The joy of baby girl : తెలంగాణలోని జగిత్యాల జిల్లాలో జరిగిన ఓ ఘటన వార్తల్లోకెక్కింది. ఓ వ్యక్తి గ్రామంలోని ప్రతి ఇంటికీ వెళ్లి ఆయా కుటుంబాల్లోని మహిళలకు ఉచితంగా చీరెలు అందించాడు. అందుకు కారణం లేకపోలేదు. ఉద్యోగం చేసుకునే అతడు ఊరంతా చీరెలు పంచడం వెనుక పెద్ద తతంగమే ఉంది.
జగిత్యాల జిల్లా బీర్పూర్ మండలం తుంగూరు గ్రామంలో ఓగులపు అజయ్ బతుకుదెరువు కోసం గతంలో దుబాయ్ వెళ్లాడు. అక్కడే పనిచేసుకుంటూ కుటుంబాన్ని పోషించుకునేవాడు. ఈ క్రమంలో రెండేళ్ల క్రితం అక్కడ పనిచేస్తుండగా రూ.30 కోట్ల లాటరీ అతడిని వరించింది. దీంతో ఒక్కసారిగా కోటీశ్వరుడైపోయిన అజయ్ స్వగ్రామానికి వచ్చేశాడు. వివాహం చేసుకుని హ్యాపీగా సెటిలైపోయాడు. ఇదిలా ఉండగా 30కోట్ల లాటరీకి మించిన అదృష్టం వరించడంపై అజయ్ అనందానికి హద్దుల్లేకుండా పోయింది. తన కోరిక నెరవేరడంతో ఇంటింటికీ ఉచితంగా చీరలు పంపిణీ చేశానని అజయ్ పేర్కొన్నాడు.
తనకు ఆడపిల్ల పుట్టడం 30 కోట్ల రూపాయలకు మించిన ఆనందం ఇచ్చిందని అజయ్ తెలిపాడు. ఆడపిల్ల జన్మించడంతో పండుగలా మురిసిపోయాడు. మహాలక్ష్మి మా ఇంటికి వచ్చిందంటూ గ్రామంలో ఇంటింటికీ వెళ్లి చీరలు పంచి వేడుక చేసుకున్నాడు. ఇంటింటికీ తిరుగుతూ దాదాపు 1500 చీరలను పంపిణీ చేశారు. ఆడపిల్ల పుట్టిందంటేనే మొహం చాటేసే ఈ రోజుల్లో అజయ్ వేడుకలా జరుపుకోవడం విశేషం. లాటరీలో వచ్చిన 30 కోట్ల డబ్బుకు మించిన అనందం ఇదేనని చెప్పాడు.
ఇంట్లో ఆడపిల్ల పుట్టడాన్ని ఎంతో మంది అదృష్టంగా భావిస్తుంటారు. మహారాష్ట్రంలోని కొల్హాపూర్లో ఓ ఇంట్లో ఆడపిల్ల పుట్టడంతో పండగ చేసుకున్నారు. ఆ వంశంలో 35 ఏళ్ల తర్వాత ఆడపిల్ల జన్మించడంతో ఏనుగు మీద ఊరేగించాడు. పుట్టిన తర్వాత తొలి సారిగా ఇంటికి వస్తున్న చిన్నారికి ఎంతో ఆనందంతో ఘన స్వాగతం పలికారు. పచ్‌గావ్ వాసి గిరీశ్ పాటిల్కు తన కూతురుకు ముద్దుగా 'ఐరా' అని పేరు పెట్టుకున్నాడు.తొలిసారిగా ఇంటికి తీసుకొస్తూ జీవితంలో ఎప్పటికి గుర్తుండి పోయేలా చిన్నారికి ఘన స్వాగతం పలికాడు. ఏనుగుపై ఊరేగింపుతో కళాకారుల వేషధారణలు, డప్పుల మధ్య చిన్నారికి ఆహ్వానం పలికాడు. 35 ఏళ్ల తరువాత తమ ఇంట్లో ఆడపిల్ల పుట్టడంపై పాటిల్ కుటుంబ సభ్యులు మాట్లాడుతూ చిన్నారిని తాము మహాలక్ష్మిగా భావిస్తున్నట్లు తెలిపారు.
