INS Nirdeshak Ship to Nation : నౌకాదళం హైడ్రో గ్రాఫిక్ సర్వేల కోసం ఉద్దేశించిన INS నిర్దేశక్ నౌకను బుధవారం జాతికి అంకితం చేయనున్నారు. విశాఖ నావెల్ డాక్ యార్డ్లో జరగనున్న ఈ కార్యక్రమానికి రక్షణ శాఖ సహాయ మంత్రి సంజయ్ సేత్ పాల్గొని నిర్దేశక్ నౌకను జాతికి అంకితమిస్తారు. కోల్కత్తాలోని జీఆర్ఎస్ఈలో దేశీయంగా 80 శాతం పరికరాలతో ఐఎన్ఎస్ నిర్దేశక్ నౌక నిర్మాణం జరిగింది. 110 మీటర్ల పొడవు, 3800 టన్నుల బరువైన ఈ నౌకను రెండు ఇంజిన్లతో రూపకల్పన చేశారు.
అత్యాధునిక పరికరాలతో నిర్దేశక్ నౌక: అత్యాధునిక హైడ్రో గ్రాఫిక్, ఓషనో గ్రాఫిక్ సర్వే పరికరాలతో ఈ నిర్దేశక్ను తీర్చిదిద్దారు. హైడ్రోగ్రాఫిక్ సర్వేలకు సంబంధించిన రెండో నౌక ఇదే కావడం గమనార్హం. గతంలో 32 ఏళ్ల పాటు భారత నౌకాదళంలో సేవలందించి 2014లో వీడ్కోలు తీసుకున్న నిర్దేశక్ స్ధానంలో ఈ కొత్త నౌక రూపుదిద్దుకుంది. 25 రోజుల పాటు నిరంతరాయంగా 18 నాట్ల గరిష్ట వేగంతో ప్రయాణించడం ఈ నౌక ప్రత్యేకత.
నౌకాసంపత్తిని పెంచుకునేందుకు: హిందూ మహా సముద్ర పరిసర ప్రాంతాల్లో భారత్ అత్యంత వ్యూహాత్మకంగా వ్యవహరించడం కోసం హైడ్రోగ్రాఫిక్ సర్వేలను నిర్దేశక్ నౌక చేపడుతుంది. స్నేహపూర్వకంగా ఉన్న దేశాల నౌకాదళాలతో సైతం అవసరమైన మేరకు సమాచారం కూడా పంచుకుంటుంది. భారత నౌకాదళంలో ఐఎన్ఎస్ సంధాయక్ తర్వాత ఈ నిర్దేశక్ నౌక హైడ్రో గ్రాఫిక్ సర్వే సమాచారం కోసం వినియోగంలోకి రానుంది. ఈ తరహా నౌకా సంపత్తి ఉన్నదేశాల కంటే ధీటుగా హిందూ మహాసముద్ర ప్రాంతంలో భారత్ తన ప్రాబల్యాన్ని పెంచుకునేందుకు ఇది తోడ్పడనుంది.
నిధులున్నా పనులు నిల్.. వ్యయంలో ప్రభుత్వ నియంత్రణతో నిరాశ
