She Team Arrest Eve Teasing Persons in Hyderabad : పోకిరీల వేధింపుల బారిన పడుతున్న మహిళలు, యువతులకు షీ బృందాలు అండగా నిలుస్తున్నాయి. బాధితులు ఫిర్యాదు స్వీకరించగానే కార్యాచరణ చేపట్టి నిందితుల ఆగడాలను అరికడుతున్నారు. పాఠశాలలు, కళాశాలలు, బస్టాండ్లు, రైల్వేస్టేషన్లు ఇతర బహిరంగ ప్రదేశాల్లో నిఘా ఏర్పాటు చేసి వారిని పట్టుకుంటున్నారు. అవసరమైతే డెకాయ్ ఆపరేషన్లు నిర్వహించి చర్యలు చేపడుతున్నారు. పట్టుబడిన వారిపై కేసులు నమోదు చేసి కటకటాల వెనక్కి పంపుతున్నారు.
She Team Cases in Rachakonda April Month : రాచకొండ పోలీస్ కమిషనరేట్‌ పరిధిలో 15 రోజుల్లో 133 మంది పోకిరీలను పోలీసులకు పట్టుకున్నారు. గత నెల 16- 30 తేదీల మధ్యలో పోలీసులకు వేధింపులపై 148 ఫిర్యాదులందాయి. ఫోన్ల ద్వారా మహిళలను 17 మంది వేధించగా, సామాజిక మాధ్యమాల్లో 38 మంది, నేరుగా 93 మంది పోకిరీలు వేధింపులకు పాల్పడ్డారు. వీరిలో 11 మందిపై క్రిమినల్ కేసులు నమోదు చేయగా, 92 మందిపై సాధారణ కేసులు నమోదు చేశారు. 40 మంది పోలీసు అధికారులు, నిపుణుల సమక్షంలో కౌన్సిలింగ్‌ నిర్వహించారు.
లవ్ చేస్తానని మోసం చేసిన నిందితుడు : వనస్థలిపురం ప్రాంతంలో నివసిస్తున్న ఓ యువతి ఒక ప్రైవేట్ ఆస్పత్రిలో ల్యాబ్ టెక్నీషియన్‌గా పని చేస్తోంది. ఆమెతో పని చేసే వ్యక్తి తనతో స్నేహం చేసి పూర్తి విషయాలు తెలుసుకొని ప్రేమిస్తున్నానంటూ వెంటపడ్డాడు. తరువాత పెళ్లి చేసుకుంటానని నమ్మించి శారీరకంగా లోబర్చుకున్నాడు. వారు సన్నిహితంగా ఉన్న సమయంలో ఆమెకు తెలియకుండా ఫొటోలు తీశాడు. కొన్ని రోజుల తరువాత ఆమె పెళ్లి చేసుకొమని అడిగితే దానికి నిరాకరించాడు. ఫొటోలను ఆమె బంధువులకు పంపిస్తానని, సామాజిక మాధ్యమాల్లో పోస్ట్ చేస్తానని బెదిరించాడు. బాధితురాలు షీ బృందాల ఆశ్రయించడంతో వనస్థలిపురం పోలీసులు కేసు నమోదు చేసి నిందితుడిని అరెస్టు చేసి రిమాండ్‌కు తరలించారు.
SHE TEAMS: పోకిరీలు, ఆకతాయిలపై షీ టీమ్స్ ఉక్కుపాదం
7 ఏళ్ల బాలికపై అసభ్య ప్రవర్తన : చర్లపల్లిలో నివాసం ఉంటున్న దంపతులకు 7 ఏళ్ల బాలిక ఉంది. సాయంత్రం సమయంలో ఇంటిముందు ఆడుకుంటుండగా, వారి ఇంటి పక్కనే ఉంటున్న నిందితుడు, బాలికను ఇంట్లోకి పిలిచి అసభ్యంగా ప్రవర్తించాడు. ఇంట్లో నుంచి ఏడుస్తూ వచ్చి జరిగిన విషయం బాలిక తల్లికి చెప్పింది. ఆమె షీ టీమ్ పోలీసులకు ఫిర్యాదు చేయగా, నిందితుడిపై చర్లపల్లి పోలీసు స్టేషన్లో పోక్సోతో పాటు క్రిమినల్ కేసు నమోదు చేసి అరెస్టు చేశారు.
వివాహిత ఫొటోలతో వేధింపులు : ఇబ్రహీంపట్నం పోలీస్ స్టేషన్ పరిధిలో నివసించే వివాహితకు చెందిన ఇన్స్టాగ్రామ్ నుంచి ఫొటోలను గుర్తు తెలియని వ్యక్తి డౌన్లోడ్ చేసుకున్నాడు. వాటిని మార్ఫింగ్ చేసి ఫేక్ ఇన్స్టాగ్రామ్ ఐడీతో ఆమె ఫోన్ నంబర్ను జతచేసి కాల్ మీ అంటూ అప్లోడ్ చేశాడు. ఫేక్ ఐడీ వల్ల ఇబ్బంది పడిన బాధితురాలు షీ టీమ్ను ఆశ్రయించగా వారు కేసు నమోదు చేసి నిందితుడిని అరెస్టు చేశారు.
Hyderabad She Team Number : తల్లిదండ్రులు వారి పిల్లల రక్షణ కోసం ప్రత్యేక శ్రద్ధ తీసుకోవాలని, ముఖ్యంగా పిల్లల కదలికలను గమనిస్తూ ఉండాలని పోలీసు ఉన్నతాధికారులు సూచిస్తున్నారు. పోకిరీల వేధింపుల బారిన పడ్డ బాధితులు రాచకొండ వాట్సాప్‌ నంబర్ 8712662111 ద్వారా పోలీసులకు ఫిర్యాదు చేయవచ్చని తెలిపారు. ఫిర్యాదు అందిన వెంటనే స్పందించి షీటీం పోలీసులు చర్యలు చేపడతారని భరోసా ఇచ్చారు.
'భరించొద్దు'.. సైబర్‌ వేధింపులపై విద్యార్థినులకు ‘షి’బృందాల భరోసా
