TTD Chairman BR Naidu Inspects Arrangements at Token Counter Tirumala : వైకుంఠ ఏకాదశి సందర్బంగా శ్రీవారి దర్శనానికి వచ్చే భక్తులకు ఎటువంటి ఇబ్బందులు లేకుండా స్వామి వారి దర్శనం కల్పించేలా చర్యలు తీసుకుంటున్నామని టీటీడీ ఛైర్మన్ బీఆర్ నాయుడు తెలిపారు. ఈ నెల 10 నుంచి 19 వరకు తిరుమలలో వైకుంఠ ద్వారాలు తెరిచే ఉండనున్నాయని పేర్కొన్నారు. ఈ మేరకు అన్ని సర్వదర్శన టోకెన్‌ జారీ ఏర్పాట్లను ముమ్మరం చేశారు. టోకెన్ల జారీ ఏర్పాట్లపై టీటీడీ ఈవోతో ఛైర్మన్ బీఆర్ నాయుడు చర్చించామన్నారు.
ఈ సందర్భంగా ఛైర్మన్ మీడియాతో మాట్లాడుతూ, భక్తులు సంయమనం పాటించి శ్రీవారిని దర్శించుకోవాలని సూచించారు. 10 రోజుల పాటు భక్తులు వైకుంఠ ద్వార దర్శనం చేసేందుకు వీలుగా పటిష్ట ఏర్పాట్లు చేస్తున్నామని తెలిపారు. జనవరి 10, 11, 12 తేదీలకు సంబంధించి జనవరి 9వ తేదీన ఉదయం 5 గంటల నుంచి 1.20 లక్షల టోకెన్లు జారీ చేసేందుకు ఏర్పాట్లు చేస్తున్నామన్నారు. దీనికోసం తిరుపతిలోని 8 కేంద్రాలలో 90 కౌంటర్లు, తిరుమలలో 4 కౌంటర్లు కలుపుకుని మొత్తం 94 కౌంటర్లలో టోకెన్లు మంజూరు చేస్తామన్నారు.
తిరుమల వైకుంఠ ద్వార దర్శనానికి ఏర్పాట్లు - ఆన్‌లైన్లో టికెట్లు విడుదల
తిరుపతిలో ఇందిరా మైదానం, రామచంద్ర పుష్కరిణి, శ్రీనివాసం కాంప్లెక్స్‌, విష్ణునివాసం కాంప్లెక్స్‌, భూదేవి కాంప్లెక్స్‌, భైరాగిపట్టెడలోని రామానాయుడు ఉన్నత పాఠశాల, ఎంఆర్‌ పల్లిలోని జిల్లా పరిషత్‌ ఉన్నత పాఠశాల, జీవకోనలోని జిల్లా పరిషత్‌ ఉన్నత పాఠశాల, అదేవిధంగా తిరుమల స్థానికుల కొరకు తిరుమల బాలాజీ నగర్‌ కమ్యూనిటీ హాల్‌లో ఏర్పాట్లు చేస్తున్నారు. సామాన్య భక్తులకు అనుగుణంగా ఏర్పాట్లు జరుగుతున్నాయని తెలిపారు. వీఐపీలకు ఎలాంటి ప్రాధాన్యత ఇవ్వడం లేదని పేర్కొన్నారు.
తిరుపతిలో భక్తుల సౌకర్యార్థం క్యూలైన్లు, బారికేడ్లు, షెడ్లు, భద్రత, తాగునీరు, మరుగుదొడ్లు తదితర పటిష్ట చర్యలు చేపట్టాలని అధికారులకు సూచించారు. సంక్రాంతి సెలవుల దృష్ట్యా లక్షలాదిగా భక్తులు తిరుమలకు తరలివచ్చే అవకాశాలున్నాయని అధికారులు అంచనా వేస్తున్నారు. వారందరికీ ఎటువంటి అసౌకర్యం కలగకుండా చర్యలు చేపడుతున్నట్లు అధికారులు తెలిపారు. తోపులాటలు జరగకుండా సిబ్బందికి ఆదేశాలు ఇచ్చారు.
