'మత్తు వీడు బ్రో' - డ్రగ్స్‌ నిర్మూలనపై అవగాహన కార్యక్రమాలు

యువత, బాలలు జీవితాలను చిత్తు చేస్తున్న గంజాయి, మత్తు పదార్థాలు - నివారించేందుకు కూటమి ప్రభుత్వం చర్యలు - అవగాహన కార్యక్రమాలు చేపట్టేందుకు ప్రణాళిక సిద్ధం చేస్తున్న అధికారులు

Awareness on Eradication of Ganja and Drugs: గంజాయి, ఇతర మత్తు పదార్థాలు యువత, బాలలు సహా వివిధ వర్గాల జీవితాలను చిత్తు చేస్తున్నాయి. దుష్పరిణామాలకు కారణమవుతున్నాయి. వాటిని నివారించేందుకు కూటమి ప్రభుత్వం 'డ్రగ్స్‌ వద్దు బ్రో' అని పిలుపునివ్వడంతో అవగాహన కార్యక్రమాలు చేపట్టేందుకు అధికారులు ప్రణాళిక సిద్ధం చేస్తున్నారు.

మత్తు పదార్థాలతో కలిగే అనర్థాలు, అడ్డుకట్ట వేయాల్సిన పరిస్థితులపై వివరించనున్నారు. ఈ క్రమంలో జిల్లాకి ఒక నార్కోటిక్స్‌ కంట్రోల్‌ సెల్‌ ఏర్పాటు చేయనున్నట్లు ప్రభుత్వం ప్రకటించింది. ఈ నేపథ్యంలో పూర్తిస్థాయిలో మత్తు పదార్ధాల రవాణా, విక్రయాలకు అడ్డుకట్ట పడనుంది.

• పశ్చిమ గోదావరి జిల్లాలో గతేడాది నమోదైన కేసులు : 10
• అదుపులోకి తీసుకున్నవారు : 44
• స్వాధీనం చేసుకున్న గంజాయి: 88.70 కేజీలు

ఒకరిని చూసి మరొకరు: కుటుంబంలో తరచూ గొడవలు పడటం, తల్లిదండ్రుల పర్యవేక్షణ లేకపోవడం, మితిమీరిన స్వేచ్ఛ, అడిగినంత డబ్బులివ్వడం, తల్లి లేదా తండ్రిని కోల్పోయిన వారితోపాటు పాఠశాల, కళాశాల స్థాయిలో ఎక్కువగా ఒకరిని చూసి మరొకరు ప్రేరేపితులవుతున్నారు.

ఎక్కువగా యువతే: మొగల్తూరు మండలం ముత్యాలపల్లిలో గత డిసెంబరులో రూ.లక్ష విలువ చేసే ద్రవ రూపంలో ఉన్న గంజాయిని విక్రయించేందుకు ప్రయత్నిస్తున్న 10 మంది యువకులను పోలీసులు అదుపులోకి తీసుకున్నారు. నరసాపురం నియోజకవర్గంలోని ఓ కళాశాలలో విద్యార్థులు గంజాయి వాడుతున్నారనే ప్రచారం జరుగుతోంది. గత ఏడాది ఆగస్టులో పెనుగొండలో గంజాయి విక్రయిస్తున్న ఇద్దరు యువకులను అదుపులోకి తీసుకున్నారు.

లక్షణాలివే: విపరీతమైన కోపం, ఉద్రేకం, రాత్రంతా ఫోన్‌తో గడిపేయడం, పెద్దవాళ్లకు ఎదురు చెప్పడం, గొడవకు దిగడం, ఇంట్లో చెప్పకుండా బయటకు వెళ్లడం, డబ్బులు దొంగిలించడం, కాలేజీలు ఎగ్గొట్టి తిరగడం, క్రమశిక్షణ లేకపోవడం, నిర్మానుష్య ప్రాంతాల్లో తిరగడం, కాళ్లు, చేతుల్లో వణుకు వస్తున్న యువకులు, చిన్న వయసులో శరీరంలో చెమటలు వస్తున్నవారిని అనుమానించాలి.

అవగాహన సదస్సులు: కాలేజీల్లో అవగాహన సదస్సులు నిర్వహించి విద్యార్థులను వాటికి దూరంగా ఉండాలని, లేకపోతే భవిష్యత్తు నాశనం అవుతుందని హెచ్చరిస్తూ మార్పు తీసుకొచ్చేందుకు పోలీసులు ప్రయత్నిస్తున్నారు. భీమవరం, నరసాపురం, తాడేపల్లిగూడెం, తణుకు ప్రాంతాల్లో సాంకేతిక, ఇంజినీరింగ్, డిగ్రీ ఇతర కళాశాలలు ఉండటంతో ఆ ప్రాంతాల్లో నిఘా మరింత కట్టుదిట్టం చేశామని జిల్లా ఎస్పీ అద్నాన్‌ నయీం అస్మి తెలిపారు.

కౌన్సెలింగ్‌తో నయం:

• భీమవరానికి చెందిన ఓ విద్యార్థి ప్రైవేటు కాలేజీలో ఇంజినీరింగ్‌ చదువుతున్నాడు. గంజాయికి అలవాటువడటంతో చదువులో వెనుకబడటమే కాదు ముభావంగా ఉండటం, ఎవరితోనూ కలవకపోవడంతో అనుమానం వచ్చిన తల్లిదండ్రులు గట్టిగా నిలదీశారు. గంజాయికి బానిసయ్యారని తెలియడంతో కౌన్సెలింగ్‌ ఇప్పిస్తున్నారు.
• మొగల్తూరు మండలంలో ఓ యువకుడు గంజాయికి అలవాటుపడి అకారణంగా ఇరుగుపొరుగు వారితో వివాదాలు పెట్టుకుని, దాడులు చేసేవాడు. డబ్బులివ్వాలంటూ మరో యువకుడు తల్లిదండ్రులతో గొడవపడేవాడు. వీరికి పోలీసులు కౌన్సెలింగ్‌ ఇచ్చి పంపించారు.