సీఎన్​జీ వాహనాలు ఫుల్ - బంకులు మాత్రం నిల్ - ఇదీ నగరంలో వాహనదారుల పరిస్థితి - CNG Filling Stations Shortage

CNG Filling Stations Shortage : తక్కువ ధరతో ఎక్కువ దూరం ప్రయాణం చేయవచ్చు. పర్యావరణాన్ని పరిరక్షించవచ్చనే ఉద్దేశంతో చాలా మంది వాహనదారులు సీఎన్​జీ వాహనాల కొనుగోలు వైపు మొగ్గుచూపుతున్నారు. కానీ వాహనాలకు తగ్గట్లుగా సీఎన్​జీ బంకులు మాత్రం అందుబాటులో లేవు. దీంతో వాహనదారులు ఇబ్బందులు ఎదుర్కొంటున్నారు. సీఎన్​జీ కోసం గంటల తరబడి క్యూలో వేచి ఉండాల్సి వస్తోందని ఆవేదన వ్యక్తం చేస్తున్నారు . తమ వంతు వచ్చేసరికి నోస్టాక్ బోర్డులు దర్శనమిస్తున్నాయని వాహనదారులు ఆందోళన చెందుతున్నారు. ఈ నేపథ్యంలో నగరంలో సీఎన్​జీ కొరతపై ప్రత్యేక కథనం.

CNG Filling Stations Shortage : పెట్రోల్, డీజిల్​తో పోల్చుకుంటే సీఎన్​జీ ధర కాస్త తక్కువగానే ఉంటుంది. అందుకే ఎక్కువ మంది సీఎన్​జీ వాహనాలను కొనుగోలు చేసేందుకు మొగ్గుచూపుతున్నారు. గ్రేటర్ పరిధిలో సీఎన్​జీ వాహనాల కొనుగోళ్లు భారీగా పెరుగుతున్నప్పటికీ అందుకు తగ్గట్లు బంకులు లేకపోవడంతో వాహనదారులు ఇబ్బందులు పడుతున్నారు. ప్రతిరోజూ 2,000ల కిలోల వరకు సీఎన్​జీ స్టాక్ రావాల్సి ఉండగా, కేవలం 200ల కిలోలు మాత్రమే వస్తోందని కొందరు డీలర్లు చెబుతున్నారు.

గ్రేటర్ పరిధిలో సీఎన్​జీ బంకుల కొరత : నగరంలోని సీఎన్​జీ వాహనాలకు అనుగుణంగా 100కి పైగా బంకులు ఉండాలి. కానీ గ్రేటర్ పరిధిలో కేవలం 55 సీఎన్​జీ బంకులు మాత్రమే అందుబాటులో ఉన్నాయి. ఇందులో కంపెనీ అవుట్ లెట్లయిన కోకో బంకుల్లో సరిపడా స్టాక్ ఉంచేందుకు రెండు నుంచి మూడు వాహనాలు అందుబాటులో ఉంచుతున్నారని డీలర్లు ఆరోపిస్తున్నారు. తార్నాక, కొత్తపేట తదితర ప్రాంతాల్లోని కోకో స్టేషన్లలో స్టాక్ సరిపడా ఉండడంతో అక్కడ వాహనాలు బారులు తీరుతున్నాయి. ఈ ప్రాంతాల్లో గంట నుంచి గంటన్నర వరకు ఆగితే తప్ప ఇంధనం లభించే పరిస్థితి లేదు. ఆర్టీసీ క్రాస్ రోడ్ సమీపంలోని బంక్​లో కూడా ఇదే పరిస్థితి నెలకొంది. ఇక్కడ సీఎన్​జీని వాహనాల్లో నింపడానికి గంట నుంచి రెండు గంటలు సమయం పడుతుందని వాహనదారులు ఆందోళన వ్యక్తంచేస్తున్నారు.

సీఎన్​జీ వాహనదారులకు తప్పని ఇంధన ఇక్కట్లు : గ్రేటర్ పరిధిలోని సీఎన్​జీ బంకుల్లో ప్రతి రోజూ సుమారు లక్ష కేజీల సీఎన్​జీ అవసరం ఉంటుందని అంచనా. ఒక్కో బంకులో 1,500ల నుంచి 2వేల కేజీల సీఎన్​జీ అవసరం ఉంటుంది. రోజూ కేవలం 200ల కిలోల సీఎన్​జీ గ్యాస్ మాత్రమే సరఫరా అవుతోంది. డెలివరీ చేసే ట్రక్ సామర్థ్యం 200ల కేజీలు మాత్రమే. అది అయిపోతే మళ్లీ మరుసటి రోజే స్టాక్ వస్తుంది. దీంతో స్టాక్ వచ్చిన గంటన్నర వ్యవధిలోనే నో స్టాక్ బోర్డులు పెట్టక తప్పడంలేదని డీలర్లు వాపోతున్నారు. ఓయూ క్యాంపస్ సమీపంలోని హెచ్​పీ బంక్​లో, ఆర్టీసీ క్రాస్ రోడ్ లోని సీఎన్​జీ బంక్​లో ఉదయం నుంచి రాత్రి వరకు ఆటోలు కార్లు రోడ్డుపై బారులు తీరుతున్నాయి.

ఆర్టీసీ కంటోన్మెంట్ డిపోలో 130 సీఎన్​జీ బస్సలు అందుబాటులో ఉండేవి. ఎలక్ట్రిక్ వాహనాలు అందుబాటులోకి రాకముందు వీటిని నగరంలో తిప్పేవారు. తద్వార కాలుష్యం అరికట్టవచ్చని సంస్థ భావించింది. అయితే బస్సులకు అవసరమైన ఇంధనం సరైన సమయానికి చేరకపోవడం, వాటికి సంబంధించి పిస్టన్ సమస్యలు తరచూ ఉత్పన్నమవడంతో ఆర్టీసీ సీఎన్​జీ బస్సుల వినియోగాన్ని పూర్తిగా నిలిపివేసింది. అప్పటి నుంచి మళ్లీ సీఎన్​జీ బస్సుల కొనుగోలువైపు కనీసం ఆర్టీసీ కన్నెత్తి కూడా చూడడంలేదు.

సీఎన్​జీ వాహనదారుల ఆందోళన : సీఎన్​జీ వాహనాల కొనుగోలు పెరుగుతున్నప్పటికీ వాటికి తగ్గట్టుగా బంకులు లేకపోవడంతో వాహనదారులు ఆందోళన చెందుతున్నారు. వాహనాలకు తగ్గట్టు సీఎన్​జీ బంకులు పెంచాల్సిన అవసరం ఎంతైనా ఉందని ఆ దిశగా కృషిచేయాలని డీలర్లకు విజ్ఞప్తిచేస్తున్నారు. లేదంటే సీఎన్​జీ వాహనాల కొనుగోలుపై ఆ ప్రభావం పడుతుందని వాహనదారులు అభిప్రాయపడుతున్నారు.