REVENUE MEETINGS ACROSS AP: రెవెన్యూ సమస్యల పరిష్కారం కోసం రాష్ట్రవ్యాప్తంగా ప్రభుత్వం సదస్సులు ప్రారంభించింది. ముఖ్యమంత్రి చంద్రబాబు ఆదేశాలతో నిర్వహిస్తున్న ఈ సదస్సులు జనవరి 8 వరకు జరగనున్నాయి. ప్రారంభ కార్యక్రమాల్లో రెవెన్యూ శాఖ మంత్రి అనగాని సత్యప్రసాద్‌ సహా పలువురు ప్రజాప్రతినిధులు పాల్గొన్నారు. సదస్సులను సద్వినియోగం చేసుకుని సమస్యలు పరిష్కరించుకోవాలని అనగాని పిలుపునిచ్చారు.
నెల రోజుల్లోపు పరిష్కరిస్తారం: రాష్ట్ర వ్యాప్తంగా రెవెన్యూ సదస్సులు ప్రారంభమయ్యాయి. బాపట్ల జిల్లా రేపల్లె మండలం పెటేరులో సదస్సును ప్రారంభించిన రెవెన్యూ శాఖ మంత్రి అనగాని సత్యప్రసాద్‌ ప్రజల నుంచి వినతులు స్వీకరించారు. పేద ప్రజలకు ఈ సదస్సు ఎంతో ఉపయోగకరమన్న అనగాని, అందరూ సద్వినియోగం చేసుకోవాలని పిలుపునిచ్చారు. నెల్లూరులో నిర్వహించిన రెవెన్యూ సదస్సులో పురపాలకశాఖ మంత్రి నారాయణ పాల్గొన్నారు. కలెక్టర్‌ ఆనంద్‌, ఆర్డీవో అనూషతో కలిసి ప్రజల నుంచి వినతులు స్వీకరించారు. రెవెన్యూ సమస్యలను అధికారులు నెల రోజుల్లోపు పరిష్కరిస్తారని నారాయణ వెల్లడించారు.
సమస్యలను పరిష్కరించుకోండి: పార్వతీపురం జిల్లా పాలకొండ మండలం కొండాపురంలో రెవెన్యూ సదస్సును మహిళా శిశు సంక్షేమ, గిరిజన శాఖ మంత్రి సంధ్యారాణి ప్రారంభించారు. డీ-పట్టా సమస్యలు వివాదాలకు ప్రధానమైనవన్న మంత్రి, వాటిని పరిష్కరించడంలో శ్రద్ధ వహించాలని అధికారులకు సూచించారు. విజయనగరం జిల్లా బొండపల్లి మండలం గొట్లాంలో నిర్వహించిన సదస్సుకు మంత్రి కొండపల్లి శ్రీనివాస్‌ హాజరయ్యారు. ఈ సదస్సులను వినియోగించుకుని ప్రజలంతా తమ సమస్యలు పరిష్కరించుకోవాలని ఆయన పిలుపునిచ్చారు.
భూ వివాదాల పరిష్కారానికి రెవెన్యూ సదస్సులు - షెడ్యూల్ ఇదే
కృష్ణా జిల్లా పామర్రు మండలం యలకుర్రులో నిర్వహించిన రెవెన్యూ సదస్సులో స్థానిక ఎమ్మెల్యే వర్ల కుమార్‌ రాజా పాల్గొన్నారు. వైఎస్సార్సీపీ హయాంలో రీసర్వే వల్ల వచ్చిన సమస్యలను పరిష్కరించుకోవాలని రైతులకు సూచించారు. శ్రీసత్యసాయి జిల్లా పుట్టపర్తి మండలం కొట్టపల్లిలో నిర్వహించిన సదస్సులో పాల్గొన్న స్థానిక ఎమ్మెల్యే పల్లె సింధూర రెడ్డి ఆర్డీవో సువర్ణతో కలిసి ఫిర్యాదులు స్వీకరించారు.
అనంతపురం జిల్లా ప్రసన్నాయపల్లిలో నిర్వహించిన సదస్సులో పాల్గొన్న ఎమ్మెల్యే దగ్గుపాటి ప్రసాద్, హయాంలో జరిగిన భూ అక్రమాలను పరిష్కరించేందుకు కృషి చేస్తామని తెలిపారు. ఉరవకొండ సదస్సులో పాల్గొన్న తహసీల్దార్‌ మహబూబ్‌ బాషా అక్కడికక్కడే రైతుల సమస్యలు కొన్నింటిని పరిష్కరించారు. కర్నూలు సమీపంలోని పెద్దపాడు వద్ద కలెక్టర్‌ రంజిత్‌ బాషా ఆధ్వర్యంలో నిర్వహించిన సదస్సులో ఎమ్మెల్యే గౌరు చరితారెడ్డి పాల్గొన్నారు. కోర్టు పరిధిలోని సమస్యలు, కుటుంబ వివాదాలు తప్ప మిగిలిన సమస్యలన్నీ పరిష్కరిస్తామని తెలిపారు.
"రెవెన్యూ సదస్సులను ఒక యజ్ఞంలా నిర్వహిస్తాం. అన్నిరకాల భూసమస్యల పరిష్కారమే లక్ష్యంగా సదస్సులు నిర్వహిస్తాం. సదస్సుల నిర్వహణలో అధికారులు తప్పుచేస్తే కఠిన చర్యలు తప్పవు. గత వైఎస్సార్సీపీ ప్రభుత్వం పాపాల వల్ల భూ సమస్యలు వెంటాడుతున్నాయి". - అనగాని సత్యప్రసాద్‌, రెవెన్యూ శాఖ మంత్రి
భూసమస్యలు పరిష్కారమే లక్ష్యం - 'భూమి-మీ హక్కు' రెవెన్యూ సదస్సులు
