Farmers Opinion on Rythu Bharosa Scheme in Karimnagar : రైతు భరోసా అమలు విధి విధానాలపై రైతుల అభిప్రాయ సేకరణకు ఏర్పాటైన కేబినెట్ సబ్ కమిటీ ఉమ్మడి కరీంనగర్ జిల్లా రైతులతో ముచ్చటించింది. కరీంనగర్లో ఏర్పాటు చేసిన సమావేశానికి వ్యవసాయ శాఖ మంత్రి తుమ్మల నాగేశ్వర్రావుతో పాటు జిల్లా ఇంఛార్జి మంత్రి ఉత్తమ్ కుమార్ రెడ్డి, మంత్రులు శ్రీధర్ బాబు, పొంగులేటి శ్రీనివాస్ రెడ్డి, పొన్నం ప్రభాకర్, ఎమ్మెల్సీ జీవన్ రెడ్డి, పెద్దపల్లి ఎంపీ గడ్డం వంశీకృష్ణతో పాటు ప్రజాప్రతినిధులు, అధికారులు హాజరయ్యారు.
గత పదేళ్ల కాలంలో రైతులకు పంటల బీమా సదుపాయం లేదని కాంగ్రెస్ ప్రభుత్వం రైతుల వాటా కూడా చెల్లించి రైతులకు అందుబాటులోకి తీసుకురావాలని ఎమ్మెల్సీ జీవన్రెడ్డి సూచించారు. రైతులకు మంచి చేద్దామని చూస్తుంటే బీజేపీ, బీఆర్ఎస్ నేతలు విమర్శలు చేస్తున్నారని మంత్రి శ్రీధర్ బాబు ఎద్దేవా చేశారు. ఆర్థికపరంగా ఇబ్బందులున్నా రుణమాఫీకి రూ.31 వేల కోట్లు కేటాయించి రూ.లక్ష లోపు రుణాలను మాఫీ చేశామన్నారు. రుణమాఫీపై ఎప్పుడూ మాట్లాడని కేటీఆర్, కేంద్రమంత్రి బండి సంజయ్ గతంలో రైతు సమస్యలపై ఎప్పుడైనా మాట్లాడారా అంటూ ప్రశ్నించారు.
రైతు భరోసా, రుణమాఫీకి తేడా తెలియని వారు పదేళ్లు పరిపాలించారు : రైతు భరోసా ఏమేరకు ఇవ్వాలనే అంశం ఎలాంటి నిర్ణయాన్ని ఇప్పటివరకు ప్రభుత్వం తీసుకోలేదు. అందువల్లనే మీ వద్దకు వచ్చి అభిప్రాయాలు తీసుకుంటున్నాం. ఇన్కంట్యాక్స్ ఫైల్ చేసే రైతులకు రైతు భరోసా ఇవ్వరని కొంతమంది గోబెల్స్ ప్రచారం చేస్తున్నారు. రైతుభరోసా నిధులు రుణమాఫీ కోసం ఖర్చు పెట్టారని అంటున్నారు. రైతు భరోసా, రైతు రుణమాఫీకి తేడా తెలియనివారు పదేళ్ల పాటు ఎలా పాలించారో అర్థం కావడం లేదు. కుటుంబాన్ని గుర్తించడానికే రేషన్ కార్డు ప్రస్తావన తీసుకువస్తే రేషన్ కార్డు ఉన్న వాళ్లకు ఇస్తారని దుష్ప్రచారం చేశారు. అని మంత్రి పొంగులేటి శ్రీనివాస్ రెడ్డి ధ్వజమెత్తారు.
రైతు భరోసాపై అభిప్రాయ సేకరణ : గత ప్రభుత్వం రైతుల పేరిట రూ.25 వేల కోట్ల నిధులు దుర్వినియోగం చేసిందని మంత్రి తుమ్మల నాగేశ్వరరావు విమర్శించారు. ఈ ప్రభుత్వం ప్రతి పైసా నిజమైన లబ్ధిదారులకు అందించాలన్న ఉద్దేశ్యంతోనే కసరత్తు చేస్తోందన్నారు. కౌలు రైతులకు కూడా రైతుభరోసా ఇస్తామని మంత్రి శ్రీధర్ బాబు హామీ ఇచ్చారని గుర్తు చేశారు. అయితే వారికి ఎలా ఇస్తే బాగుంటుందో రైతుల అభిప్రాయం కోసం ఫామ్లు ఇచ్చారని ఆలస్యమైనా ఫర్వాలేదు రైతులు తమ అభిప్రాయాలు తెలపాలని సూచించారు. రైతులు పంటబీమా ఇవ్వాలని అడుగుతున్నారని, తప్పకుండా రైతుల వాటా కూడా ప్రభుత్వమే చెల్లించి పరిహారం అందేలా చూస్తామన్నారు.
