స్పీకర్ అయ్యన్నపాత్రుడు తొలి సంతకం - ఈటీవీపై ఆంక్షలు తొలగింపు - Speaker Ayyannapatrudu first sign

Speaker Ayyannapatrudu First Sign: అసెంబ్లీలోని స్పీకర్ ఛాంబర్‌లో సభాపతి అయ్యన్నపాత్రుడు బాధ్యతలు తీసుకున్నారు. గత ప్రభుత్వ హయాంలో ఈటీవీకి అనుమతి నిరాకరిస్తూ ఇచ్చిన నిబంధనల దస్త్రాన్ని కొట్టివేస్తూ తొలి సంతకం చేశారు. ఈటీవీపై ఆంక్షలు తొలగించాలంటూ స్పీకర్‌కు ధూళిపాళ్ల నరేంద్ర లేఖ ఇచ్చారు. ఈ మేరకు ఈటీవీ సహా పలు ఛానళ్లపై ఉన్న నిబంధనలను కొట్టివేస్తూ స్పీకర్‌ సంతకం పెట్టారు.

Speaker Ayyannapatrudu First Sign: అసెంబ్లీలోని స్పీకర్ కార్యాలయంలో పూజలు నిర్వహించి సభాపతి అయ్యన్నపాత్రుడు బాధ్యతలు తీసుకున్నారు. ఈ సందర్భంగా గత ప్రభుత్వ హయాంలో ఈటీవీకి అనుమతి నిరాకరిస్తూ ఇచ్చిన నిబంధనల దస్త్రాన్ని కొట్టివేస్తూ సభాపతి అయ్యన్నపాత్రుడు తొలి సంతకం చేశారు. ఈటీవీని సభలోకి రావొద్దనే పిచ్చి నిర్ణయం ఎవరు తీసుకున్నారంటూ అసెంబ్లీ కార్యదర్శిని ఆయన నిలదీశారు.

ఈటీవీపై ఆంక్షలు తొలగించాలంటూ తెలుగుదేశం ఎమ్మెల్యే, సీనియర్ నేత ధూళిపాళ్ల నరేంద్ర స్పీకర్‌ అయ్యన్నకు లేఖ ఇచ్చారు. లేఖను స్వీకరించిన సభాపతి తక్షణమే ఆంక్షలు సడలిస్తూ తొలిసంతకం చేశారు. ఈటీవీ సహా పలు ఛానళ్లపై ఉన్న నిబంధనలను కొట్టివేస్తూ సంతకం చేశారు. అసెంబ్లీ సమావేశాల ప్రసారానికి సంబంధించి అనుమతి నిరాకరిస్తూ గత ప్రభుత్వం ఈటీవీపై నిబంధనలు విధించింది. సభాపతి అయ్యన్న సంతకం చేయడంతో నిబంధనలు తొలగిపోయినట్లయింది.

అంతకు ముందు సభలో ప్రసంగించిన స్పీకర్, సభలో హుందాతనంగా మాట్లాడాలని సభాపతి అయ్యన్నపాత్రుడు తెలిపారు. అవసరమైతే శిక్షణ తరగతులు నిర్వహిస్తామన్న స్పీకర్‌, సమస్యలను ఎలా ప్రస్తావించాలో తెలుసుకోవాలన్నారు. శాసనసభను రాష్ట్ర ప్రజలంతా చూస్తారని, 16వ శాసనసభకు మంచి గుర్తింపు వచ్చేలా అంతా సహకరించాలన్నారు.