జగన్‌ ప్రభుత్వంలో అన్నీతానై - ధనుంజయ్‌రెడ్డిపై నిఘా వర్గాల దృష్టి

గత ప్రభుత్వంలో కీలక అధికారి అయిన విశ్రాంత ఐఏఎస్ ధనుంజయ్ రెడ్డిపై ఇంటెలిజెన్స్ నిఘా - కొన్ని కీలక పోస్టింగ్‌లలో ఇప్పటికీ ప్రభావం చూపిస్తున్నారనే అంశంరై చర్చ

Intelligence Focused on Retired IAS Dhanunjay Reddy: గత ప్రభుత్వంలో సీఎంవో కేంద్రంగా చక్రం తిప్పిన విశ్రాంత ఐఏఎస్​ అధికారి ధనుంజయ్‌రెడ్డి ఇప్పటికీ ప్రభావం చూపుతున్నారనే చర్చ జోరుగా సాగుతోంది. జగన్‌ ప్రభుత్వ నిర్ణయాలన్నింటిలో అన్నీతానై నడిపించిన ధనుంజయ్‌రెడ్డి జోలికి కూటమి సర్కార్‌ వెళ్లకపోవడంపై విమర్శలు వస్తున్నాయి. కొన్ని కీలక పోస్టింగ్‌లలో ఇప్పటికీ ప్రభావం చూపిస్తున్నారనే అంశం చర్చనీయాంశంగా మారింది. గత ప్రభుత్వంలో కీలకంగా ఉన్నవారికి ఇప్పుడు ముఖ్యమైన బాధ్యతలు అప్పగించడంలో ధనుంజయ్‌రెడ్డి హస్తం ఉందన్న ప్రచారంతో నిఘావర్గాలు దృష్టి సారించాయి.

ధనుంజయ్‌రెడ్డి కనుసన్నల్లోనే అక్రమాలు: గతంలో జగన్‌కు అత్యంత సన్నిహితంగా వ్యవహరించిన కొందరు ఐఏఎస్​లతో ధనుంజయ్‌రెడ్డి సంబంధాలు కొనసాగిస్తున్నట్లు తెలుస్తోంది. రాష్ట్రంలో ప్రభుత్వం మారి 6 నెలలవుతున్నా ఇప్పటికీ ఆయన హవా కొనసాగుతుండటంపై ప్రభుత్వ వర్గాలు ఆశ్చర్యం వ్యక్తం చేస్తున్నాయి. సచివాలయంలో పనిచేసే కొందరు కీలక ఉద్యోగులతో ధనుంజయ్‌రెడ్డి టచ్‌లో ఉంటూ గుట్టుచప్పుడు కాకుండా పనులు చక్కబెడుతున్నారని సమాచారం. పనిలో పనిగా కూటమి ప్రభుత్వ పరిణామాలపై ధనుంజయ్‌రెడ్డి కూపీ లాగుతున్నారనే అంశం కలకలం రేపుతోంది.

తన మనుషుల ద్వారా అయినవారికి మంచి పోస్టింగ్‌లు ఇప్పించుకున్నట్టు చర్చ జరుగుతోంది. రుషికొండపై రాజకోట నిర్మాణం సహా వివిధ అంశాల్లో వైఎస్సార్సీపీతో అంటకాగిన అధికారులకు మంచి పోస్టింగ్‌లు దక్కడంపై కొందరు ఐఏఎస్​లు విస్మయం వ్యక్తం చేస్తున్నారు. వైఎస్సార్సీపీ పాలనలో ధనుంజయ్‌రెడ్డి కనుసన్నల్లోనే మైనింగ్, భూఅక్రమాలు జరిగాయనే ఆరోపణలు ఉన్నాయి. వైఎస్సార్సీపీ నాయకుల అవినీతి, అక్రమాలకు ధనుంజయ్‌రెడ్డే సాక్ష్యమంటూ గతంలో టీడీపీ కూడా పెద్దఎత్తున ఆరోపణలు చేసింది.

సోషల్ మీడియా పోస్టుల్లోనూ ధనుంజయ్‌రెడ్డి హస్తం: అప్పట్లో సీఎం పేషీలో ధనుంజయ్‌రెడ్డి చెప్పనిదే ఏ ఫైలూ కదిలేది కాదని, ఆయన చెబితే తప్ప కాంట్రాక్టర్లకు బిల్లులు చెల్లించేవారు కాదన్న విషయం అందరికీ తెలిసిందే. ఎన్నికల సమయంలో ఉద్యోగ విరమణ తర్వాత కొంతకాలం సైలెంట్‌గా ఉన్న ధనుంజయ్‌రెడ్డి మళ్లీ యాక్టివ్ అయ్యారనే చర్చ ప్రభుత్వ వర్గాల్లో జరుగుతోంది.

గత ప్రభుత్వ హయాంలో చేసిన తప్పిదాలు, అక్రమాల వ్యవహారంలో జరుగుతున్న విచారణలపై గుట్టుగా కూపీ లాగేందుకు ధనుంజయ్‌రెడ్డి ప్రయత్నిస్తున్నట్లు తెలుస్తోంది. అలాగే ప్రభుత్వంలో ఏం జరుగుతోందనే అంశంపైనా సన్నిహిత అధికారులు, సచివాలయ ఉద్యోగుల నుంచి సమాచారం సేకరిస్తున్నారని చర్చ జరుగుతోంది. గత ప్రభుత్వంలో తన మాట వినని అధికారులకు ఇప్పటి కూటమి ప్రభుత్వంలో కూడా పోస్టింగులు రాకుండా ధనుంజయ్ రెడ్డి తెర వెనక మంత్రాంగం చేస్తూ అడ్డుకుంటున్నారనే వార్తలు వినిపిస్తున్నాయి.

ప్రభుత్వ అంతర్గత విచారణలు, విజిలెన్స్ విచారణలకు ఆధారాలు దొరక్కుండా చేసే ప్రయత్నాల్లో ఉన్నట్లు సమాచారం. ప్రభుత్వంతో పాటు కొందరు అధికారుల గురించి సామాజిక మాధ్యమాల్లో తప్పుడు ప్రచారం చేయించడంలోనూ ధనుంజయ్‌రెడ్డి హస్తం ఉందనే సందేహాలు వ్యక్తమవుతున్నాయి. ఈ విషయాలు తెలిసి అప్రమత్తమైన ప్రభుత్వం నిఘావర్గాల ద్వారా ఈ వ్యవహారంపై ఆరా తీస్తోంది. ధనుంజయ్‌రెడ్డితో ఎవరెవరు టచ్‌లో ఉన్నారో తెలుసుకుంటోంది.