Disability Relief Scheme for Workers in TG : కూలి పనులు చేస్తూ జీవితం సాగించే కుటుంబాల్లో.. ఇంటిపెద్ద ఏదైనా ప్రమాదానికి గురై వైకల్యం సంభవిస్తే ఆ కుటుంబ పరిస్థితి హృదయ విదారకంగా ఉంటుంది. ఇలాంటి దీన స్థితిలో ఉండేవారికి అండగా ఉండేందుకు తెలంగాణ ప్రభుత్వం.. "డిసేబిలిటీ రిలీఫ్ స్కీమ్ను తీసుకొచ్చింది. తెలంగాణ భవన, ఇతర కార్మిక సంక్షేమ మండలి, కార్మిక సంక్షేమ శాఖ ఆధ్వర్యంలో ఈ పథకాన్ని అమలు చేస్తున్నారు.
ఈ స్కీమ్ ద్వారా పని ప్రదేశంలో ఏదైనా ప్రమాదం జరిగి కార్మికుడికి శాశ్వత వైకల్యం సంభవిస్తే.. రూ.5 లక్షల వరకు ఆర్థిక సాయం, అదే.. పాక్షిక వైకల్యానికి రూ.4 లక్షల వరకు రిలీఫ్ ఫండ్ అందిస్తోంది. మరి.. ఇందుకు కావాల్సిన అర్హతలు ఏంటి? ఏ ఏ పత్రాలు అవసరం? ఎలా దరఖాస్తు చేసుకోవాలి? వంటి పూర్తి వివరాలు ఈ స్టోరీలో తెలుసుకుందాం.
అర్హతలు :
- ఆర్థిక సాయం పొందాలనుకుంటున్న బాధిత కార్మికుడు తెలంగాణ భవన, ఇతర నిర్మాణ రంగ కార్మికుల సంక్షేమ బోర్డులో సభ్యుడై ఉండాలి. అంటే.. రాష్ట్ర ప్రభుత్వం కార్మికులకు జారీ చేసే గుర్తింపు కార్డు(Labour Card) కలిగి ఉండాలన్నమాట.
- పనిచేస్తున్న ప్రదేశంలో ప్రమాదం కారణంగా వైకల్యం సంభవించి ఉండాలి.
దరఖాస్తు కోసం కావాల్సిన పత్రాలు :
- కార్మికుడి ఆధార్ కార్డ్
- బాధిత కార్మికుడి రిజిస్ట్రేషన్ కార్డ్(ఒరిజినల్)
- దరఖాస్తుదారుడి పాస్‌పోర్ట్ సైజ్ ఫొటో
- రెన్యూవల్ చలాన్ కాపీ
- డిసేబిలిటీ సర్టిఫికెట్(అధికారులు జారీ చేసినది)
- FIR కాపీ (పోలీస్ కేసు నమోదైతే)
- అడ్వాన్స్ స్టాంపెడ్ రశీదు
- బ్యాంక్ పాస్‌బుక్ కాపీ
దరఖాస్తు విధానం : పని ప్రదేశంలో జరిగిన ప్రమాదంలో శాశ్వత లేదా పాక్షిక వైకల్యం పొందిన కార్మికుడు ఈ స్కీమ్ కింద లబ్ధి పొందాలంటే ఆఫ్లైన్లో దరఖాస్తు చేసుకోవాలి.
- అందుకు.. దరఖాస్తుదారుడు ముందుగా డిసేబిలిటీ స్కీమ్కి సంబంధించిన అప్లికేషన్ ఫారమ్ని పొందాలి. దాని కోసం సమీపంలోని కార్మిక శాఖ కార్యాలయాన్ని సంప్రదించాలి. లేదంటే.. కార్మిక శాఖ అధికారిక వెబ్సైట్ విజిట్ చేసి కూడా ఫారమ్ని డౌన్లోడ్ చేసుకోవచ్చు.
- ఆ తర్వాత ఆ ఫారమ్లో వివరాలన్నీ కరెక్ట్గా నమోదు చేయాలి. తర్వాత అవసరమైన పత్రాలను అప్లికేషన్ ఫారమ్కి జత చేయాలి.
- అనంతరం ఫారమ్పై సంతకం చేసి కార్మిక శాఖలోని సంబంధిత అధికారికి అందజేయాలి.
- అప్లికేషన్ ఇచ్చాక దరఖాస్తు చేసినట్టుగా మీరు అధికారి వద్ద నుంచి రశీదు తీసుకోవాలి.
- అలాగే రశీదుపై అప్లికేషన్ సబ్మిట్ చేసిన తేదీ, సమయంతో పాటు మరికొన్ని ముఖ్యమైన వివరాలు సరిగ్గా ఉన్నాయా.. లేదా.. అని ఓసారి పరిశీలించుకోవాలి.
- మీ దరఖాస్తు చేసిన తర్వాత.. అసిస్టెంట్ కమిషనర్ స్థాయికి తగ్గ ప్రభుత్వ అధికారి దానిపై విచారణ జరుపుతారు.
- అప్పుడు ప్రమాదవశాత్తుగానే శాశ్వత లేదా పాక్షిక వైకల్యం సంభవించినట్లు నిర్ధరణ జరిగితే.. నేరుగా బాధిత కార్మికుడి బ్యాంక్ అకౌంట్లో ఆర్థిక సాయం జమ అవుతుంది.
మీకు ఈ కార్డు ఉందా? - లేకపోతే చాలా పథకాలు మిస్ అయినట్లే- ఎలా అప్లై చేయాలో తెలుసా?
స్థిరమైన ఆదాయం కావాలా? రిస్క్ ఏమాత్రం వద్దా? అయితే ఈ ప్రభుత్వ పథకాలపై ఓ లుక్కేయండి!
ప్రమాదవశాత్తూ మరణిస్తే రూ.6 లక్షల సాయం - ఈ స్కీమ్ గురించి తెలుసా?
