమయాన్ని పెంచి మరిన్ని సేవలు అందించాలని రోగులు విజ్ఞప్తి చేస్తున్నారు.

Better Medical Services At Nizamabad Govt Hospital : నిజామాబాద్‌ ప్రభుత్వ జనరల్‌ ఆసుపత్రి అత్యుత్తమ సేవలతో కార్పొరేట్‌ హాస్పిటల్స్​కు ధీటుగా నిలుస్తోంది. ఆసుపత్రి సూపరింటెండెంట్‌ ప్రతిమారాజ్‌ చొరవతో సేవలందిస్తూ ఆదర్శంగా నిలుస్తోంది. అరుదైన అపరేషన్లు నిర్వహించడంతో పాటు కష్టతరమైన సేవలు అందిస్తూ ఆసుపత్రి పలువురి ప్రశంసలు అందుకుంది.

అధిక వ్యయానికి అయ్యే వైద్య సేవలను పేదలకు ఉచితంగా అందించాలన్న ఉద్దేశంతో సూపర్‌ స్పెషాలిటీని అందుబాటులోకి తెచ్చారు. ఇప్పటికే పలు విభాగాల్లో సేవలు ప్రారంభించగా మరిన్ని ప్రారంభించేందుకు సిద్ధమవుతున్నారు.

Super Specialty Services : ఆంకాలజీ విభాగంలో క్యాన్సర్‌ శస్త్ర చికిత్సలు చేస్తున్నారు. మూడు నెలలుగా రొమ్ము క్యాన్సర్, థైరాయిడ్ క్యాన్సర్ చికిత్సలు అందిస్తున్నారు. హైదరాబాద్, వరంగల్ లోని ప్రభుత్వ ఆసుపత్రుల్లో మాత్రమే అందుబాటులో ఉండే న్యూరాలజీని కూడా నిజామాబాద్​లోనూ ప్రారంభించారు. మహారాష్ట్ర నుంచి వచ్చే వారికీ చికిత్స అందిస్తున్నారు.

నేడు కార్పొరేట్ ఆస్పతుల్లో రూ.5 లక్షల నుంచి 7 లక్షల వరకు ఖర్చయ్యే సేవలను ఉచితంగా అందించి ఎందరికో ఆర్థిక భారం లేకుండా చేస్తున్నారు. ఈ ఆసుపత్రికి సూపర్‌ స్పషాలిటీ హోదా లేకున్నా ప్రత్యేక చొరవ తీసుకుని పేదల కోసం ఈ సేవలు తీసుకొస్తున్నామని ఆసుపత్రి వర్గాలు చెబుతున్నాయి.

గుండె జబ్బులకూ మెరుగైన సేవలందించే దిశగా : ప్రైవేటు ఆసుపత్రిలో గుండెకు స్టంట్ వేయాలంటే రూ.2లక్షల నుంచి రూ.3 లక్షలకు పైనే ఖర్చవుతుంది. ఇప్పటికే స్టంట్లు, ఇతర శస్త్రచికిత్స పరికరాల టెండర్ల ప్రక్రియ పూర్తి కాగా త్వరలో సేవలు ప్రారంభించనున్నారు. ఇప్పటికే హృద్రోగం బారిన పడినవారికి సుమారు 30 వేల రూపాయల విలువైన సూది మందు ఇస్తున్నారు.

త్వరలో నెఫ్రాలజీ సేవలు కూడా అందుబాటులోకి : త్వరలో నెఫ్రాలజీ వైద్య సేవలు సైతం ప్రారంభించేందుకు సిద్ధమయ్యారు. ఇప్పుడు కొనసాగుతున్న విభాగాల్లో ఓపి సమయాన్ని పొడిగించాలని రోగులు కోరుతున్నారు. పరీక్షలు చేసుకున్న అనంతరం వైద్యులకు రిపోర్టులు ఇవ్వాలనుకునే లోపే వారు వెళ్లిపోతుండటంతో ఇబ్బందులు ఎదుర్కొంటున్నామని రోగులు వాపోతుున్నారు. సూపర్‌ స్పెషాలిటీ హోదా లేకున్నా ఆ సేవలు అందించడం పట్ల రోగులు హర్షం వ్యక్తం చేస్తున్నారు.