T20 Worldcup 2024 Super 8 Teamindia VS Australia : టీ20 వ‌ర‌ల్డ్‌క‌ప్‌ - 2024 సెమీ ఫైన‌ల్లో భారత జట్టు అడుగుపెట్టింది. ఈ మెగా టోర్నీ సూప‌ర్‌-8లో భాగంగా తాజాగా సెయింట్ లూసియా వేదిక‌గా ఆస్ట్రేలియాతో జరిగిన మ్యాచ్లో 24 పరుగుల తేడాతో ఘన విజయం సాధించింది. దీంతో గ్రూపు-1 నుంచి త‌మ సెమీస్ బెర్త్‌ను ఖారారు చేసుకుంది. ఇదే పోరులో 206 పరుగుల భారీ లక్ష్యంతో బరిలోకి దిగిన ఆస్ట్రేలియా నిర్ణీత 20 ఓవర్లలో 7 వికెట్లు కోల్పోయి 181 పరుగులు మాత్రమే చేసింది. అయితే ఈ మ్యాచ్లో పలు రికార్డులు నమోదయ్యాయి.
- తాజా మ్యాచ్తో కలిపి టీ20ల్లో రోహిత్ 4165 పరుగులు చేశాడు. దీంతో అత్యధిక పరుగుల జాబితాలో అగ్రస్థానంలో నిలిచాడు. పాకిస్థాన్‌ బ్యాటర్‌ బాబర్ అజామ్‌ (4145)ను బ్రేక్ చేశాడు.
- ఈ మ్యాచ్లో రోహిత్ 8 సిక్సర్లు కొట్టాడు. టీ20 వరల్డ్ కప్ ఇన్నింగ్స్‌లో అత్యధిక సిక్సర్లు బాదిన భారత ఆటగాడిగా యువరాజ్ సింగ్ (2007లో 7) రికార్డును అధిగమించాడు. అంతర్జాతీయ టీ20ల్లో 200 కన్నా ఎక్కువ సిక్సర్లు కొట్టిన ప్లేయర్ రోహితే (203) కావడం విశేషం. గప్తిల్‌ (173) రెండో స్థానంలో కొనసాగుతున్నాడు.
- ఈ మ్యాచ్లో రోహిత్ శర్మ హాఫ్ సెంచరీ అందుకున్నప్పుడు జట్టు పరుగులు 52. ఓ ప్లేయర్ హాఫ్ సెంచరీ చేసిన సమయంలో ఓ జట్టు చేసిన అత్యల్ప రన్స్ ఇవే కావడం గమనార్హం.
- రోహిత్ శర్మ హాఫ్ సెంచరీ చేయడానికి తీసుకున్న బంతులు 19. టీ20ల్లో ఇదే అతడి ఫాస్టెస్ట్ హాఫ్ సెంచరీ. టీ20ల్లో ఆసీస్పై అత్యంత వేగంగా అర్ధ శతకం చేసిన ప్లేయర్గా యువరాజ్ సింగ్, పోలార్డ్‌ (20)లను వెనక్కినెట్టాడు. ఈ టోర్నీలో వేగవంతమైన అర్ద శతకం ఇదే.
- ఈ మ్యాచ్లో రోహిత్ స్కోరు 92. టీ20 ప్రపంచకప్‌ల్లో టీమ్ఇండియా తరఫున రైనా (2010లో సౌతాఫ్రికాపై ఇదే మైదానంలో 101) తర్వాత అత్యధిక స్కోరు హిట్మ్యాన్దే. 2010లో గేల్‌ టీమ్ఇండియాపై 98 తర్వాత అత్యధిక పరుగులు చేసిన కెప్టెన్‌ రోహిత్ శర్మే.
