CID Inquiry into PDS Rice Smuggling : విశాఖ, కాకినాడలో జరిగిన సంఘటనలు, రాష్ట్రంలో పీడీఎస్ రైస్ స్మగ్లింగ్ పైన సీఎం చంద్రబాబు దృష్టి పెట్టారని ఈ వ్యవహారం మీద సీబీసీఐడీ విచారణకు ఆదేశించారని పౌరసరఫరాల శాఖ మంత్రి నాదెండ్ల మనోహర్ చెప్పారు. విశాఖ కలెక్టర్ ఆఫీసులో మాట్లాడిన ఆయన బియ్యం అక్రమ రవాణాపై 1066 కేసులు నమోదు చేశామని తెలిపారు. కోటి ఇరవై టన్నుల బియ్యం అక్రమ రవాణా జరిగిందని చెప్పారు. విశాఖలో ప్రాంతీయ సదస్సు నిర్వహించామని, రైస్ మిల్లర్ల అసోసియేషన్ ప్రభుత్వంతో కలిసి పని చేయాలని సూచించారు. ఉత్తరాంధ్రలో ధాన్యం కొనుగోలు చేస్తున్నట్టు చెప్పారు.
పది రోజుల్లో 10.59 లక్షల టన్నుల ధాన్యం కొనుగోలు చేశామన్నారు. ఒక్క ఉత్తరాంధ్రలోనే 1.69లక్షలు మెట్రిక్ టన్నుల ధాన్యం కొనుగోలు చేసి 229 కోట్ల నిధులు 24 గంటల్లో రైతుల ఖాతాల్లో జమ చేశామన్నారు. గత వైఎస్సార్సీపీ ప్రభుత్వంలో ఈ సమయానికి 2092 మెట్రిక్ టన్నులు మాత్రమే కొన్నారని తెలిపారు. ఐదు రోజులు ఉత్తరాంధ్రలో పర్యటిస్తానన్న మనోహర్.. విశాఖ, కృష్ణ పట్నం పోర్ట్లు కంటే రెండింతలు బియ్యం కాకినాడ పోర్ట్ నుంచి వెళ్లిపోయిందని చెప్పారు.
కాకినాడ పోర్ట్ ద్వారా బియ్యం తరలింపులో కొందరు సీనియర్ అధికారులు ఉన్నారని, ఆ విషయం తనకెంతో బాధ కలిగించిందని చెప్పారు. స్టెల్లా షిప్లో ప్రతి అణువణువు కాకినాడ కలెక్టర్ ఆధ్వర్యంలో తనిఖీ జరుగుతోందని, అక్రమ బియ్యం రవాణా అంశాలలో ఇప్పటి వరకు 729 మందిపై కేసులు నమోదు చేసి 102వాహనాలు సీజ్ చేశామని నాదెండ్ల వివరించారు.
విశాఖ కలెక్టర్ కాన్ఫరెన్స్ హాల్ లో ప్రాంతీయ పౌర సరఫరాల శాఖ అధికారుల సమీక్ష జరిగింది. ఈ సమీక్ష కు ముఖ్య అతిధిగా పౌర సరఫరాల శాఖ మంత్రి నాదెండ్ల మనోహర్ పాల్గొన్నారు. సమీక్ష లో విశాఖ అనకాపల్లి అల్లూరి మన్యం శ్రీకాకుళం, విజయనగరం, జిల్లాల జాయింట్ కలెక్టర్లు, పౌర సరఫరాలశాఖ ఉన్నతాధికారులు పాల్గొన్నారు. ధాన్యం కొనుగోలు, రేషన్ పంపిణీ, రేషన్ షాపుల మానిటరింగ్, నిత్యావసర ధరల పరిశీలన, దీపం 2.0 తదితర అంశాలపై మంత్రి నాదెండ్ల మనోహర్ సమీక్ష జరిపారు.
రేషన్ బియ్యం అక్రమ రవాణాపై కఠిన చర్యలు - మంత్రివర్గ ఉపసంఘం నిర్ణయం
బెదిరించి అరబిందోకు వాటా రాయించుకున్నారు- తరువాతే రూ.45 వేల కోట్ల బియ్యం ఎగుమతి
బియ్యం అక్రమ ఎగుమతి వెనక పెద్దవాళ్లు - ఓడలోకి వెళ్లకుండా అడ్డుకున్నారు: పవన్ కల్యాణ్
