విశాఖ రైల్వేస్టేషన్‌ ఘటన- కుట్ర ఉందన్న కోణంలో అధికారుల విచారణ - fire accident in korba express

Fire Accident at Visakhapatnam Railway Station: విశాఖ రైల్వేస్టేషన్‌లో ఓ రైలులో మంటలు చెలరేగడం కలకలం రేపింది. ఛత్తీస్‌గఢ్‌ కోర్బా నుంచి వచ్చిన ఎక్స్‌ప్రెస్‌ రైలును ప్లాట్‌ఫామ్‌పై నిలిపి ఉంచారు. రైలులో ఒక్కసారిగా మంటలు చెలరేగడంతో 3 ఏసీ బోగీలు దగ్ధమయ్యాయి. వెంటనే అప్రమత్తమైన సిబ్బంది మంటలను అదుపు చేయడంతో అంతా ఊపిరిపీల్చుకున్నారు.

Fire Accident at Visakhapatnam Railway Station: విశాఖ రైల్వేస్టేషన్‌లో నిలిపి ఉంచిన కోర్బా ఎక్స్ ప్రెస్ రైల్లో మంటలు ఎగసిపడడం తీవ్ర అలజడి సృష్టించింది. కోర్బా నుంచి వచ్చిన రైలును ఆదివారం ఉదయం నాలుగో నంబరు ప్లాట్ ఫారంపై నిలిపి ఉంచారు. 9 గంటల 20 నిమిషాలకు రైల్లోని B-7 బోగీలో మంటలను గుర్తించారు. వెంటనే మంటలు B-6, M-1 బోగీలకు వ్యాపించాయి. అగ్ని కీలల ధాటికి B-6, B-7, M1 బోగీలు దగ్ధమయ్యాయి. సీట్లన్నీ కాలి బూడిదయ్యాయి.

రైల్లో మంటలను గుర్తించిన వెంటనే రంగంలోకి దిగిన అగ్నిమాపక సిబ్బంది 4 యంత్రాలతో బోగీలపై నీళ్లు చల్లి మంటలను అదుపు చేశారు. స్టేషన్​లో ఉన్న ప్రయాణికులను ఘటనా స్థలి నుంచి దూరంగా తరలించారు. ఎవరికీ ఇబ్బంది కలగకుండా చర్యలు తీసుకున్నారు. అగ్నిప్రమాదానికి షార్ట్ సర్క్యూట్ కారణమని రైల్వే సిబ్బంది భావిస్తున్నారు.

ప్రమాద సమయంలో రైల్లో ఎవరూ లేనందున ప్రాణనష్టం సంభవించలేదని విశాఖ పోలీస్ కమిషనర్ తెలిపారు. ఉదయాన్నే వచ్చిన ప్రయాణికులంతా రైలు దిగి వెళ్లిపోయారని, ఆ తర్వాతే ప్రమాదం జరిగిందన్నారు. మంటలను గుర్తించిన వెంటనే రైల్వే సిబ్బంది, పోలీసులు అప్రమత్తమయ్యారని తెలిపారు. దగ్ధమైన బోగీలను రైలు నుంచి వేరు చేసినట్లు చెప్పారు.

అగ్నిమాపక సిబ్బంది సమర్థంగా పనిచేసి గంటన్నరలోనే మంటలను పూర్తిగా అదుపులోకి తెచ్చారని విశాఖ సహాయ అగ్నిమాపకశాఖ అధికారి సింహాచలం తెలిపారు. రైల్లో ఇన్ ఫ్లేమబుల్ మెటీరియల్ ఉండటం వల్ల మంటలు వేగంగా వ్యాప్తించినట్లు చెప్పారు. కోర్బా ఎక్స్ ప్రెస్ ప్రమాదంపై విచారణ జరపాలని స్థానిక బీజేపీ నేతలు డిమాండ్‌ చేశారు. ఇందులో కుట్ర కోణం ఏమైనా ఉందేమోనన్న అనుమానం వ్యక్తం చేశారు. రైలు ప్రమాదంపై హోంశాఖ మంత్రి వంగలపూడి అనిత స్పందించారు. డీఆర్​ఎంతో ఫోన్లో మాట్లాడి ప్రమాద వివరాలు అడిగి తెలుసుకున్నారు. ఘటన తర్వాత రైల్వే బోగీలను మార్చి గమ్యస్థానానికి పంపినట్లు అధికారులు తెలిపారు.

"ట్రైన్​లో ఇన్​ఫ్లేమబుల్ మెటీరియల్స్ చాలా ఉంటాయి. అందుకే మంటలను అదుపులోకి తీసుకురావడానికి టైమ్ పట్టింది. అగ్నిమాపక సిబ్బంది చాలా మంచిగా, వేగంగా స్పందించారు. చాకచక్యంగా వ్యవహరించి మంటలను అదుపులోకి తీసుకొచ్చారు. కొంతమంది ప్రయాణికులు షార్ట్ సర్క్యూట్ వలన ప్రమాదం జరిగిందని చెప్తున్నారు. కానీ కారణం ఏమిటి అనేది దర్యాప్తు చేయడం జరుగుతుంది. ఫోరెన్సిక్ ఎవిడెన్స్ సేకరించి పరిశీలించడం జరుగుతుంది". - శంకబత్ర బాగ్చీ, విశాఖ సీపీ

"మేము వెంటనే వచ్చాము. ఫ్లాట్ ఫారంకి రావడం ఇబ్బందిగా ఉంటే, బయట నుంచే మంటలను అదుపుచేయడం ప్రారంభించాము. అయిదు నిమిషాలలో మంటలను అదుపులోకి తెచ్చిన తరువాత, వాటిని స్ప్రెడ్ అవకుండా చర్యలు తీసుకున్నాము. మంటలు అధిక మొత్తంలో వచ్చినప్పటికీ కూడా ఫ్లాట్​ ఫారం మీద ఉన్న ప్రయాణికులకి, షాపులకి దేకిని కూడా స్ప్రెడ్ అవకుండా అదుపుచేశాము". - సింహాచలం, అగ్నిమాపకశాఖ అధికారి