పోలీసులను వారి పనులను చేసుకోనివ్వండి - నా పని నేను చేస్తా : దిల్లీలో పవన్ కల్యాణ్

కేంద్రమంత్రులతో పవన్ కల్యాణ్ భేటీ - కీలక అంశాలపై చర్చించినట్లు వెల్లడి

Pawan Kalyan meets Union Ministers in Delhi: రాష్ట్ర అభివృద్ధే ధ్యేయంగా డిప్యూటీ సీఎం పవన్‌ కల్యాణ్‌ దిల్లీ పర్యటనలో నిమగ్నమయ్యారు. రాష్ట్రానికి రావాల్సిన నిధులు, పెండింగ్‌ అంశాలపై కేంద్ర ఆర్థిక, జలవనరులు, పర్యాటక, రైల్వే శాఖల మంత్రులతో చర్చలు జరిపారు. రాష్ట్ర అభివృద్ధికి సహకారం అందించాలని కోరారు. పలు ప్రాజెక్టుల రుణాల చెల్లింపు గడువును పెంచాలని విజ్ఞప్తి చేశారు. వారితో సమాలోచనల అనంతరం రాష్ట్ర అభివృద్ధికి పూర్తి సహకారం అందిస్తామని కేంద్రమంత్రులు భరోసా ఇచ్చినట్లు పవన్‌ కల్యాణ్‌ తెలిపారు.

Pavan Kalyan meets Gajendra Singh Shekhawat: మొదటగా కేంద్ర పర్యాటక శాఖ మంత్రి గజేంద్ర సింగ్ షెకావత్ ఇంటికి వెళ్లిన పవన్‌ కల్యాణ్ ఏపీలో టూరిజం యూనివర్సిటీ సహా 7 ప్రాజెక్టులపై చర్చించారు. రాష్ట్రంలో పర్యాటక ప్రాజెక్టులకు సంబంధించిన అంశాలను ఆయన వద్ద ప్రస్తావించారు. తమ ప్రతిపాదనపై కేంద్రమంత్రి షెకావత్ సానుకూలంగా స్పందించారని పవన్ తెలిపారు.

Pavan Kalyan meets CR Patil: అనంతరం కేంద్ర జలశక్తి శాఖ మంత్రి సి.ఆర్‌.పాటిల్‌తో పవన్‌ కల్యాణ్‌ భేటీ అయ్యారు. జల్ జీవన్ మిషన్ బడ్జెట్, కాలవ్యవధి పెంచాలని ఆయన్ని కోరినట్లు తెలిపారు. ప్రతి ఒక్కరికీ రక్షిత మంచినీరు ఇవ్వాలనేది కూటమి ప్రభుత్వ ప్రధాన లక్ష్యమన్నారు. క్షేత్రస్థాయి పర్యటనలో నీటి సమస్యలు, పైపు డిజైన్లలో లోపాలు ఉన్నట్లు గుర్తించామన్నారు. గత ప్రభుత్వం బాధ్యతారాహిత్యంగా తీసుకున్న నిర్ణయాలు, తప్పులు తమకు వారసత్వంగా వచ్చాయన్న పవన్ వాటిని సరిదిద్దుతున్నామన్నారు.

ఈ క్రమంలో మీడియా ప్రతినిధులు గత ప్రభుత్వంలో ఇబ్బంది పెట్టినవారిని ఎందుకు పట్టుకోవట్లేదని పవన్‌ని ప్రశ్నించగా హోంశాఖ, శాంతిభద్రతలు తన పరిధిలో లేవని పోలీసులు వారి పని వారు చేస్తున్నట్లు చెప్పారు. తనను అడిగిన ప్రశ్నలను సీఎం చంద్రబాబు దృష్టికి తీసుకువెళ్తానని పవన్‌ మీడియా ప్రతినిధులతో చెప్పారు. జగన్‌కు అదానీ ముడుపుల వ్యవహారంపైనా సీఎంతో చర్చించి నిర్ణయం తీసుకుంటామన్నారు.

సానుకూలంగా స్పందించిన మంత్రులు: రాష్ట్రంలోని గ్రామీణ ప్రాంత రహదారుల అభివృద్ధికి ఏఐఐబీ రుణానికి సంబంధించిన ప్రాజెక్టును 2026 డిసెంబర్ 31 వరకు పొడిగించాలని పవన్‌ కల్యాణ్‌ కేంద్రమంత్రి నిర్మలా సీతారామన్‌ని విజ్ఞప్తి చేశారు. రుణ ఒప్పందంలో పేర్కొన్న ప్రకారం రీయింబర్స్‌మెంట్‌ పద్దతిలో కాకుండా ముందస్తు చెల్లింపు పద్ధతిలో కొనసాగించాలని కోరారు. నిధుల చెల్లింపుల విధానంలోనూ మార్పులు చేయవల్సిందిగా విజ్ఞప్తి చేసినట్లు పవన్‌ తెలిపారు. రైల్వే, సమాచారశాఖ మంత్రి అశ్వినీ వైష్ణవ్‌తోనూ పవన్‌ కల్యాణ్‌ సమావేశమయ్యారు. రాష్ట్రానికి సంబంధించిన రైల్వే ప్రాజెక్టులు, పెండింగ్ అంశాలను త్వరితగతిన పూర్తిచేయాలని కోరగా రైల్వే మంత్రి సానుకూలంగా స్పందించినట్లు పవన్‌ తెలిపారు.