రహదారి ప్రమాదాల నివారణపై ప్రభుత్వం ఫోకస్​ - భద్రతా చర్యలకు ఆదేశం - Road Accidents Raised In AP

Road Accidents Raised In Andhra Pradesh in YSRCP Regime : గంటకు ఇద్దరు, రోజుకు 58 మంది, నెలకు 1700. ఏడాదికి సగటున 20 వేలు పైనే ఈ గణాంకాలు రాష్ట్రంలో పెరిగిన జనాభా సంఖ్య అనుకుంటే పొరపాటే. గత ఐదేళ్లలో వైఎస్సార్సీపీ ప్రభుత్వ నిర్లక్ష్యంతో రహదారులపై ప్రమాదాల కారణంగా రోడ్డున పడిన వారి సంఖ్య ఇది. లక్షలాది మంది క్షతగాత్రులయ్యారు. గజానికో గుంత, అడుగుకో గొయ్యితో అదుపు తప్పిన వాహనాలకు లెక్కే లేదు. అతి వేగాన్ని అదుపు చేయలేక, సూచికల బోర్డులు లేక, చిన్నపాటి మరమ్మతులకు నోచుకోక, రోడ్డు ప్రమాదాలు నిత్యకృత్యమయ్యాయి. ఈ పరిస్థితులను మార్చే సంకల్పాన్ని కూటమి ప్రభుత్వం తీసుకుంది. భద్రతకు పెద్దపీట వేస్తూ ప్రయాణికుల ప్రాణాలకు భరోసా కల్పించే ప్రయత్నాలు ప్రారంభించింది.

Road Accidents Raised In Andhra Pradesh in YSRCP Regime : గత కొన్నేళ్లుగా తరచూ ఒకే ప్రాంతంలో పలు ఘోర ప్రమాదాలు జరిగాయి. అలాంటి 47 ప్రధాన బ్లాక్ స్పాట్లను గుర్తించిన అధికారులు వీటి నివారణకు తక్షణమే 2.87 కోట్ల నిధులు ఇవ్వాలని అడిగినా వైఎస్సార్సీపీ ప్రభుత్వం ఇవ్వలేదు. కనీసం రోడ్లపై వేసే రంగులకూ నిధులు విదల్చని దుస్థితి. నిధులు, అధికారాలు లేక, రోడ్ సేఫ్టీ కౌన్సిళ్లు నిర్వీర్యమయ్యాయి. ప్రమాదం జరగని, ప్రాణాలు పోని రోజంటూ లేదు. గత ఐదేళ్లలో వైఎస్సార్సీపీ ప్రభుత్వ నిర్లక్ష్యంతో గంటకు ఇద్దరు, రోజుకు 58 మంది, నెలకు 1700. ఏడాదికి సగటున 20 వేలకు పైగానే ప్రమాదాల కారణంగా రోడ్డున పడ్డారు.

దారులు రోజూ నెత్తురోడుతున్నా అడ్డుకట్ట వేయడంలో గత ప్రభుత్వం ఘోరంగా విఫలమైంది. నివారణపై కనీస శ్రద్ధ చూపలేదు. వాహనదారులకు భద్రత, భరోసా కల్పించే విధిని విస్మరించారు. ప్రభుత్వం నుంచి నిధులు రాక, పనులు పూర్తికాక రోడ్లు ప్రమాదాలకు నిలయాలయ్యాయి. దీంతో ఇప్పటికీ రోడ్లపై రక్తపాతం కొనసాగుతూనే ఉంది. కూటమి ప్రభుత్వం రహదారి ప్రమాదాల నివారణపై దృష్టి పెట్టింది. సీఎం చంద్రబాబు రోడ్ సేఫ్టీ కౌన్సిళ్ల బలోపేతానికి నిర్ణయించారు.

తరచూ ప్రమాదాలు జరిపే ప్రదేశాలను గుర్తించి భద్రతా చర్యలు చేపట్టాలని ఆదేశించారు. తనిఖీలు, జరిమానాల ద్వారా వచ్చే సొమ్ములో 30 శాతాన్ని రోడ్ సేఫ్టీ కౌన్సిల్​కు నిధిగా కేటాయించాలన్న నిబంధనలు ఉన్నా జగన్‌ సర్కార్‌ పట్టించుకోలేదన్నారు. అందుకే ఏటా కనీసం 100 కోట్ల రూపాయలు రోడ్ సేఫ్టీ కౌన్సిల్​కు జమ చేయాలని తొలి విడతగా 40 కోట్ల నిధులు విడుదల చేస్తున్నట్లు సీఎం తెలిపారు. దీంతో రోడ్ సేప్టీ కౌన్సిల్ ద్వారా త్వరలోనే బ్లాక్ స్పాట్ల నిర్మూలన కార్యక్రమాన్ని చేపట్టనున్నారు.

'రోడ్లపై అతి వేగంగా వస్తోన్న వాహనాలను గుర్తించేందుకు స్పీడ్ గన్లు, బ్రీత్ ఎనలైజర్లు, డ్యాష్ బోర్డు కెమెరాలు, ట్యాబ్స్ కొనుగోలు కోసం 10.69 కోట్లు ఇవ్వాలని ప్రతిపాదనలు పంపగా గత ప్రభుత్వం మూలన పడేసింది. వీటికి కూటమి ప్రభుత్వం నిధులు కేటాయించింది.రహదారులపై వేగంగా వస్తోన్న వాహనాలను గుర్తించి వారికి జరిమానాలు విధించడం సహా తగిన చర్యలు తీసుకునేందుకు నిధులు అవసరం. వాటిని ఇవ్వాలని కోరినా గత ప్రభుత్వం పట్టించుకోలేదు. సీఎం చంద్రబాబు వీటన్నింటికీ తక్షణం నిధులు కేటాయింపులు జరిపి కొనుగోలు చేయాలని ఆర్థిక శాఖ అధికారులను ఆదేశించారు. రోడ్ సేఫ్టీ ఆడిట్, ఏటీఎస్​ నిర్వహణ కోసం కన్సల్టెల్సీకి 45 లక్షలు ఇవ్వాల్సి ఉండగా వైఎస్సార్సీపీ ప్రభుత్వం ఇవ్వలేదు. దీన్ని వెంటనే మంజూరు చేయాలని సీఎం ఆదేశించారు.' -మనీష్ కుమార్ సిన్హా , రవాణాశాఖ కమిషనర్

రోడ్లపై గుంతలు పూడ్చే కార్యక్రమం ఆర్​ అండ్ బీ అధికారుల పర్యవేక్షణలో ప్రస్తుతం వేగంగా జరుగుతోంది. పీపీపీ మోడ్​లో రహదారులు అభివృద్ధికి కార్యాచరణ సిద్ధం చేస్తున్నారు.